ਇਸਲਾਮਾਬਾਦ, 15 ਫਰਵਰੀ (ਪੋਸਟ ਬਿਊਰੋ)- ਸਾਊਦੀ ਅਰਬ ਦੇ ਸ਼ਹਿਜ਼ਾਦੇ ਮੁਹੰਮਦ ਬਿਨ ਸਲਮਾਨ ਨੇ ਪਾਕਿ ਵਿਦੇਸ਼ ਮੰਤਰੀ ਸ਼ਾਹ ਮਹਿਮੂਦ ਕੁਰੈਸ਼ੀ ਨੂੰ ਰੋਲੈਕਸ ਦੀ ਘੜੀ ਸਣੇ 63 ਲੱਖ ਰੁਪਏ ਦੇ ਕੀਮਤੀ ਤੋਹਫੇ ਦੇ ਚੁੱਕੇ ਹਨ।
ਪਾਕਿ ਵਿਦੇਸ਼ ਮੰਤਰਾਲੇ ਨੇ ਸ਼ਨਿਚਰਵਾਰ ਨੂੰ ਸ਼ਹਿਜ਼ਾਦੇ ਦੀ ਪਾਕਿ ਯਾਤਰਾ ਤੋਂ ਪਹਿਲਾ ਇਹ ਜਾਣਕਾਰੀ ਦਿੰਦੇ ਹੋਏ ਦੱਸਿਆ ਕਿ ਇਹ ਤੋਹਫੇ ਕੁਰੈਸ਼ੀ ਦੀ ਪਿਛਲੇ ਸਾਲ ਸਤੰਬਰ ਵਿੱਚ ਖਾੜੀ ਦੇਸ਼ ਦੀ ਯਾਤਰਾ ਸਮੇਂ ਦਿੱਤੇ ਗਏ ਸਨ। ਵਿਦੇਸ਼ ਮੰਤਰਾਲੇ ਨੇ ਕੁਰੈਸ਼ੀ ਨੂੰ ਦਿੱਤੇ ਗਏ 63,50,000 ਰੁਪਏ ਦੇ ਤੋਹਫਿਆਂ ਦੀ ਜਾਣਕਾਰੀ ਦਿੱਤੀ। ਡਾਨ ਨਿਊਜ਼ ਨੇ ਵਿਦੇਸ਼ ਮੰਤਰਾਲੇ ਦੇ ਦਸਤਾਵੇਜ਼ਾਂ ਦੇ ਹਵਾਲੇ ਨਾਲ ਦੱਸਿਆ ਕਿ ਕੁਰੈਸ਼ੀ ਨੇ ਤੋਸ਼ਖਾਨਾ ਵਿੱਚ ਸ਼ਹਿਜ਼ਾਦੇ ਸਲਮਾਨ ਵੱਲੋਂ ਮਿਲੇ ਲੱਖਾਂ ਰੁਪਏ ਦੇ ਤੋਹਫੇ ਜਮ੍ਹਾ ਕਰਾਏ ਹਨ। ਇਨ੍ਹਾਂ ਦਸਤਾਵੇਜ਼ਾਂ ਦੇ ਮੁਤਾਬਕ ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਦੀ 19 ਸਤੰਬਰ 2018 ਦੀ ਯਾਤਰਾ ਦੇ ਦੌਰਾਨ ਵਿਦੇਸ਼ ਮੰਤਰੀ ਨੂੰ ਇਹ ਤੋਹਫੇ ਦਿੱਤੇ ਗਏ ਸਨ। ਦਸਤਾਵੇਜ਼ਾਂ ਦੇ ਅਨੁਸਾਰ, ‘ਕੁਰੈਸ਼ੀ ਨੂੰ ਰੋਲੈਕਸ ਦੀ ਇਕ ਘੜੀ, ਹੀਰਿਆਂ ਨਾਲ ਜੜਿਆ ਸੋਨੇ ਦਾ ਇਕ ਪੈਨ, ਸੋਨੇ ਦੇ ਇਕ ਜੋੜੀ ਕਫ ਲਿੰਕ, ਕੀਮਤੀ ਹੀਰਿਆਂ ਨਾਲ ਜੜੀ ਸੋਨੇ ਦੀ ਚੇਨ (ਤਸਬੀਹ) ਅਤੇ ਸੋਨੇ ਦੀ ਇਕ ਅੰਗੂਠੀ ਮਿਲੀ।