ਲੁਧਿਆਣਾ, 17 ਜਨਵਰੀ, (ਪੋਸਟ ਬਿਊਰੋ)- ਭਾਰਤ ਦੀ ਅੱਤਵਾਦ ਵਿਰੋਧੀ ਜਾਂਚ ਏਜੰਸੀ ਐੱਨ ਆਈ ਏ ਦੀ ਟੀਮ ਨੇ ਅੱਜ ਤੜਕੇ ਕਰੀਬ ਢਾਈ ਵਜੇ ਦੇ ਸਥਾਨਕ ਪੁਲਿਸ ਨਾਲ ਮਿਲ ਕੇ ਵੱਡੀ ਕਾਰਵਾਈ ਦੌਰਾਨ ਇਸ ਸ਼ਹਿਰ ਤੋਂ ਅੱਤਵਾਦੀ ਜਥੇਬੰਦੀ ਲਈ ਕੰਮ ਕਰ ਰਹੇ ਇੱਕ ਮੌਲਵੀ ਨੂੰ ਫੜਿਆ ਹੈ। ਗ੍ਰਿਫਤਾਰ ਕੀਤੇ ਮੌਲਵੀ ਦੀ ਪਛਾਣ ਮੁਹੰਮਦ ਉਬੇਸ ਪਾਸ਼ਾ ਵਜੋਂ ਹੋਈ ਹੈ। ਉਸ ਉੱਤੇ ਇਹ ਕਾਰਵਾਈ ਆਈ ਐਸ ਆਈ ਐੱਸ ਦੇ ਨਵੇਂ ਸੈੱਲ ਹਰਕਤ ਉੱਲ ਬਰਬਤ ਏ ਇਸਲਾਮ ਨਾਲ ਸੰਬੰਧ ਰੱਖਦੇ ਕੁਝ ਲੋਕ ਫੜੇ ਜਾਣ ਪਿੱਛੋਂ ਉਨ੍ਹਾਂਂ ਤੋਂ ਮਿਲੀ ਜਾਣਕਾਰੀ ਦੇ ਆਧਾਰ ਉੱਤੇ ਕੀਤੀ ਗਈ ਹੈ ।
ਮਿਲੀ ਜਾਣਕਾਰੀ ਅਨੁਸਾਰ ਗ੍ਰਿਫਤਾਰ ਕੀਤਾ ਗਿਆ ਮੁਹੰਮਦ ਓਬੇਸ ਪਾਸ਼ਾ ਉੱਤਰ ਪ੍ਰਦੇਸ਼ ਦੇ ਰਾਮਪੁਰ ਦਾ ਵਾਸੀ ਹੈ ਅਤੇ ਪਿਛਲੇ ਚਾਰ ਮਹੀਨੇ ਤੋਂ ਲੁਧਿਆਣਾ ਦੀ ਮਦਨੀ ਮਦਰੱਸਾ ਮਸਜਿਦ ਵਿੱਚ ਬੱਚਿਆਂ ਨੂੰ ਪੜ੍ਹਾਉਣ ਦਾ ਕੰਮ ਕਰਦਾ ਸੀ। ਲੋਕਾਂ ਦੇ ਮੁਤਾਬਕ ਤੜਕੇ ਕਰੀਬ ਢਾਈ ਵਜੇ ਐੱਨ ਆਈ ਏ ਅਤੇ ਸਥਾਨਕ ਪੁਲਿਸ ਦੀ ਟੀਮ ਆਈ ਤੇ ਉਸ ਨੂੰ ਫੜ ਕੇ ਲੈ ਗਈ। ਮਸਜਿਦ ਦੇ ਨੇੜੇ ਸਾਰਾ ਦਿਨ ਲੋਕਾਂ ਦੀ ਭੀੜ ਲੱਗੀ ਰਹੀ, ਜਿਨ੍ਹਾਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੂੰ ਕਦੇ ਸ਼ੱਕ ਵੀ ਨਹੀਂ ਹੋਇਆ ਕਿ ਇਹ ਇਸ ਤਰ੍ਹਾਂ ਦਾ ਆਦਮੀ ਹੋਵੇਗਾ। ਆਈ ਐੱਸ ਆਈ ਐੱਸ ਦੇ ਨਵੇਂ ਸੈੱਲ ਹਰਕਤ ਉਰ ਬਰਬਤ ਏ ਇਸਲਾਮ ਨਾਲ ਸੰਬੰਧ ਰੱਖਦੇ ਅੱਤਵਾਦੀਆਂ ਨੂੰ ਫੜੇ ਜਾਣ ਦੇ ਬਾਅਦ ਉਨ੍ਹਾਂ ਦੀ ਪੁੱਛਗਿੱਛ ਮਗਰੋਂ ਐੱਨ ਆਈ ਏ ਟੀਮ ਇੱਥੇ ਆਈ ਤੇ ਸਥਾਨਕ ਪੁਲਿਸ ਨਾਲ ਮਸਜਿਦ ਪਹੁੰਚੀ ਅਤੇ ਮੌਲਵੀ ਨੂੰ ਲੈ ਗਈ। ਸਵੇਰੇ ਜਦੋਂ ਲੋਕਾਂ ਨੂੰ ਇਸ ਦਾ ਪਤਾ ਲੱਗਾ ਤਾਂ ਸਨਸਨੀ ਫੈਲ ਗਈ ਤੇ ਕਾਫੀ ਗਿਣਤੀ ਵਿੱਚ ਲੋਕ ਮਸਜਿਦ ਕੰਪਲੈਕਸ ਵਿੱਚ ਜਮ੍ਹਾ ਹੋ ਗਏ। ਉਨ੍ਹਾਂ ਦਾ ਕਹਿਣਾ ਸੀ ਕਿ ਮੌਲਵੀ ਦੇ ਵਿਹਾਰ ਤੋਂ ਕਦੇ ਨਹੀਂ ਲੱਗਾ ਕਿ ਉਹ ਏਦਾਂ ਦੀ ਸਰਗਰਮੀ ਨਾਲ ਜੁੜਿਆ ਹੋਵੇਗਾ।
ਵਰਨਣ ਯੋਗ ਹੈ ਕਿ ਅੱਜ ਹੀ ਐੱਨ ਆਈ ਏ ਵੱਲੋਂ ਪੰਜਾਬ ਅਤੇ ਉਤਰ ਪ੍ਰਦੇਸ਼ ਦੇ ਕਰੀਬ ਸੱਤ ਥਾਵਾਂ ਉੱਤੇ ਛਾਪੇ ਮਾਰੇ ਗਏ ਅਤੇ ਉੱਤਰ ਪ੍ਰਦੇਸ਼ ਦੇ ਅਮਰੋਹਾ ਤੋਂ ਆਈ ਐੱਸ ਆਈ ਐੱਸ ਦੇ ਨਵੇਂ ਸੈੱਲ ਦਾ ਖੁਲਾਸਾ ਹੋਇਆ ਸੀ। ਇਸ ਬਾਰੇ ਉਸ ਪਾਸੇ ਕਈ ਲੋਕਾਂ ਦੀ ਗ੍ਰਿਫਤਾਰੀ ਵੀ ਹੋਈ ਅਤੇ ਵਿਸਫੋਟਕ ਵੀ ਬਰਾਮਦ ਕੀਤੇ ਗਏ ਸਨ।