ਵਾਸ਼ਿੰਗਟਨ, 15 ਫਰਵਰੀ (ਪੋਸਟ ਬਿਊਰੋ)- ਅਮਰੀਕਾ ਵਿੱਚ ਵੀਜ਼ਾ ਫਰਾਡ ਵਿੱਚ ਫਸੇ 19 ਭਾਰਤੀ ਵਿਦਿਆਰਥੀਆਂ ਨੂੰ ਦੇਸ਼ ਮੁੜਨ ਦੀ ਇਜਾਜ਼ਤ ਦੇ ਦਿੱਤੀ ਗਈ ਹੈ। ਇਕ ਸਥਾਨਕ ਕੋਰਟ ਨੇ ਇਨ੍ਹਾਂ ਵਿਦਿਆਰਥੀਆਂ ਨੂੰ ਉਨ੍ਹਾਂ ਦੇ ਆਪਣੇ ਦੇਸ਼ ਮੁੜਨ ਦੇ ਲਈ ਮਨਜ਼ੂਰੀ ਦੇ ਦਿੱਤੀ ਹੈ। 19 ਭਾਰਤੀ ਵਿਦਿਆਰਥੀਆਂ ਦੇ ਨਾਲ ਇਕ ਫਲਸਤੀਨੀ ਵਿਦਿਆਰਥੀ ਨੂੰ ਵੀ ਦੇਸ਼ ਮੁੜਨ ਦੀ ਇਜਾਜ਼ਤ ਮਿਲ ਗਈ ਹੈ।
ਵਰਨਣ ਯੋਗ ਹੈ ਕਿ ਪਿਛਲੇ ਦਿਨੀਂ ਅਮਰੀਕੀ ਰਾਜ ਮਿਸ਼ੀਗਨ ਦੀ ਪੁਲਸ ਨੇ ਇਕ ਫਰਜ਼ੀ ਯੂਨੀਵਰਸਿਟੀ ਦੇ ਜ਼ਰੀਏ ਵੀਜ਼ਾ ਧੋਖਾਧੜੀ ਦਾ ਪਰਦਾ ਫਾਸ਼ ਕੀਤਾ ਸੀ। ਪੁਲਸ ਨੇ ਇਸ ਯੂਨੀਵਰਸਿਟੀ ਵਿੱਚ ਦਾਖਲੇ ਦੇ ਨਾਮ 'ਤੇ ਟੂਰਿਸਟ ਵੀਜ਼ਾ ਰੈਕੇਟ ਦਾ ਪਰਦਾ ਫਾਸ਼ ਕੀਤਾ ਸੀ ਅਤੇ 129 ਭਾਰਤੀ ਸਮੇਤ 130 ਵਿਦੇਸ਼ੀ ਵਿਦਿਆਰਥੀਆਂ ਨੂੰ ਗ੍ਰਿਫਤਾਰ ਕੀਤਾ ਸੀ। ਜਿਨ੍ਹਾਂ ਵਿਦਿਆਰਥੀਆਂ ਨੂੰ ਦੇਸ਼ ਮੁੜਨ ਦੀ ਮਨਜ਼ੂਰੀ ਮਿਲੀ ਹੈ, ਉਹ ਦੱਖਣੀ ਭਾਰਤੀ ਹਨ। 20 ਵਿਦਿਆਰਥੀਆਂ ਨੂੰ 31 ਜਨਵਰੀ ਨੂੰ ਇਥੇ ਦੋ ਹਿਰਾਸਤ ਕੇਂਦਰਾਂ ਵਿੱਚ ਰੱਖਿਆ ਗਿਆ ਹੈ। ਅਮੇਰੀਕਨ ਤੇਲੰਗਾਨਾ ਐਸੋਸੀਏਸ਼ਨ (ਏ ਟੀ ਏ-ਤੇਲੰਗਾਨਾ) ਦੇ ਪ੍ਰਤੀਨਿਧੀ ਵੇਂਕਟ ਮਨਥੇਨਾ ਨੇ ਦੱਸਿਆ ਕਿ ਇਕ ਵਿਦਿਆਰਥੀ ਦਾ ਵਿਆਹ ਅਮਰੀਕੀ ਨਾਗਰਿਕ ਨਾਲ ਹੋਇਆ ਹੈ। ਇਹ ਵਿਦਿਆਰਥੀ ਅਮਰੀਕਾ ਵਿੱਚ ਰੁਕ ਕੇ ਆਪਣਾ ਕੇਸ ਖੁਦ ਲੜਨਾ ਚਾਹੁੰਦਾ ਸੀ, ਬਾਕੀ ਵਿਦਿਆਰਥੀਆਂ ਨੂੰ ਅਮਰੀਕਾ ਛੱਡਣ ਦੀ ਆਗਿਆ ਦੇ ਦਿੱਤੀ ਗਈ ਹੈ। ਇਨ੍ਹਾਂ ਵਿਦਿਆਰਥੀਆਂ ਨੂੰ ‘ਯੂ ਐਸ ਗਵਰਨਮੈਂਟ ਰਿਮੂਵਨ' ਆਰਡਰ ਦੇ ਤਹਿਤ ਭਾਰਤ ਜਾਣ ਦੀ ਆਗਿਆ ਮਿਲੀ ਹੈ।