ਸੁਸ਼ਾਂਤ ਸਿੰਘ ਰਾਜਪੂਤ ਦੀ ਫਿਲਮ ‘ਕਿਜੀ ਅਤੇ ਮੈਨੀ’ ਦਾ ਨਾਂਅ ਬਦਲ ਕੇ ‘ਦਿਲ ਬੇਚਾਰਾ' ਕਰ ਦਿੱਤਾ ਗਿਆ ਹੈ। ਹਾਲੀਵੁੱਡ ਫਿਲਮ ‘ਦਿ ਫਾਲਟ ਇਨ ਆਵਰ ਸਟਾਰਸ’ ਉਤੇ ਆਧਾਰਤ ਇਸ ਫਿਲਮ ਵਿੱਚ ਸੁਸ਼ਾਂਤ ਸਿੰਘ ਰਾਜਪੂਤ ਦੇ ਆਪੋਜ਼ਿਟ ਨਵੋਦਿਤ ਅਭਿਨੇਤਰੀ ਸੰਜਨਾ ਸਾਂਘੀ ਹੈ।ੇ ਨਾਂਅ ਬਦਲਣ ਦੀ ਪ੍ਰੋਡਕਸ਼ਨ ਹਾਊਸ ਨੇ ਕੋਈ ਵਜ੍ਹਾ ਨਹੀਂ ਦੱਸੀ।
ਸੂਤਰਾਂ ਅਨੁਸਾਰ ਕਾਫੀ ਵਿਚਾਰ-ਵਟਾਂਦਰੇ ਪਿੱਛੋਂ ਫਿਲਮ ਦਾ ਨਾਂਅ ਬਦਲਿਆ ਹੈ। ਨਿਰਮਾਤਾਵਾਂ ਨੇ ਸਿਰਲੇਖ ਨੂੰ ਕਹਾਣੀ ਨਾਲ ਸੰਬੰਧਤ ਰੱਖਣ ਲਈ ਇਹ ਫੈਸਲਾ ਕੀਤਾ ਹੈ। ‘ਕਿਜੀ ਅਤੇ ਮੈਨੀ’ ਸੁਣਨ ਵਿੱਚ ਚੰਗਾ ਤੇ ਪਿਆਰਾ ਸਿਰਲੇਖ ਹੈ, ਪਰ ‘ਦਿਲ ਬੇਚਾਰਾ’ ਇਸ ਦੇ ਮੁਕਾਬਲੇ ਵੱਧ ਦੇਸੀ ਲੱਗ ਰਿਹਾ ਹੈ। ਦੱਸਣਾ ਬਣਦਾ ਹੈ ਕਿ ਫਿਲਮ ਦੀ ਸ਼ੂਟਿੰਗ ਪਿਛਲੇ ਸਾਲ ਜੁਲਾਈ ਵਿੱਚ ਸ਼ੁਰੂ ਹੋਈ ਸੀ। ਕਾਸਟਿੰਗ ਡਾਇਰੈਕਟਰ ਮੁਕੇਸ਼ ਛਾਬੜਾ ਇਸ ਫਿਲਮ ਨਾਲ ਨਿਰਦੇਸ਼ਨ ਵਿੱਚ ਕਦਮ ਰੱਖ ਰਹੇ ਹਨ। ਮੀ ਟੂ ਮੁਹਿੰਮ ਦੇ ਕਾਰਨ ਮੁਕੇਸ਼ ਨੂੰ ਫਿਲਮ ਵਿੱਚੋਂ ਕੁਝ ਸਮੇਂ ਲਈ ਬਾਹਰ ਕਰ ਦਿੱਤਾ ਗਿਆ ਸੀ। ਬਾਅਦ ਵਿੱਚ ਉਸ ਦੇ ਖਿਲਾਫ ਅੰਦਰੂਨੀ ਸ਼ਿਕਾਇਤ ਕਮੇਟੀ ਦੀ ਜਾਂਚ ਦੇ ਬਾਅਦ ਉਸ ਨੂੰ ਨਿਰਦੇਸ਼ਨ ਦੀ ਵਾਗਡੋਰ ਦੁਬਾਰਾ ਸੌਂਪ ਦਿੱਤੀ ਗਈ ਸੀ। ਹਾਲ ਹੀ ਵਿੱਚ ਫਿਲਮ ਦੀ ਸਟਾਰਕਾਸਟ ਪੈਰਿਸ ਵਿੱਚ ਫਿਲਮ ਦਾ ਅਹਿਮ ਅਤੇ ਆਖਰੀ ਹਿੱਸਾ ਸ਼ੂਟ ਕਰ ਕੇ ਵਾਪਸ ਮੁੜੀ ਹੈ। ਦੱਸਿਆ ਜਾਂਦਾ ਹੈ ਕਿ ਸੈਫ ਅਲੀ ਖਾਨ ਨੇ ਵੀ ਉਨ੍ਹਾਂ ਨੂੰ ਉਥੇ ਜੁਆਇਨ ਕੀਤਾ ਸੀ।