ਨਵੀਂ ਦਿੱਲੀ, 18 ਫਰਵਰੀ (ਪੋਸਟ ਬਿਊਰੋ)- ਪਿਛਲੇ ਹਫਤੇ ਪੁਲਵਾਮਾ ਵਿਖੇ ਭਿਆਨਕ ਅੱਤਵਾਦੀ ਹਮਲੇ ਦੀ ਸਾਜ਼ਿਸ਼ ਪਾਕਿਸਤਾਨ 'ਚ ਅੱਤਵਾਦੀ ਸੰਗਠਨ ਜੈਸ਼-ਏ-ਮੁਹੰਮਦ ਦੇ ਮੁਖੀ ਮਸੂਦ ਅਜ਼ਹਰ ਨੇ ਹੀ ਰਚੀ ਸੀ। ਉਸ ਨੇ ਰਾਵਲਪਿੰਡੀ ਦੇ ਆਰਮੀ ਬੇਸ ਹਸਪਤਾਲ ਤੋਂ ਆਪਣੇ ਲੜਾਕਿਆਂ ਨੂੰ ਪੁਲਵਾਮਾ ਵਿਖੇ ਸੀ ਆਰ ਪੀ ਐਫ ਦੇ ਕਾਫਲੇ 'ਤੇ ਆਤਮਘਾਤੀ ਹਮਲੇ ਦੀ ਹਦਾਇਤ ਦਿੱਤੀ ਸੀ। ਅਜ਼ਹਰ ਨੇ ਇੱਕ ਵੀਡੀਓ ਜਾਰੀ ਕਰ ਕੇ ਅੱਤਵਾਦੀਆਂ ਨੂੰ ਹਮਲਾ ਕਰਨ ਨੂੰ ਕਿਹਾ ਸੀ। ਉਸ ਹਸਪਤਾਲ 'ਚ ਅਜ਼ਹਰ ਦਾ ਪਿਛਲੇ ਚਾਰ ਮਹੀਨਿਆਂ ਤੋਂ ਇਲਾਜ ਚੱਲ ਰਿਹਾ ਹੈ ਤੇ ਇਸ ਬਿਮਾਰੀ ਕਾਰਨ ਹੀ ਉਹ ਯੂਨਾਈਟਿਡ ਜਹਾਦ ਕੌਂਸਲ ਦੀਆਂ ਪਿਛਲੀਆਂ ਛੇ ਬੈਠਕਾਂ ਵਿੱਚ ਹਾਜ਼ਰ ਨਹੀਂ ਹੋਇਆ ਸੀ।
ਵਰਨਣ ਯੋਗ ਹੈ ਕਿ ਯੂਨਾਈਟਿਡ ਜਹਾਦ ਕੌਂਸਲ ਭਾਰਤ ਵਿਰੁੱਧ ਕੰਮ ਕਰਨ ਵਾਲਾ ਜੇਹਾਦੀ ਸੰਗਠਨ ਹੈ। ਇਸ ਦੀ ਸਰਪ੍ਰਸਤੀ ਪਾਕਿਸਤਾਨ ਦੀ ਖੁਫੀਆ ਏਜੰਸੀ ਵੱਲੋਂ ਕੀਤੀ ਜਾਂਦੀ ਹੈ। ਅੱਠ ਦਿਨ ਪਹਿਲਾਂ ਉਸ ਦੇ ਲੜਾਕੇ ਪੁਲਵਾਮਾ ਵਿਖੇ ਅੱਤਵਾਦੀ ਹਮਲਾ ਕਰਨ ਲਈ ਤਿਆਰ ਹੋ ਗਏ ਸਨ। ਅਜ਼ਹਰ ਨੇ ਆਪਣੀ ਮੱਠੀ ਆਵਾਜ਼ ਵਿੱਚ ਆਪਣੇ ਲੜਾਕਿਆਂ ਲਈ ਆਡੀਓ ਸੰਦੇਸ਼ ਜਾਰੀ ਕੀਤਾ ਸੀ, ਜਿਸ ਵਿੱਚ ਉਸ ਨੂੰ ਆਪਣੇ ਭਤੀਜੇ ਉਸਮਾਨ ਦੀ ਮੌਤ ਦਾ ਬਦਲਾ ਲੈਣ ਦੀ ਗੱਲ ਕਰਦਿਆਂ ਸੁਣਿਆ ਜਾ ਸਕਦਾ ਹੈ। ਅਜ਼ਹਰ ਉਸ ਆਡੀਓ 'ਚ ਇਹ ਵੀ ਕਹਿੰਦਾ ਸੁਣਿਆ ਗਿਆ ਹੈ ਕਿ ਇਸ ਹਮਲੇ 'ਚ ਮੌਤ ਨਾਲੋਂ ਵਧੀਆ ਕੋਈ ਗੱਲ ਹੋ ਨਹੀਂ ਸਕਦੀ। ਆਡੀਓ ਵਿੱਚ ਉਹ ਲੜਾਕਿਆਂ ਨੂੰ ਭਾਰਤ ਵਿਰੁੱਧ ਭੜਕਾਉਂਦਾ ਸੁਣਾਈ ਦਿੰਦਾ ਹੈ। ਅਜ਼ਹਰ ਆਡੀਓ ਵਿੱਚ ਲੜਾਕਿਆਂ ਨੂੰ ਕਹਿੰਦਾ ਹੈ ਕਿ ਕੋਈ ਤੁਹਾਨੂੰ ਦਹਿਸ਼ਤਗਰਦ ਕਹੇਗਾ, ਕੋਈ ਨਿਕੰਮਾ ਕਹੇਗਾ, ਕੋਈ ਪਾਗਲ ਕਹੇਗਾ ਅਤੇ ਕੋਈ ਅਮਨ ਲਈ ਖਤਰਾ ਕਹੇਗਾ।
ਕਸ਼ਮੀਰ ਦੇ ਇੱਕ ਵੱਡੇ ਇੰਟੈਲੀਜੈਂਸ ਅਧਿਕਾਰੀ ਦੇ ਮੁਤਾਬਕ ਜੈਸ਼ ਦਾ ਕੋਈ ਵੀ ਆਦਮੀ ਅੱਗੇ ਨਹੀਂ ਆਏਗਾ। ਇਸ ਦੇ ਤਿੰਨ ਪ੍ਰਮੁੱਖ ਆਗੂ ਉਮੈਰ, ਇਸਮਾਈਲ, ਅਬਦੁਲ ਦੱਖਣੀ ਕਸ਼ਮੀਰ ਵਿੱਚ ਲੁਕੇ ਹੋਏ ਹਨ। ਕਸ਼ਮੀਰ 'ਚ ਇਸ ਸਮੇਂ 60 ਤੋਂ ਵੱਧ ਅੱਤਵਾਦੀ ਸਰਗਰਮ ਹਨ। ਇਨ੍ਹਾਂ 'ਚ 35 ਪਾਕਿਸਤਾਨ ਦੇ ਹਨ, ਜਦ ਕਿ ਬਾਕੀ ਸਥਾਨਕ ਹਨ।