ਲੰਡਨ, 3 ਫਰਵਰੀ (ਪੋਸਟ ਬਿਊਰੋ)- ਯੂ ਕੇ ਵਿੱਚ ਲੜਕੀਆਂ ਦੀ ਸੁੰਨਤ (ਐੱਫ ਜੀ ਐੱਮ) ਕਰਨਾ ਕਾਨੂੰਨੀ ਤੌਰ ਉਤੇ ਜੁਰਮ ਸੀ, ਜਿਸ ਬਾਰੇ ਕਈ ਸਮਾਜ ਸੇਵੀ ਲੋਕ ਆਵਾਜ਼ ਉਠਾ ਰਹੇ ਸਨ, ਪਰ ਇਸ ਬਾਰੇ ਕੋਈ ਏਦਾਂ ਦਾ ਕੇਸ ਸਬੂਤਾਂ ਨਾਲ ਸਾਹਮਣੇ ਨਹੀਂ ਸੀ ਆਇਆ। ਇਹ ਪਹਿਲੀ ਵਾਰ ਹੈ ਕਿ ਯੁਗਾਂਡਾ ਮੂਲ ਦੀ 37 ਸਾਲਾ ਔਰਤ ਨੂੰ ਉਸ ਦੀ ਆਪਣੀ ਤਿੰਨ ਸਾਲਾ ਬੇਟੀ ਦੀ ਸੁੰਨਤ ਕਰਨ ਦੇ ਕੇਸ ਵਿੱਚ ਦੋਸ਼ੀ ਕਰਾਰ ਦਿੱਤਾ ਗਿਆ ਹੈ।
ਲੰਡਨ ਦੀ ਓਲਡ ਬੇਲੀ ਅਦਾਲਤ ਵਿੱਚ ਮਿਸਜ਼ ਜਸਟਿਸ ਵੀਪਲ ਨੇ ਉਕਤ ਔਰਤ ਨੂੰ ਲੰਮੀ ਜੇਲ੍ਹ ਦੀ ਚਿਤਾਵਨੀ ਦੇਂਦੇ ਹੋਏ ਹਿਰਾਸਤ ਵਿੱਚ ਭੇਜ ਦਿੱਤਾ ਹੈ। ਉਸ ਨੂੰ ਅੱਠ ਮਾਰਚ ਨੂੰ ਸਜ਼ਾ ਸੁਣਾਈ ਜਾਵੇਗੀ। ਇਸ ਮਾਮਲੇ ਵਿੱਚ 14 ਸਾਲ ਤੱਕ ਕੈਦ ਹੋ ਸਕਦੀ ਹੈ। ਅਦਾਲਤ ਨਮੂ ਦੱਸਿਆ ਗਿਆ ਕਿ ਪੁਲਸ ਅਤੇ ਸਮਾਜ ਸੇਵਕਾਂ ਦੀ ਸਾਂਝੀ ਜਾਂਚ ਵਿੱਚ ਉਕਤ ਔਰਤ ਦੇ ਘਰੋਂ ਸਬੂਤ ਵਜੋਂ ਕੁਝ ਸਾਮਾਨ ਮਿਲਿਆ, ਜਿਸ ਵਿੱਚ ਨਿੰਬੂ ਅਤੇ ਲਿਖਤੀ ਕੋਰਸ ਸਨ। ਯੂ ਕੇ ਵਿੱਚ ਐੱਫ ਜੀ ਐੱਮ ਨਾਲ ਸੰਬੰਧਤ ਇਹ ਚੌਥਾ ਕੇਸ ਅਦਾਲਤ ਤੱਕ ਪਹੁੰਚਿਆ ਹੈ। ਗ੍ਰਹਿ ਮੰਤਰੀ ਸਾਜਿਦ ਜਾਵਿਦ ਨੇ ਕਿਹਾ ਕਿ ਯੂ ਕੇ 'ਚ ਇਹ ਕੁਝ ਬਰਦਾਸ਼ਤ ਨਹੀਂ ਕੀਤਾ ਜਾਵੇਗਾ। ਲੰਡਨ ਦੇ ਮੇਅਰ ਸਾਦਿਕ ਖਾਨ ਨੇ ਕਿਹਾ ਕਿ ਇਸ ਦਾ ਹੋਰਨਾਂ ਨੂੰ ਵੀ ਸਬਕ ਮਿਲੇਗਾ। ਲੰਡਨ ਵਿੱਚ ਹਰ ਔਰਤ ਅਤੇ ਲੜਕੀ ਸੁਰੱਖਿਅਤ ਹੋਣੀ ਚਾਹੀਦੀ ਹੈ ਅਤੇ ਸੁਰੱਖਿਅਤ ਮਹਿਸੂਸ ਕਰੇ।