ਚੰਡੀਗੜ੍ਹ, 14 ਫਰਵਰੀ (ਪੋਸਟ ਬਿਊਰੋ)- ਪੰਜਾਬ ਦੀ ਟਰਾਂਸਪੋਰਟ ਮੰਤਰੀ ਅਰੁਣਾ ਚੌਧਰੀ ਨੇ ਕੱਲ੍ਹ ਵਿਧਾਨ ਸਭਾ ਵਿੱਚ ਆਮ ਆਦਮੀ ਪਾਰਟੀ ਦੀ ਦਿੱਲੀ ਸਰਕਾਰ 'ਤੇ ਗੰਭੀਰ ਦੋਸ਼ ਲਾਇਆ ਕਿ ਉਸ ਨੇ ਆਰਬਿਟ ਬਸ ਸਰਵਿਸ ਦੇ ਨਾਲ ਮਿਲ ਕੇ ਦਿੱਲੀ ਏਅਰਪੋਰਟ ਜਾਂਦੀਆਂ ਪੰਜਾਬ ਦੀਆਂ ਪੈਪਸੂ ਰੋਡ ਟਰਾਂਸਪੋਰਟ ਕਾਰਪੋਰੇਸ਼ਨ ਅਤੇ ਪੰਜਾਬ ਰੋਡਵੇਜ਼ ਦੀਆਂ ਬਸਾਂ ਨੂੰ ਬੰਦ ਕਰਵਾ ਦਿੱਤਾ ਹੈ, ਜਦ ਕਿ ਪ੍ਰਾਈਵੇਟ ਕੰਪਨੀ ਆਰਬਿਟ ਦੀਆਂ ਬਸਾਂ ਚਲਾਈਆਂ ਜਾ ਰਹੀਆਂ ਹਨ।
ਇਸ ਸੰਬੰਧ ਵਿੱਚ ਮੰਤਰੀ ਅਰੁਣਾ ਚੌਧਰੀ ਨੇ ਕਿਹਾ ਕਿ ਅਸੀਂ ਪੀ ਆਰ ਟੀ ਸੀ ਦੀਆਂ ਬਸਾਂ ਨੂੰ ਟੂਰਿਸਟ ਦੇ ਰੂਪ ਵਿੱਚ ਭੇਜਣ ਦਾ ਦਿੱਲੀ ਸਰਕਾਰ ਨੂੰ ਪ੍ਰਸਤਾਵ ਦਿੱਤਾ, ਪ੍ਰੰਤੂ ਉਸ ਨੇ ਨਹੀਂ ਮੰਨਿਆ। ਅਰੁਣਾ ਚੌਧਰੀ ਦੇ ਇੰਨਾ ਕਹਿੰਦੇ ਹੀ ਆਮ ਆਦਮੀ ਪਾਰਟੀ ਦੇ ਵਿਧਾਇਕਾਂ ਨੇ ਸਦਨ ਵਿੱਚ ਹੰਗਾਮਾ ਸ਼ੁਰੂ ਕਰ ਦਿੱਤਾ ਅਤੇ ਵੈੱਲ ਵਿੱਚ ਆ ਕੇ ਪ੍ਰਦਰਸ਼ਨ ਕੀਤਾ। ਵਰਨਣ ਯੋਗ ਹੈ ਕਿ ਆਰਬਿਟ ਬਸ ਕੰਪਨੀ ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੇ ਪਰਵਾਰ ਦੀ ਹੈ ਅਤੇ ਜਦ ਅਰੁਣਾ ਚੌਧਰੀ ਇਹ ਦੋਸ਼ ਲਾ ਰਹੀ ਸੀ ਤਾਂ ਉਸ ਸਮੇਂ ਬਾਦਲ ਖੁਦ ਵੀ ਵਿਧਾਨ ਸਭਾ ਵਿੱਚ ਮੌਜੂਦ ਸਨ।
ਇਸ ਤੋਂ ਇਲਾਵਾ ਪ੍ਰਸ਼ਨ ਕਾਲ ਦੌਰਾਨ ਆਮ ਆਦਮੀ ਪਾਰਟੀ ਵੱਲੋਂ ਵਿਰੋਧੀ ਧਿਰ ਦੇ ਨੇਤਾ ਹਰਪਾਲ ਸਿੰਘ ਚੀਮਾ ਨੇ ਮੰਤਰੀ 'ਤੇ ਦੋਸ਼ ਲਾਇਆ ਕਿ ਪੀ ਆਰ ਟੀ ਸੀ ਅਤੇ ਰੋਡਵੇਜ਼ ਦੀਆਂ 600 ਨਵੀਆਂ ਬਸਾਂ ਨਹੀਂ ਪਾਈਆਂ ਜਾ ਰਹੀਆਂ, ਮੰਤਰੀ ਫਾਈਲ ਦਬਾ ਕੇ ਬੈਠੀ ਹੈ ਤਾਂ ਕਿ ਉਹ ਆਪਣੇ ਲੋਕਾਂ ਨੂੰ ਪ੍ਰਾਈਵੇਟ ਬਸਾਂ ਦੇ ਰੂਟ ਦੇ ਲੈਣ। ਲੋਕ ਇਨਸਾਫ ਪਾਰਟੀ ਦੇ ਸਿਮਰਜੀਤ ਬੈਂਸ ਨੇ ਵੀ ਕਿਹਾ ਕਿ ਪੀ ਆਰ ਟੀ ਸੀ ਅਤੇ ਰੋਡਵੇਜ਼ ਦੀਆਂ ਬਸਾਂ ਨੂੰ ਬੰਦ ਕਰਵਾਇਆ ਜਾ ਰਿਹਾ ਹੈ, ਪਰ ਆਰਬਿਟ ਕੰਪਨੀ ਦੀਆਂ ਬਸਾਂ ਸਿੱਧਾ ਏਅਰਪੋਰਟ ਜਾਂਦੀਆਂ ਹਨ। ਮੰਤਰੀ ਨੇ ਇਨ੍ਹਾਂ ਦੋਸ਼ਾਂ ਦੇ ਜਵਾਬ ਵਿੱਚ ਕਿਹਾ ਕਿ ਸਰਕਾਰ ਏਅਰਪੋਰਟ ਤੱਕ ਸਿੱਧੀਆਂ ਬਸਾਂ ਚਲਾਉਣਾ ਚਾਹੁੰਦੀ ਹੈ, ਪਰ ਦਿੱਲੀ ਸਰਕਾਰ ਨੇ ਆਰਬਿਟ ਦੇ ਨਾਲ ਮਿਲ ਕੇ ਸਾਡੀਆਂ ਬਸਾਂ ਨੰ ਬੰਦ ਕਰਵਾ ਦਿੱਤਾ ਹੈ। ਆਮ ਆਦਮੀ ਪਾਰਟੀ ਦੇ ਵਿਧਾਇਕ ਅਮਨ ਅਰੋੜਾ ਨੇ ਕਿਹਾ ਕਿ 2001 ਦੇ ਬਾਅਦ ਪੰਜਾਬ ਸਰਕਾਰ ਨੇ ਦਿੱਲੀ ਸਰਕਾਰ ਨਾਲ ਬਸਾਂ ਦੇ ਆਉਣ-ਜਾਣ ਬਾਰੇ ਕੋਈ ਸਮਝੌਤਾ ਹੀ ਨਹੀਂ ਕੀਤਾ। ਉਨ੍ਹਾਂ ਨੇ ਦੱਸਿਆ ਕਿ ਦੋ ਤਰ੍ਹਾਂ ਦੇ ਪਰਮਿਟ ਹੰੁਦੇ ਹਨ, ਪਹਿਲੇ ਕੰਟ੍ਰੈਕਟ ਕਰੀਅਰ, ਜਿਸ ਵਿੱਚ ਇੱਕ ਸਪਾਟ ਤੋਂ ਦੂਸਰੇ ਸਪਾਟ ਤੱਕ ਬਸਾਂ ਚੱਲਦੀਆਂ ਹਨ ਤੇ ਵਿਚਾਲੇ ਕੋਈ ਸਵਾਰੀ ਨਹੀਂ ਚੁੱਕੀ ਜਾਂਦੀ। ਦੂਸਰੇ ਸਟੇਟ ਕਰੀਅਰ ਜਿਸ ਵਿੱਚ ਬਸਾਂ ਬਸ ਸਟੈਂਡ ਵਿੱਚ ਜਾਂਦੀਆਂ ਤੇ ਰਸਤੇ ਵਿੱਚ ਸਵਾਰੀਆਂ ਚੁੱਕਦੀਆਂ ਹਨ। ਉਨ੍ਹਾਂ ਨੇ ਕਿਹਾ ਕਿ ਆਰਬਿਟ ਦੀਆਂ ਬਸਾਂ ਕੰਟ੍ਰੈਕਟ ਕਰੀਅਰ ਨਾਲ ਚਲਦੀਆਂ ਹਨ, ਪ੍ਰੰਤੂ ਆਨਲਾਈਨ ਬੁਕਿੰਗ ਦੇ ਕਾਰਨ ਇਹ ਰਸਤੇ 'ਚੋਂ ਵੀ ਸਵਾਰੀਆਂ ਚੁੱਕਦੇ ਹਨ।