* ਬਠਿੰਡਾ ਦੇ ਕਿਸਾਨ ਨਾਲ ਪੰਜ ਲੱਖ ਦੀ ਠੱਗੀ
ਬਠਿੰਡਾ, 18 ਫਰਵਰੀ (ਪੋਸਟ ਬਿਊਰੋ)- ਕੋਈ ਵਿਅਕਤੀ ਕਿਸੇ ਕੋਲ ਆ ਕੇ ਕਹੇ ਕਿ ਉਸ ਨੂੰ ਖੁਦਾਈ ਵਿੱਚ ਸੋਨਾ ਜਾਂ ਸੋਨੇ ਦੇ ਗਹਿਣੇ ਮਿਲੇ ਹਨ ਤੇ ਉਹ ਉਸ ਨੂੰ ਸਸਤੇ ਭਾਅ ਵੇਚਣਾ ਚਾਹੁੰਦਾ ਹੈ ਤਾਂ ਸਾਵਧਾਨ ਰਹਿਣਾ ਚਾਹੀਦਾ ਹੈ।
ਜਿ਼ਲਾ ਬਠਿੰਡਾ ਦੇ ਪਿੰਡ ਲਹਿਰਾ ਮੁਹੱਬਤ ਦਾ ਇੱਕ ਕਿਸਾਨ ਵੀ ਇਸ ਤਰ੍ਹਾਂ ਕਰਨ ਵਾਲੇ ਇੱਕ ਗਿਰੋਹ ਦਾ ਸ਼ਿਕਾਰ ਹੋਇਆ ਹੈ। ਇਸ ਗਿਰੋਹ ਦੇ ਮੈਂਬਰ ਕਿਸਾਨ ਨੂੰ ਅੱਧਾ ਨਕਲੀ ਸੋਨੇ ਦੇ ਗਹਿਣੇ ਅਸਲੀ ਦੱਸ ਕੇ ਪੰਜ ਲੱਖ ਰੁਪਏ ਠੱਗ ਕੇ ਲੈ ਗਏ ਤੇ ਇਸ ਦੇ ਬਾਅਦ ਪੁਲਸ ਨੇ ਫਿਲਹਾਲ ਅਣਪਛਾਤੇ ਲੋਕਾਂ ਉਤੇ ਠੱਗੀ ਦਾ ਕੇਸ ਦਰਜ ਕੀਤਾ ਹੈ। ਥਰਮਲ ਪੁਲਸ ਨੂੰ ਲਹਿਰਾ ਮੁਹੱਬਤ ਦੇ ਦਰਸ਼ਨ ਸਿੰਘ ਨੇ ਦੱਸਿਆ ਕਿ ਉਹ ਖੇਤੀ ਦਾ ਕੰਮ ਕਰਦਾ ਹੈ। ਕਰੀਬ 10 ਦਿਨ ਪਹਿਲਾਂ ਉਸ ਦੇ ਘਰ ਇੱਕ ਅਣਪਛਾਤਾ ਵਿਅਕਤੀ ਆਇਆ, ਜੋ ਹਿੰਦੀ ਬੋਲਦਾ ਸੀ। ਉਸ ਨੇ ਉਸ ਨੂੰ ਕਿਹਾ ਕਿ ਉਹ ਸੜਕਾਂ ਦੀ ਮੁਰੰਮਤ ਦਾ ਕੰਮ ਕਰਦਾ ਹੈ ਅਤੇ ਉਸ ਨੂੰ ਦੇਸੀ ਘਿਓ ਚਾਹੀਦਾ ਹੈ। ਇਸ ਦੌਰਾਨ ਉਕਤ ਵਿਅਕਤੀ ਨੇ ਉਸ ਨੂੰ ਕਿਹਾ ਕਿ ਉਸ ਦੇ ਕੋਲ ਕਰੀਬ ਅੱਧਾ ਕਿਲੋ ਸੋਨਾ ਹੈ, ਜੋ ਉਸ ਨੂੰ ਖੁਦਾਈ ਵਿੱਚ ਮਿਲਿਆ ਹੈ। ਉਸ ਨੂੰ ਪੈਸਿਆਂ ਦੀ ਲੋੜ ਹੈ ਤੇ ਉਹ ਉਸ ਨੂੰ ਘੱਟ ਕੀਮਤ ਵਿੱਚ ਵੇਚਣਾ ਚਾਹੁੰਦਾ ਹੈ। ਉਸ ਵਿਅਕਤੀ ਨੇ ਕਿਹਾ ਕਿ ਅੱਧਾ ਕਿਲੋ ਸੋਨਾ ਪੰਜ ਲੱਖ ਰੁਪਏ ਦਾ ਵੇਚ ਦੇਵੇਗਾ। ਜਾਂਦੇ ਹੋਏ ਉਹ ਵਿਅਕਤੀ ਉਸ ਨੂੰ ਸੋਨੇ ਦੇ ਮਣਕੇ ਵੀ ਦੇ ਗਿਆ।
ਕਿਸਾਨ ਨੇ ਦੱਸਿਆ ਕਿ ਜਦ ਉਸ ਨੇ ਉਕਤ ਸੋਨੇ ਦੇ ਮਣਕੇ ਸੁਨਿਆਰੇ ਨੂੰ ਦਿਖਾਏ ਤਾਂ ਉਸ ਨੇ ਦੱਸਿਆ ਕਿ ਇਹ ਅਸਲੀ ਅਤੇ ਖਰਾ ਸੋਨਾ ਹੈ। ਇਸ ਦੇ ਬਾਅਦ ਉਹ ਸੋਨਾ ਖਰੀਦਣ ਨੂੰ ਤਿਆਰ ਹੋ ਗਿਆ। ਆਪਣਾ ਨਾਂਅ ਮੋਹਨ ਲਾਲ ਦੱਸ ਰਹੇ ਉਸ ਵਿਅਕਤੀ ਦਾ ਉਸ ਕਿਸਾਨ ਨਾਲ ਫੋਨ 'ਤੇ ਸੰਪਰਕ ਰਿਹਾ। ਦੋ ਦਿਨ ਬਾਅਦ ਉਸ ਵਿਅਕਤੀ ਨੇ ਫੋਨ ਕਰ ਕੇ ਕਿਹਾ ਕਿ ਉਹ ਸੋਨਾ ਲੈ ਕੇ ਬਠਿੰਡਾ ਆ ਰਿਹਾ ਹੈ ਤੇ ਉਹ ਪੰਜ ਲੱਖ ਰੁਪਏ ਦਾ ਪ੍ਰਬੰਧ ਕਰ ਕੇ ਥਰਮਲ ਨਹਿਰ ਕੋਲ ਪਹੁੰਚ ਜਾਏ। ਦਰਸ਼ਨ ਸਿੰਘ ਪੰਜ ਲੱਖ ਰੁਪਏ ਦਾ ਪ੍ਰਬੰਧ ਕਰ ਕੇ ਪਤਨੀ ਕੁਲਦੀਪ ਕੌਰ ਨਾਲ ਨਹਿਰ ਦੇ ਕੋਲ ਪਹੁੰਚ ਗਿਆ। ਮੋਹਨ ਲਾਲ ਦੇ ਨਾਲ ਦੋ ਔਰਤਾਂ ਅਤੇ ਇੱਕ ਵਿਅਕਤੀ ਵੀ ਖੜ੍ਹਾ ਸੀ। ਦੋਸ਼ੀਆਂ ਨੇ ਉਸ ਨੂੰ 500 ਗਰਾਮ ਸੋਨੇ ਦੇ ਮਣਕੇ ਦਿਖਾ ਕੇ ਇੱਕ ਪੋਟਲੀ ਵਿੱਚ ਬੰਨ੍ਹ ਕੇ ਦੇ ਦਿੱਤੇ ਅਤੇ ਪੰਜ ਲੱਖ ਰੁਪਏ ਲੈ ਕੇ ਚਲੇ ਗਏ। ਜਦ ਉਨ੍ਹਾਂ ਨੇ ਉਹ ਸੋਨੇ ਦੇ ਮਣਕੇ ਸੁਨਿਆਰੇ ਨੂੰ ਦਿਖਾਏ ਤਾਂ ਸੋਨਾ ਨਕਲੀ ਨਿਕਲਿਆ। ਉਨ੍ਹਾਂ ਨੇ ਸੋਨਾ ਦੇਣ ਵਾਲੇ ਨੂੰ ਫੋਨ ਕੀਤਾ ਤਾਂ ਉਸ ਦਾ ਫੋਨ ਬੰਦ ਸੀ।