ਬ੍ਰਸੇਲਸ, 8 ਫਰਵਰੀ (ਪੋਸਟ ਬਿਊਰੋ)- ਯੂਰਪੀ ਯੂਨੀਅਨ (ਈ ਯੂ) ਤੋਂ ਬ੍ਰਿਟੇਨ ਦੇ ਵੱਖ ਹੋਣ ਦੀ ਪ੍ਰਕਿਰਿਆ ਬ੍ਰੈਗਜ਼ਿਟ ਸਮਝੌਤੇ ਵਿੱਚ ਬਦਲੀ 'ਤੇ ਦੋਵਾਂ ਧਿਰਾਂ ਵਿੱਚ ਗੱਲ ਬਣਦੀ ਨਹੀਂ ਦਿਸ ਰਹੀ ਹੈ। ਈ ਯੂ ਤੋਂ ਬ੍ਰਿਟੇਨ ਦੇ ਅਲੱਗ ਹੋਣ ਦੀ ਤਰੀਕ ਜਿਵੇਂ ਜਿਵੇਂ ਨਜ਼ਦੀਕ ਆ ਰਹੀ ਹੈ, ਦੋਵਾਂ ਪਾਸੇ ਬੇਚੈਨੀ ਵਧਦੀ ਜਾ ਰਹੀ ਹੈ।
ਬਿਨਾਂ ਕਿਸੇ ਸਮਝੌਤੇ ਦੀ ਬਦਲੀ ਰੋਕਣ ਦੇ ਲਈ ਪ੍ਰਧਾਨ ਮੰਤਰੀ ਟੈਰੇਸਾ ਮੇ ਅਤੇ ਯੂਰਪੀ ਕਮਿਸ਼ਨ ਦੇ ਮੁਖੀ ਜੀਨ ਕਲਾਉਡ ਜੰਕਰ ਵਿਚਾਲੇ ਕੱਲ੍ਹ ਫਿਰ ਗੱਲਬਾਤ ਹੋਈ, ਪਰ ਕੋਈ ਨਤੀਜ਼ਾ ਨਹੀਂ ਨਿਕਲਿਆ। ਮੇ ਬ੍ਰੈਗਜ਼ਿਟ ਸਮਝੌਤੇ ਵਿੱਚ ਆਇਰਲੈਂਡ ਅਤੇ ਉਤਰੀ ਆਇਰਲੈਂਡ ਦੀ ਸਰਹੱਦ 'ਤੇ ਹਾਰਡ ਬਾਰਡਰ ਨਾ ਹੋਣ ਦੀ ਗਾਰੰਟੀ ਚਾਹੁੰਦੀ ਹੈ, ਪ੍ਰੰਤੂ ਈ ਯੂ ਨੇ ਬ੍ਰੈਗਜ਼ਿਟ ਸਮਝੌਤੇ 'ਤੇ ਦੋਬਾਰਾ ਗੱਲਬਾਤ ਕਰਨ ਤੋਂ ਸਾਫ ਮਨ੍ਹਾ ਕਰ ਦਿੱਤਾ ਹੈ। ਦੋਵਾਂ ਨੇਤਾਵਾਂ ਨੇ ਫਿਰ ਗੱਲਬਾਤ ਕਰਨ ਦਾ ਫੈਸਲਾ ਕੀਤਾ। ਗੱਲਬਾਤ ਪਿੱਛੋਂ ਜਾਰੀ ਬਿਆਨ ਵਿੱਚ ਜੰਕਰ ਨੇ ਕਿਹਾ ਕਿ ਬ੍ਰੈਗਜ਼ਿਟ ਸਮਝੌਤੇ 'ਤੇ ਦੋਬਾਰਾ ਗੱਲਬਾਤ ਨਹੀਂ ਹੋ ਸਕਦੀ, ਪਰ ਬਦਲੀ ਦੇ ਬਾਅਦ ਈ ਯੂ ਅਤੇ ਬ੍ਰਿਟੇਨ ਦੇ ਨੇੜਲੇ ਸੰਬੰਧਾਂ ਬਾਰੇ ਗੱਲਬਾਤ ਕੀਤੀ ਜਾ ਸਕਦੀ ਹੈ। ਮੇ ਨੇ ਕਿਹਾ ਕਿ ਬ੍ਰੈਗਜ਼ਿਟ ਆਸਾਨ ਨਹੀਂ ਹੈ, ਪ੍ਰੰਤੂ ਉਹ ਉਸ ਨੂੰ ਤੈਅ ਸਮੇਂ 'ਤੇ ਪੂਰਾ ਕਰ ਕੇ ਰਹੇਗੀ। ਈ ਯੂ ਤੋਂ ਬ੍ਰਿਟੇਨ ਦੇ ਅਲੱਗ ਹੋਣ ਦੀ ਆਖਰੀ ਤਰੀਕ 29 ਮਾਰਚ ਹੈ। ਦੋਵਾਂ ਨੇ ਮਹੀਨੇ ਦੇ ਅਖੀਰ ਵਿੱਚ ਫਿਰ ਬੈਠਕ ਦਾ ਫੈਸਲਾ ਕੀਤਾ ਹੈ।