ਵਾਲਸਾੜ, 14 ਫਰਵਰੀ (ਪੋਸਟ ਬਿਊਰੋ)- ਕਾਂਗਰਸ ਪਾਰਟੀ ਦੇ ਪ੍ਰਧਾਨ ਰਾਹੁਲ ਗਾਂਧੀ ਇਸ ਵਕਤ ਗੁਜਰਾਤ ਦੌਰੇ ਉੱਤੇ ਹਨ ਅਤੇ ਉਨ੍ਹਾਂ ਨੇ ਵਾਲਸਾੜ ਵਿੱਚ ਇਕ ਚੋਣ ਰੈਲੀ ਨੂੰ ਸੰਬੋਧਨ ਕੀਤਾ ਹੈ। ਇਸ ਰੈਲੀ ਵਿਚ ਮੰਚ ਉੱਤੇ ਮਹਿਲਾ ਵਰਕਰਾਂ ਨੂੰ ਰਾਹੁਲ ਦਾ ਸਵਾਗਤ ਕਰਨ ਨੂੰ ਸੱਦਿਆ ਗਿਆ ਸੀ। ਜਦੋਂ ਇਹ ਮਹਿਲਾ ਵਰਕਰ ਮੰਚ ਉੱਤੇ ਫੁੱਲਾਂ ਦਾ ਹਾਰ ਦੇਣ ਲਈ ਪੁੱਜੀਆਂ ਤਾਂ ਉਨ੍ਹਾਂ ਵਿੱਚੋਂ ਇਕ ਮਹਿਲਾ ਵਰਕਰ ਨੇ ਰਾਹੁਲ ਗਾਂਧੀ ਨੂੰ ਫੜ ਕੇ ਗੱਲ੍ਹ ਉੱਤੇ ਕਿੱਸ ਕਰ ਲਿਆ। ਉਸ ਦੀ ਇਸ ਹਰਕਤ ਤੋਂ ਬਾਅਦ ਰਾਹੁਲ ਗਾਂਧੀ ਕੁਝ ਨਾ ਕਹਿ ਸਕੇ ਤੇ ਮੁਸਕਰਾਉਂਦੇ ਹੋਏ ਉਸ ਦਾ ਧੰਨਵਾਦ ਕੀਤਾ। ਇਸ ਪਿੱਛੋਂ ਮੰਚ ਉੱਤੇ ਮਹਿਲਾ ਵਰਕਰਾਂ ਨੇ ਰਾਹੁਲ ਨੂੰ ਹਾਰ ਪਹਿਨਾਏ ਤੇ ਕਾਂਗਰਸ ਦੇ ਸਮਰਥਨ ਵਿੱਚ ਨਾਅਰੇ ਲਾਏ।
ਪਤਾ ਲੱਗਾ ਹੈ ਕਿ ਰਾਹੁਲ ਗਾਂਧੀ ਨੂੰ ਕਿੱਸ ਕਰਨ ਵਾਲੀ ਮਹਿਲਾ ਵਰਕਰ ਦਾ ਨਾਂਅ ਕਸ਼ਮੀਰਾ ਮੁੰਸ਼ੀ ਹੈ ਅਤੇ ਉਹ ਏਥੇ ਮਹਿਲਾ ਕਾਂਗਰਸ ਦੀ ਪ੍ਰਧਾਨ ਰਹਿ ਚੁੱਕੀ ਹੈ। ਮੁੰਸ਼ੀ ਦੇ ਗਾਂਧੀ ਪਰਿਵਾਰ ਨਾਲ ਪੁਰਾਣੇ ਰਿਸ਼ਤੇ ਸਨ। ਵਰਨਣ ਯੋਗ ਹੈ ਕਿ ਰਾਹੁਲ ਗੁਜਰਾਤ ਤੋਂ ਚੋਣ ਮੁਹਿੰਮ ਸ਼ੁਰੂ ਕਰ ਰਹੇ ਹਨ। ਗੁਜਰਾਤ ਦਾ ਪਿੰਡ ਲਾਲ ਡੂੰਗਰੀ ਕਾਂਗਰਸ ਪਾਰਟੀ ਦੇ ਲਈ ਕਾਫੀ ਮਹੱਤਵ ਰੱਖਦਾ ਹੈ, ਕਿਉਂਕਿ ਇੱਥੋਂ ਉਨ੍ਹਾਂ ਦੀ ਦਾਦੀ ਇੰਦਰਾ ਗਾਂਧੀ, ਉਨ੍ਹਾਂ ਦੇ ਪਿਤਾ ਰਾਜੀਵ ਗਾਂਧੀ ਤੇ ਮਾਂ ਸੋਨੀਆ ਗਾਂਧੀ ਨੇ ਵੀ ਕਿਸੇ ਸਮੇਂ ਚੋਣ ਮੁਹਿੰਮ ਦੀ ਸ਼ੁਰੂਆਤ ਕੀਤੀ ਸੀ।