ਫਿਰੋਜ਼ਪੁਰ, 7 ਫਰਵਰੀ (ਪੋਸਟ ਬਿਊਰੋ)- ਧੋਖਾਧੜੀ ਦੇ ਕੇਸ ਨੂੰ ਖਤਮ ਕਰਨ ਦੇ ਬਦਲੇ 12 ਹਜ਼ਾਰ ਦੀ ਰਿਸ਼ਵਤ ਲੈਂਦੇ ਹੋਏ ਪੰਜਾਬ ਪੁਲਸ ਦੇ ਐਂਟੀ ਫਰਾਡ ਦੇ ਏ ਐਸ ਆਈ ਨੂੰ ਵਿਜੀਲੈਂਸ ਟੀਮ ਨੇ ਗ੍ਰਿਫਤਾਰ ਕੀਤਾ ਹੈ।
ਐਸ ਐਸ ਪੀ ਵਿਜੀਲੈਂਸ ਹਰਗੋਬਿੰਦ ਸਿੰਘ ਨੇ ਦੱਸਿਆ ਕਿ ਸੁਖਮਿੰਦਰ ਸਿੰਘ ਪੁੱਤਰ ਸੂਬਾ ਸਿੰਘ ਵਾਸੀ ਬੇਰੀ ਕਟਾਰਾ (ਜ਼ੀਰਾ) ਨੇ ਉਨ੍ਹਾਂ ਨੂੰ ਸ਼ਿਕਾਇਤ ਦਿੱਤੀ ਸੀ ਕਿ ਉਸ ਦੇ ਖਿਲਾਫ ਧੋਖਾਧੜੀ ਦਾ ਇਕ ਕੇਸ ਚੱਲਦਾ ਹੈ। ਇਸ ਦੀ ਜਾਂਚ ਪੰਜਾਬ ਪੁਲਸ ਦੇ ਐਂਟੀ ਫਰਾਡ ਵਿਭਾਗ ਦਾ ਏ ਐਸ ਆਈ ਕੁਲਵੰਤ ਚੰਦ ਕਰ ਰਿਹਾ ਹੈ। ਕੁਲਵੰਤ ਚੰਦ ਨੇ ਉਸ ਦੇ ਖਿਲਾਫ ਚੱਲਦੀ ਧੋਖਾਧੜੀ ਦੀ ਜਾਂਚ ਨੂੰ ਖਤਮ ਕਰਨ ਲਈ ਰਿਸ਼ਵਤ ਦੀ ਮੰਗ ਕੀਤੀ ਹੈ। ਸੁਖਮਿੰਦਰ ਅਤੇ ਕੁਲਵੰਤ ਦਾ 12 ਹਜ਼ਾਰ ਰੁਪਏ ਦਾ ਸੌਦਾ ਹੋ ਗਿਆ। ਸੁਖਮਿੰਦਰ ਨੇ ਪੰਜ ਹਜ਼ਾਰ ਰੁਪਏ ਕੁਲਵੰਤ ਨੂੰ ਦੇ ਦਿੱਤੇ ਤੇ ਬਾਕੀ ਦੇ ਸੱਤ ਹਜ਼ਾਰ ਰੁਪਏ ਪਿੱਛੋਂ ਨੂੰ ਦੇਣਾ ਤੈਅ ਕੀਤਾ। ਕੱਲ੍ਹ ਦੁਪਹਿਰ ਬਾਅਦ ਸੁਖਮਿੰਦਰ ਸੱਤ ਹਜ਼ਾਰ ਰੁਪਏ ਏ ਐਸ ਆਈ ਕੁਲਵੰਤ ਚੰਦ ਨੂੰ ਦੇਣ ਲੱਗਾ ਤਾਂ ਵਿਜੀਲੈਂਸ ਟੀਮ ਨੇ ਉਸ ਨੂੰ ਰੰਗੇ ਹੱਥੀਂ ਦਬੋਚ ਲਿਆ। ਐਸ ਐਸ ਪੀ ਨੇ ਦੱਸਿਆ ਕਿ ਕੁਲਵੰਤ ਚੰਦ ਦੇ ਖਿਲਾਫ ਰਿਸ਼ਵਤ ਲੈਣ ਦੇ ਦੋਸ਼ ਵਿੱਚ ਵਿਜੀਲੈਂਸ ਥਾਣਾ ਪੁਲਸ ਨੇ ਮਾਮਲਾ ਦਰਜ ਕੀਤਾ ਹੈ।