ਰਿਆਧ, 18 ਫਰਵਰੀ (ਪੋਸਟ ਬਿਊਰੋ)- ਸਾਊਦੀ ਅਰਬ ਦੀ ਸਰਕਾਰ ਨੇ ਉਸ ਮੋਬਾਈਲ ਐਪ ਦੀ ਸਫਾਈ ਪੇਸ਼ ਕੀਤੀ ਹੈ, ਜਿਸ ਵਿੱਚ ਮਰਦਾਂ ਨੂੰ ਆਪਣੀਆਂ ਬੀਵੀਆਂ ਤੇ ਪਰਵਾਰ ਦੀਆਂ ਹੋਰ ਔਰਤਾਂ ਦੀ ਯਾਤਰਾ ਸਰਗਰਮੀ 'ਤੇ ਨਜ਼ਰ ਰੱਖਣ ਦਾ ਹੱਕ ਦਿੱਤਾ ਗਿਆ ਹੈ। ਇਹ ਐਪ ਨੂੰ ਇਥੋਂ ਦੇ ਗ੍ਰਹਿ ਮੰਤਰਾਲੇ ਨੇ ਬਣਵਾਈ ਹੈ। ਔਰਤ ਅਧਿਕਾਰ ਗਰੁੱਪਾਂ ਤੇ ਇੱਕ ਅਮਰੀਕੀ ਸੈਨੇਟਰ ਵੱਲੋਂ ਇਸ ਦੀ ਆਲੋਚਨਾ ਪਿੱਛੋਂ ਸਾਊਦੀ ਸਰਕਾਰ ਨੇ ਇਸ ਦੇ ਲਾਭ ਗਿਣਾਏ ਹਨ।
ਇਸ ਸੰਬੰਧ ਵਿੱਚ ਸਾਊਦੀ ਅਰਬ ਦੇ ਗ੍ਰਹਿ ਮੰਤਰਾਲੇ ਦਾ ਕਹਿਣਾ ਹੈ ਕਿ ਐਬਸ਼ਰ ਐਪ ਸਾਰੇ ਲੋਕਾਂ ਲਈ ਮੁਫਤ ਹੈ। ਇਹ ਔਰਤਾਂ, ਬਜ਼ੁਰਗਾਂ ਅਤੇ ਹੋਰ ਲੋੜਵੰਦ ਲੋਕਾਂ ਦੀ ਮਦਦ ਲਈ ਹੈ। ਇਸ ਨਾਲ ਪਾਸਪੋਰਟ ਦਾ ਨਵੀਨੀਕਰਨ ਅਤੇ ਵੀਜ਼ਾ ਲਵਾਉਣ ਵਰਗੇ ਕੰਮ ਹੋ ਜਾਂਦੇ ਹਨ। ਵਿਦੇਸ਼ ਯਾਤਰਾ ਨਾਲ ਜੁੜੀਆਂ ਹੋਰ ਸੇਵਾਵਾਂ ਵੀ ਇਸ ਉਤੇ ਮਿਲਦੀਆਂ ਹਨ। ਆਲੋਚਕਾਂ ਦਾ ਕਹਿਣਾ ਹੈ ਕਿ ਇਸ ਐਪ ਨਾਲ ਸਾਊਦੀ ਸਰਕਾਰ ਨੇ ਮਰਦਾਂ ਨੂੰ ਔਰਤਾਂ ਦੀ ਨਿਗਰਾਨੀ ਦਾ ਹੱਕ ਦਿੱਤਾ ਹੈ। ਜਦੋਂ ਔਰਤ ਦੇ ਪਾਸਪੋਰਟ ਦੀ ਕਿਤੇ ਵਰਤੋਂ ਹੁੰਦੀ ਹੈ ਤਾਂ ਉਸ ਦੇ ਸਰਪ੍ਰਸਤ ਮਰਦ ਨੂੰ ਐੱਸ ਐੱਮ ਐੱਸ ਪੁੱਜ ਜਾਂਦਾ ਹੈ। ਉਹ ਚਾਹੇ ਤਾਂ ਔਰਤ ਦੀ ਯਾਤਰਾ ਉੱਤੇ ਰੋਕ ਲਗਵਾ ਸਕਦਾ ਹੈ।
ਅਮਰੀਕੀ ਸੈਨੇਟਰ ਰਾਨ ਵਾਈਡਨ ਨੇ ਗੂਗਲ ਅਤੇ ਐਪਲ ਨੂੰ ਅਪੀਲ ਕੀਤੀ ਹੈ ਕਿ ਉਹ ਆਪਣੇ ਪਲੇਟਫਾਰਮ ਤੋਂ ਇਸ ਐਪ ਦੀ ਸਪੋਰਟ ਹਟਾ ਲੈਣ। ਪਿੱਛੇ ਜਿਹੇ ਇਸ ਐਪ ਦੇ ਸੀ ਈ ਓ ਟਿਮ ਕੁੱਕ ਨੇ ਇਸ ਬਾਰੇ ਸਵਾਲ ਉਤੇ ਕਿਹਾ ਸੀ ਕਿ ਉਨ੍ਹਾਂ ਨੂੰ ਐਬਸ਼ਰ ਦੇ ਬਾਰੇ ਜਾਣਕਾਰੀ ਨਹੀਂ, ਪਰ ਉਹ ਇਸ ਬਾਰੇ ਵਿਚਾਰ ਕਰਨਗੇ।
ਵਰਨਣ ਯੋਗ ਹੈ ਕਿ ਸਾਊਦੀ ਅਰਬ ਵਿੱਚ ਔਰਤਾਂ ਦੀ ਸਥਿਤੀ ਬੇਹੱਦ ਖਰਾਬ ਹੈ। ਇਥੇ ਉਨ੍ਹਾਂ ਨੂੰ ਕੋਈ ਵੀ ਕੰਮ ਕਰਨ, ਨਿਕਾਹ ਕਰਨ ਅਤੇ ਯਾਤਰਾ ਲਈ ਮਰਦ ਸਰਪ੍ਰਸਤ ਦੀ ਆਗਿਆ ਲੈਣੀ ਪੈਂਦੀ ਹੈ। ਨਿਕਾਹ ਤੋਂ ਪਹਿਲਾਂ ਪਿਤਾ ਜਾਂ ਭਰਾ ਸਰਪ੍ਰਸਤ ਦੀ ਭੂਮਿਕਾ ਨਿਭਾਉਂਦੇ ਹਨ ਅਤੇ ਨਿਕਾਹ ਪਿੱਛੋਂ ਪਤੀ ਨੂੰ ਸਰਪ੍ਰਸਤ ਮੰਨਿਆ ਜਾਂਦਾ ਹੈ। ਸਾਲ 2017 ਦੀ ਵਿਸ਼ਵ ਲਿੰਗ ਅਸਮਾਨਤਾ ਰਿਪੋਰਟ ਅਨੁਸਾਰ ਅਸਮਾਨਤਾ ਦੇ ਕੇਸਾਂ ਵਿੱਚ 144 ਦੇਸ਼ਾਂ ਵਿੱਚੋਂ ਸਾਊਦੀ ਅਰਬ 138ਵੇਂ ਸਥਾਨ ਉੱਤੇ ਹੈ। ਸਾਊਦੀ ਅਰਬ ਦੇ ਸ਼ਹਿਜ਼ਾਦੇ ਮੁਹੰਮਦ ਬਿਨ ਸਲਮਾਨ ਨੇ ਪਿਛਲੇ ਸਾਲ ਔਰਤਾਂ ਦੀ ਨਿਗਰਾਨੀ ਦੀ ਇਸ ਵਿਵਸਥਾ ਨੂੰ ਖਤਮ ਕਰਨ ਦੀ ਗੱਲ ਕਹੀ ਸੀ, ਪਰ ਉਹ ਵੀ ਇਸ ਸੰਬੰਧ ਵਿੱਚ ਕੁਝ ਠੋਸ ਨਹੀਂ ਕਰ ਸਕੇ।