ਯੂ ਐੱਨ ਓ, 17 ਜਨਵਰੀ (ਪੋਸਟ ਬਿਊਰੋ)- ਕੰਮ ਵਾਲੀ ਜਗ੍ਹਾ 'ਤੇ ਯੌਨ ਹਿੰਸਾ ਵਰਗੇ ਅਪਰਾਧ ਤੋਂ ਯੂ ਐੱਨ ਓ ਵਰਗਾ ਸੰਸਾਰ ਪੱਧਰ ਦਾ ਅਦਾਰਾ ਵੀ ਨਹੀਂ ਬਚ ਸਕਿਆ। ਇੱਕ ਰਿਪੋਰਟ ਅਨੁਸਾਰ ਪਿਛਲੇ ਦੋ ਸਾਲ ਵਿੱਚ ਇਸ ਦੇ ਤੀਜਾ ਹਿੱਸਾ ਕਰਮਚਾਰੀਆਂ ਨੂੰ ਕਿਸੇ ਨਾ ਕਿਸੇ ਤਰ੍ਹਾਂ ਹਿੰਸਾ ਦਾ ਸ਼ਿਕਾਰ ਹੋਣਾ ਪਿਆ। ਇਨ੍ਹਾਂ ਵਿੱਚ ਅੱਧੇ ਤੋਂ ਵੱਧ ਨੂੰ ਯੂ ਐੱਨ ਦਫਤਰਾਂ ਵਿੱਚ ਯੌਨ ਹਿੰਸਾ ਦਾ ਸ਼ਿਕਾਰ ਹੋਣਾ ਪਿਆ। ਹੈਰਾਨ ਜਨਕ ਤੌਰ 'ਤੇ ਤਿੰਨ ਵਿੱਚੋਂ ਇੱਕ ਪੀੜਤ ਨੇ ਹੀ ਇਸ ਅਪਰਾਧ ਦੇ ਖਿਲਾਫ ਕੋਈ ਕਾਰਵਾਈ ਕੀਤੀ ਹੈ।
ਦੁਨੀਆ ਭਰ ਵਿੱਚ ਯੌਨ ਹਿੰਸਾ ਦੇ ਖਿਲਾਫ ਚੱਲਦੇ ਮੀ ਟੂ ਮੁਹਿੰਮ ਦੇ ਤਹਿਤ ਕਰਾਏ ਇਸ ਸਰਵੇ ਵਿੱਚ ਯੂ ਐੱਨ ਦੇ 30364 ਕਰਮਚਾਰੀਆਂ ਨੇੇ ਹਿੱਸਾ ਲਿਆ। ਇਨ੍ਹਾਂ ਵਿੱਚੋਂ 21.7 ਫੀਸਦੀ ਨੂੰ ਇਤਰਾਜ਼ ਯੋਗ ਚੁਟਕਲੇ ਅਤੇ ਯੌਨ ਕਿੱਸੇ ਸੁਣਨੇ ਪਏ ਸਨ। 14.2 ਫੀਸਦੀ ਦੇ ਸਰੀਰ ਨਾਲ ਜੁੜੀਆਂ ਭੱਦੀਆਂ ਟਿੱਪਣੀਆਂ ਕੀਤੀਆਂ ਗਈਆਂ। 10.1 ਫੀਸਦੀ ਲੋਕ ਸਰੀਰਕ ਸ਼ੋਸ਼ਣ ਦਾ ਵੀ ਸ਼ਿਕਾਰ ਹੋਏ। ਸਰਵੇ ਵਿੱਚ ਇਹ ਵੀ ਸਾਹਮਣੇ ਆਇਆ ਕਿ ਤਿੰਨ ਵਿੱਚੋਂ ਦੋ ਸ਼ਿਕਾਰ ਪੁਰਸ਼ ਸਨ। ਸਰਵੇ ਦੇ ਨਤੀਜੇ ਸਾਹਮਣੇ ਆਉਣ ਉੱਤੇ ਯੂ ਐਨ ਦੇ ਜਨਰਲ ਸੈਕਟਰੀ ਐਂਟੋਨੀਓ ਗੁਤੇਰਸ ਨੇ ਕਿਹਾ ਕਿ ਦੋ ਗੱਲਾਂ ਸਾਫ ਹੋ ਗਈਆਂ ਹਨ। ਪਹਿਲੀ ਇਹ ਕਿ ਲੋਕ ਹਾਲੇ ਵੀ ਯੌਨ ਹਿੰਸਾ 'ਤੇ ਗੱਲ ਕਰਨ ਤੋਂ ਝਿਜਕਦੇ ਹਨ। ਦੂਸਰੇ ਇਹ ਕਿ ਲੋਕਾਂ ਵਿੱਚ ਭਰੋਸਾ ਨਹੀਂ। ਉਨ੍ਹਾਂ ਨੇ ਕਿਹਾ ਕਿ ਬਰਾਬਰੀ ਅਤੇ ਮਨੁੱਖੀ ਅਧਿਕਾਰ ਵਰਗੀਆਂ ਕਦਰਾਂ ਕੀਮਤਾਂ ਨੂੰ ਵਧਾਉਣ ਵਾਲੀ ਅੰਤਰਰਾਸ਼ਟਰੀ ਸੰਸਥਾ ਦੇ ਤੌਰ 'ਤੇ ਯੂ ਐੱਨ ਨੂੰ ਦੁਨੀਆ ਦੇ ਸਾਹਮਣੇ ਉਦਾਹਰਣ ਬਣਨਾ ਹੋਵੇਗਾ।