ਲੰਡਨ, 11 ਫਰਵਰੀ (ਪੋੋਸਟ ਬਿਊਰੋ) : ਬ੍ਰਿਟਿਸ਼ ਪ੍ਰਧਾਨ ਮੰਤਰੀ ਥੈਰੇਸਾ ਮੇਅ ਵਿਰੋਧੀ ਧਿਰ ਦੇ ਆਗੂ ਜੈਰੇਮੀ ਕੌਰਬਿਨ ਨਾਲ ਸਮਝੌਤਾ ਕਰਨ ਦੇ ਰੌਂਅ ਵਿੱਚ ਹੈ। ਅਜਿਹਾ ਇਸ ਲਈ ਕੀਤਾ ਜਾ ਰਿਹਾ ਹੈ ਤਾਂ ਕਿ ਯੂਰਪੀਅਨ ਯੂਨੀਅਨ ਤੋਂ ਤੋੜ ਵਿਛੋੜਾ ਕੀਤਾ ਜਾ ਸਕੇ।
ਨਿਆਂ ਮੰਤਰੀ ਰੋਰੀ ਸਟਵਾਰਟ ਨੇ ਸੋਮਵਾਰ ਨੂੰ ਦੱਸਿਆ ਕਿ ਦੋਵਾਂ ਆਗੂਆਂ ਵਿਚਾਲੇ ਮਤਭੇਦ ਓਨੇ ਗੁੜ੍ਹੇ ਨਹੀਂ ਹਨ ਜਿੰਨੇ ਕਿ ਕਈ ਹੋਰਨਾਂ ਲੋਕਾਂ ਵੱਲੋਂ ਪ੍ਰਚਾਰੇ ਜਾ ਰਹੇ ਹਨ। ਪਰ ਸਰਕਾਰ ਉਸ ਫੈਸਲੇ ਨੂੰ ਮੰਨਣ ਲਈ ਤਿਆਰ ਨਹੀਂ ਹੈ ਜਿਸ ਤਹਿਤ ਬ੍ਰਿਟੇਨ ਨੂੰ ਹੋਰਨਾਂ ਮੁਲਕਾਂ ਨਾਲ ਕਾਰੋਬਾਰੀ ਸਮਝੌਤੇ ਕਰਨ ਤੋਂ ਰੋਕਿਆ ਜਾ ਸਕਦਾ ਸੀ। ਉਨ੍ਹਾਂ ਆਖਿਆ ਕਿ ਮੇਅ ਦਾ ਸਮਝੌਤਾ ਉਹ ਡੀਲ ਹਾਸਲ ਕਰਨ ਵਿੱਚ ਜੈਰੇਮੀ ਕੌਰਬਿਨ ਦੀ ਮਦਦ ਕਰ ਸਕਦਾ ਹੈ ਜਿਸ ਵਿੱਚ ਉਨ੍ਹਾਂ ਨੂੰ ਦਿਲਚਸਪੀ ਹੈ।
ਜਿ਼ਕਰਯੋਗ ਹੈ ਕਿ ਬ੍ਰਿਟੇਨ ਦਾ 29 ਮਾਰਚ ਨੂੰ ਯੂਰਪੀਅਨ ਯੂਨੀਅਨ ਨੂੰ ਅਲਵਿਦਾ ਆਖਣਾ ਤੈਅ ਸੀ ਪਰ ਪਾਰਲੀਆਮੈਂਟ ਨੇ ਮੇਅ ਦੀ ਤੋੜ ਵਿਛੋੜੇ ਵਾਲੀ ਇਸ ਡੀਲ ਤੋਂ ਇਨਕਾਰ ਕਰ ਦਿੱਤਾ। ਯੁਰਪੀਅਨ ਯੂਨੀਅਨ ਨੇ ਖੁਦ ਨਾਲੋਂ ਵੱਖ ਹੋਣ ਵਾਲੇ ਮੁੱਦੇ ਸਬੰਧੀ ਕਾਨੂੰਨੀ ਸ਼ਰਤਾਂ ਵਿੱਚ ਕਿਸੇ ਵੀ ਕਿਸਮ ਦੀਆਂ ਤਬਦੀਲੀਆਂ ਕਰਨ ਤੋਂ ਇਨਕਾਰ ਕਰ ਦਿੱਤਾ। ਇਹ ਵੀ ਮੰਨਿਆ ਜਾ ਰਿਹਾ ਹੈ ਕਿ ਇਸ ਫੈਸਲੇ ਨਾਲ ਅਜਿਹੀ ਖੜੋਤ ਆਵੇਗੀ ਜਿਸ ਨਾਲ ਅਰਥਚਾਰੇ ਨੂੰ ਨੁਕਸਾਨ ਹੋ ਸਕਦਾ ਹੈ।