ਹੁਸ਼ਿਆਰਪੁਰ, 19 ਫਰਵਰੀ (ਪੋਸਟ ਬਿਊਰੋ)- ਕੱਲ੍ਹ ਰਾਤ ਹਰਿਆਣਾ ਨੇੜੇ ਨੌਸ਼ਹਿਰਾ ਲੱਕੜ ਮੰਡੀ ਦੇ ਕੰਪਾਊਂਡ ਵਿੱਚੋਂ ਦੋ ਲਾਸ਼ਾਂ ਮਿਲਣ ਨਾਲ ਇਲਾਕੇ 'ਚ ਸਨਸਨੀ ਫੈਲ ਗਈ। ਪਿੰਡ ਬਾਬੂ ਖਾਂ ਵਿੱਚ ਰਹਿੰਦੇ ਦੋ ਨੌਜਵਾਨਾਂ ਨੂੰ ਕਿਸੇ ਨੇ ਤੇਜ਼ਧਾਰ ਹਥਿਆਰਾਂ ਨਾਲ ਕਤਲ ਕਰ ਦਿੱਤਾ ਸੀ। ਸਵੇਰੇ ਜਦੋਂ ਲੱਕੜ ਮੰਡੀ ਦਾ ਇਕ ਮੁਲਾਜ਼ਮ ਉਥੇ ਪਹੁੰਚਿਆ ਤਾਂ ਉਸ ਨੇ ਖੂਨ ਨਾਲ ਲਥਪਥ ਲਾਸ਼ਾਂ ਦੇਖ ਪੁਲਸ ਨੂੰ ਸੂਚਿਤ ਕੀਤਾ।
ਐਸ ਪੀ (ਡੀ) ਹਰਪ੍ਰੀਤ ਸਿੰਘ ਮੰਡੇਰ ਅਤੇ ਐਸ ਐਚ ਓ ਹਰਿਆਣਾ ਦਿਲਬਾਗ ਸਿੰਘ ਨੇ ਮੌਕੇ ਉੱਤੇ ਪਹੁੰਚ ਕੇ ਘਟਨਾ ਵਾਲੀ ਥਾਂ ਦਾ ਜਾਇਜ਼ਾ ਲਿਆ। ਮ੍ਰਿਤਕਾਂ ਦੀ ਪਛਾਣ ਗੁਰਕੰਵਲ ਸਿੰਘ (24) ਅਤੇ ਅਜੀਤ ਟੋਪਨੂ ਵਜੋਂ ਹੋਈ ਹੈ। ਜਾਣਕਾਰੀ ਮੁਤਾਬਕ ਗੁਰਕੰਵਲ ਆਪਣੇ ਨਾਨਕਿਆਂ ਦੇ ਰਹਿੰਦਾ ਸੀ ਜਦੋਂ ਕਿ ਟੋਪਨੂ ਝਾਰਖੰਡ ਦਾ ਮੂਲ ਵਾਸੀ ਸੀ। ਦੋਵੇਂ ਲੱਕੜ ਵੱਢਣ ਦਾ ਕੰਮ ਕਰਦੇ ਸਨ। ਹਰਿਆਣਾ ਪੁਲਸ ਨੇ ਗੁਰਕੰਵਲ ਦੇ ਨਾਨਾ ਰੇਸ਼ਮ ਸਿੰਘ ਦੇ ਬਿਆਨ 'ਤੇ ਪਿੰਡ ਨੌਸ਼ਹਿਰਾ ਦੇ ਲਵਦੀਪ ਸਿੰਘ ਤੇ ਹਾਜੀਪੁਰ ਦੇ ਪਰਮਜੀਤ ਸਿੰਘ ਦੇ ਖਿਲਾਫ ਕੇਸ ਦਰਜ ਕੀਤਾ ਹੈ। ਰੇਸ਼ਮ ਸਿੰਘ ਮੁਤਾਬਕ ਇਹ ਦੋਵੇਂ ਵਿਅਕਤੀ ਕੱਲ੍ਹ ਸ਼ਾਮ ਉਸ ਦੇ ਦੋਹਤੇ ਨੂੰ ਆਪਣੇ ਨਾਲ ਲੈ ਕੇ ਗਏ ਸਨ। ਟੋਪਨੂ ਦੇ ਭਰਾ ਅਨਿਲ ਨੇ ਦੱਸਿਆ ਕਿ ਅਜੀਤ ਅਤੇ ਗੁਰਕੰਵਲ ਇਕੱਠੇ ਕੰਮ ਕਰਦੇ ਸਨ ਅਤੇ ਅਕਸਰ ਰਾਤ ਨੂੰ ਇਕੱਠੇ ਸ਼ਰਾਬ ਪੀਂਦੇ ਹੁੰਦੇ ਸਨ। ਉਸ ਨੇ ਦੱਸਿਆ ਕਿ ਕੱਲ੍ਹ ਰਾਤ ਜਦੋਂ ਉਸ ਦਾ ਭਰਾ ਘਰ ਨਹੀਂ ਆਇਆ ਤਾਂ ਉਨ੍ਹਾਂ ਇਹ ਸਮਝਿਆ ਕਿ ਉਹ ਆਪਣੇ ਦੋਸਤ ਵੱਲ ਹੀ ਠਹਿਰ ਗਿਆ ਹੈ। ਸੂਤਰਾਂ ਅਨੁਸਾਰ ਪੁਲਸ ਨੇ ਇਕ ਦੋਸ਼ੀ ਨੂੰ ਹਿਰਾਸਤ ਵਿੱਚ ਲੈ ਲਿਆ ਹੈ, ਪਰ ਅਧਿਕਾਰਤ ਤੌਰ 'ਤੇ ਪੁਲਸ ਨੇ ਇਸ ਦੀ ਪੁਸ਼ਟੀ ਨਹੀਂ ਕੀਤੀ।