ਅੱਜ ਬਾਲੀਵੁੱਡ ਦੀ ਨੰਬਰ ਵੰਨ ਹੀਰੋਇਨ ਮੰਨੀ ਜਾਣ ਵਾਲੀ ਦੀਪਿਕਾ ਦੀ ਆਕਰਸ਼ਕ ਸ਼ਖਸੀਅਤ ਇੱਕ ਅਜਿਹੀ ਚੀਜ਼ ਹੈ, ਜੋ ਉਸ ਨੂੰ ਹੋਰ ਬਾਲੀਵੁੱਡ ਸੁੰਦਰੀਆਂ ਤੋਂ ਜੁਦਾ ਕਰਦੀ ਹੈ। ਇਹੀ ਵਜ੍ਹਾ ਹੈ ਕਿ ਉਸ ਨੂੰ ਫਿਲਮ ਇੰਡਸਟਰੀ 'ਚ ਅੱਜ ਕਈ ਹੀਰੋਜ਼ ਤੋਂ ਵੀ ਜ਼ਿਆਦਾ ਫੀਸ ਮਿਲ ਰਹੀ ਹੈ। ਹਰ ਫਿਲਮ ਨਿਰਦੇਸ਼ਕ ਨੂੰ ਉਸ 'ਤੇ ਭਰੋਸਾ ਹੈ ਤੇ ਸ਼ਾਇਦ ਹੀ ਕੋਈ ਨਿਰਦੇਸ਼ਕ ਹੋਵੇਗਾ, ਜੋ ਉਸ ਨੂੰ ਆਪਣੀ ਫਿਲਮ 'ਚ ਨਾ ਲੈਣਾ ਚਾਹੇਗਾ।
ਪਿਛਲੇ ਸਾਲ ਦੀਪਿਕਾ ਨੇ ਇੱਕ ਹੋਰ ਵੱਡੀ ਪ੍ਰਾਪਤੀ ਆਪਣੇ ਨਾਂਅ ਕੀਤੀ ਹੈ ਕਿਉਂਕਿ ਉਹ ਬਾਲੀਵੁੱਡ ਦੀ ਸਭ ਤੋਂ ਜ਼ਿਆਦਾ ਬਰਾਂਡ ਵੈਲਿਊ ਵਾਲੀ ਫਿਲਮ ਸਟਾਰ ਬਣ ਗਈ ਹੈ। ਉਸ ਦੀ ਇਹ ਉਪਲਬਧੀ ਇਸ ਲਈ ਹੋਰ ਵੀ ਖਾਸ ਹੈ ਕਿ ਉਸ ਨੇ ਬਾਲੀਵੁੱਡ ਦੀ ਖਾਨ ਤਿੱਕੜੀ (ਸਲਮਾਨ-ਸ਼ਾਹਰੁਖ-ਆਮਿਰ) ਨੂੰ ਪਿੱਛੇ ਛੱਡ ਦਿੱਤਾ ਹੈ। ਇਸ ਬਾਰੇ ਉਸ ਦੀ ਰਾਇ ਪੁੱਛੇ ਜਾਣ 'ਤੇ ਉਹ ਕਹਿੰਦੀ ਹੈ, ‘‘ਪਿਛਲਾ ਸਾਲ ਮੇਰੇ ਲਈ ਪ੍ਰੋਫੈਸ਼ਨਲੀ ਤੇ ਪ੍ਰਸਨਲੀ ਖਾਸ ਰਿਹਾ ਹੈ। ਮੇਰੇ ਲਈ ਸਿਰਫ ਇਸ ਲਿਸਟ ਦਾ ਹਿੱਸਾ ਬਣਨਾ ਹੀ ਬੜੀ ਖੁਸ਼ੀ ਦੀ ਗੱਲ ਹੈ। ਆਪਣਾ ਨਾਂਅ ਲਿਸਟ 'ਚ ਟੌਪ 'ਤੇ ਦੇਖਣਾ ਕਾਫੀ ਖੁਸ਼ੀ ਦੀ ਗੱਲ ਹੈ। ਇਹ ਜਾਣ ਕੇ ਚੰਗਾ ਅਹਿਸਾਸ ਹੁੰਦਾ ਹੈ ਕਿ ਲੋਕ ਤੁਹਾਡੀ ਮਿਹਨਤ ਤੇ ਲਗਨ ਨੂੰ ਸਮਝ ਰਹੇ ਹਨ। ਲੋਕ ਤੁਹਾਡੇ ਕੰਮ ਦੀ ਵੈਲਿਊ ਨੂੰ ਸਮਝ ਰਹੇ ਹਨ।”
ਜ਼ਿਕਰ ਯੋਗ ਹੈ ਕਿ ਸਾਲ 2018 ਲਈ ਜਾਰੀ ਭਾਰਤ ਦੇ ਸਭ ਤੋਂ ਜ਼ਿਆਦਾ ਬ੍ਰਾਂਡ ਵੈਲਿਊ ਵਾਲੇ ਸੈਲੀਬ੍ਰਿਟੀਜ਼ ਦੀ ਲਿਸਟ 'ਚ ਦੀਪਿਕਾ ਦੂਜੇ ਨੰਬਰ 'ਤੇ ਰਹੀ ਹੈ। ਉਸ ਤੋਂ ਅੱਗੇ ਸਿਰਫ ਭਾਰਤੀ ਕ੍ਰਿਕਟ ਟੀਮ ਦਾ ਕਪਤਾਨ ਵਿਰਾਟ ਕੋਹਲੀ ਹੈ। ਦੀਪਿਕਾ ਦੀ ਪਿਛਲੀ ਫਿਲਮ ‘ਪਦਮਾਵਤ’ ਸਾਲ 2018 ਵਿੱਚ ਰਿਲੀਜ਼ ਹੋਈ ਸੀ। ਇਸ 'ਚ ਦੀਪਿਕਾ ਨੇ ਮਹਾਰਾਣੀ ਪਦਮਾਵਤੀ ਦਾ ਕਿਰਦਾਰ ਨਿਭਾਇਆ ਸੀ। ਇਸ ਪਿੱਛੋਂ ਸਾਲ 2018 ਦੇ ਅਖੀਰ 'ਚ ਉਸ ਨੇ ਛੇ ਸਾਲ ਤੋਂ ਲੰਬੇ ਰੋਮਾਂਸ ਤੋਂ ਬਾਅਦ ਵਿਆਹ ਕਰ ਲਿਆ ਸੀ। ਵਿਆਹ ਤੋਂ ਬਾਅਦ ਉਹ ਫਿਰ ਤੋਂ ਪ੍ਰੈਫਸ਼ਨਲ ਲਾਈਫ ਵੱਲ ਧਿਆਨ ਦੇ ਰਹੀ ਹੈ। ਉਹ ਮੇਘਨਾ ਗੁਲਜ਼ਾਰ ਦੀ ਫਿਲਮ ‘ਛਪਾਕ’ ਵਿੱਚ ਨਜ਼ਰ ਆਏਗੀ। ਫਿਲਮ ਵਿੱਚ ਉਹ ਐਸਿਡ ਅਟੈਕ ਸਰਵਾਈਵਰ ਲਕਸ਼ਮੀ ਅਗਰਵਾਲ ਦਾ ਕਿਰਦਾਰ ਨਿਭਾਉਂਦੀ ਨਜ਼ਰ ਆਏਗੀ।