ਕੈਨਬਰਾ, 4 ਫਰਵਰੀ (ਪੋਸਟ ਬਿਊਰੋ)- ਆਸਟਰੇਲੀਆ ਦੇ ਬ੍ਰਿਸਬੇਨ ਅੰਤਰਰਾਸ਼ਟਰੀ ਹਵਾਈ ਅੱਡੇ ਉਤੇ ਚਾਕੂ ਦਿਖਾ ਕੇ ਇਕ ਮਹਿਲਾ ਨੂੰ ਨਿਸ਼ਾਨਾ ਬਣਾਉਣ, ਆਪਣੇ ਕੋਲ ਬੰਬ ਦੀ ਝੂਠੀ ਧਮਕੀ ਦੇਣ ਅਤੇ ਹਵਾਈ ਅੱਡੇ ਉੱਤੇ ਦੋ ਘੰਟੇ ਤੱਕ ਕੰਮਕਾਜ ਰੋਕਣ ਵਾਲੇ ਵਿਅਕਤੀ ਨੂੰ ਪੁਲਸ ਨੇ ਗ੍ਰਿਫਤਾਰ ਕਰ ਲਿਆ ਹੈ।
ਕੱਲ੍ਹ ਦੇਰ ਰਾਤ ਹਵਾਈ ਅੱਡੇ ਉਤੇ ਹੰਗਾਮਾ ਕਰਨ ਵਾਲੇ ਵਿਅਕਤੀ ਨੂੰ ਕਾਬੂ ਕਰਨ ਲਈ ਪੁਲਸ ਨੇ ਰਬੜ ਦੀਆਂ ਗੋਲੀਆਂ ਚਲਾਈਆਂ। ਇਸ ਦੇ ਬਾਅਦ ਪੁਲਸ ਨੇ ਦੱਸਿਆ ਕਿ ਘਟਨਾ ਅੱਤਵਾਦ ਨਾਲ ਜੁੜੀ ਹੋਈ ਨਹੀਂ। ਹਵਾਈ ਅੱਡਾ ਪ੍ਰਬੰਧਕਾਂ ਨੇ ਦੱਸਿਆ ਕਿ ਹੰਗਾਮੇ ਦੇ ਕਾਰਨ ਆਵਾਜਾਈ ਕਰੀਬ ਤਿੰਨ ਘੰਟੇ ਪ੍ਰਭਾਵਿਤ ਰਹੀ। ਪੂਰੀ ਘਟਨਾ ਟਰਮੀਨਲ ਦੇ ਫੂਡ ਕੋਰਟ ਤੋਂ ਸ਼ੁਰੂ ਹੋਈ, ਜਿਥੇ ਇਕ ਵਿਅਕਤੀ ਨੇ ਇਕ ਮਹਿਲਾ ਨੂੰ ਚਾਕੂ ਦਿਖਾਇਆ ਅਤੇ ਫਿਰ ਮੇਜ਼ 'ਤੇ ਨਕਲੀ ਬੰਬ ਰੱਖ ਦਿੱਤਾ। ਘਟਨਾ ਤੋਂ ਪਰੇਸ਼ਾਨ ਸੈਂਕੜੇ ਲੋਕ ਇਧਰ ਉਧਰ ਭੱਜਣ ਲੱਗ ਪਏ। ਇਕ ਪ੍ਰਤੱਖ ਦਰਸ਼ੀ ਨੇ ਦੱਸਿਆ ਕਿ ਉਸ ਵਿਅਕਤੀ ਦੇ ਕੋਲ ਦੋ ਵੱਡੇ ਚਾਕੂ ਸਨ। ਪੁਲਸ ਕਮਿਸ਼ਨਰ ਇਯਾਨ ਸਟੀਵਾਰਟ ਨੇ ਦੱਸਿਆ ਕਿ ਦੋਸ਼ੀ ਅਰਬੀ ਵਿੱਚ ਬੋਲ ਰਿਹਾ ਸੀ, ਇਸ ਲਈ ਅਰਬੀ ਬੋਲਣ ਵਾਲਾ ਇਕ ਪੁਲਸ ਅਧਿਕਾਰੀ ਓਥੇ ਪੁੱਜਾ। ਪੁਲਸ ਡਿਟੈਕਟਿਵ ਸੁਪਰਡੈਂਟ ਟੋਨੀ ਫਲੇਮਿੰਗ ਨੇ ਕਿਹਾ ਕਿ ਜਦ ਵਿਅਕਤੀ ਨੇ ਬੰਬ ਹੋਣ ਦਾ ਦਾਅਵਾ ਕੀਤਾ ਤਾਂ ਪੁਲਸ ਨੇ ਰਬੜ ਦੀਆਂ ਗੋਲੀਆਂ ਚਲਾਈਆਂ। ਇਸ ਦੇ ਬਾਅਦ ਉਸ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ। ਇਸ ਦੀ ਜਾਂਚ ਚੱਲ ਰਹੀ ਹੈ। ਹਵਾਈ ਅੱਡੇ ਨੂੰ ਧਮਾਕੇ ਨਾਲ ਉਡਾਣ ਦੀ ਧਮਕੀ ਦੇਣ ਲਈ ਦੋਸ਼ੀ ਨੂੰ 10 ਸਾਲ ਦੀ ਸਜ਼ਾ ਹੋ ਸਕਦੀ ਹੈ।