ਨੌਇਡਾ, 17 ਜਨਵਰੀ (ਪੋਸਟ ਬਿਊਰੋ)- ਭਾਰਤ ਵਿੱਚ ਪਿਛਲੇ ਦਸ ਸਾਲਾਂ (2008 ਤੋਂ) ਵਿੱਚ 429 ਸ਼ੇਰਾਂ ਦਾ ਸ਼ਿਕਾਰ ਹੋਇਆ ਹੈ। ਇਸ ਦੌਰਾਨ ਸਭ ਤੋਂ ਵੱਧ ਸ਼ੇਰ (71 ਦੇ ਕਰੀਬ) ਮੱਧ ਪ੍ਰਦੇਸ਼ ਵਿੱਚ ਮਾਰੇ ਗਏ ਹਨ। ਇਹ ਖੁਲਾਸਾ ਸੂਚਨਾ ਅਧਿਕਾਰ ਐਕਟ ਤਹਿਤ ਹਾਸਲ ਜਾਣਕਾਰੀ ਤੋਂ ਹੋਇਆ ਹੈ।
ਮਿਲੀ ਜਾਣਕਾਰੀ ਅਨੁਸਾਰ ਸ਼ੇਰਾਂ ਦਾ ਸਭ ਤੋਂ ਵੱਧ ਸ਼ਿਕਾਰ ਸਾਲ 2011 ਵਿੱਚ ਹੋਇਆ। ਇਸ ਸਾਲ 80 ਸ਼ੇਰਾਂ ਨੂੰ ਮਾਰ ਦਿੱਤਾ ਗਿਆ ਸੀ। ਵਾਤਾਵਰਨ ਤੇ ਜੰਗਲਾਤ ਮੰਤਰਾਲੇ ਅਧੀਨ ਜੰਗਲੀ ਜੀਵ ਅਪਰਾਧ ਕੰਟਰੋਲ ਬਿਊਰੋ (ਡਬਲਿਊ ਸੀ ਸੀ ਬੀ) ਦੇ ਅੰਕੜਿਆਂ ਮੁਤਾਬਕ ਸਾਲ 2015 ਵਿੱਚ ਸ਼ਿਕਾਰੀਆਂ ਹੱਥੋਂ ਸਭ ਤੋਂ ਘੱਟ 17 ਸ਼ੇਰ ਮਾਰੇ ਗਏ। ਡਬਲਿਊ ਸੀ ਸੀ ਬੀ ਸੰਵਿਧਾਨਕ ਸੰਸਥਾ ਹੈ, ਜੋ ਦੇਸ਼ ਵਿੱਚ ਜੰਗਲੀ ਜੀਵ ਅਪਰਾਧਾਂ ਨੂੰ ਠੱਲਣ ਲਈ ਬਣਾਈ ਗਈ ਸੀ। ਬਿਊਰੋ ਨੇ ਇਕ ਲਿਖਤੀ ਜਵਾਬ ਵਿੱਚ ਕਿਹਾ ਕਿ ਸਾਲ 2018 ਵਿੱਚ ਸ਼ਿਕਾਰੀਆਂ ਨੇ 22 ਸ਼ੇਰਾਂ ਨੂੰ ਮਾਰ ਦਿੱਤਾ ਸੀ ਤੇ ਸਾਲ 2017 ਅਤੇ 2016 ਵਿੱਚ ਇਹ ਅੰਕੜਾ ਕ੍ਰਮਵਾਰ 25 ਅਤੇ 48 ਸੀ। ਬਿਊਰੋ ਮੁਤਾਬਕ ਪਿਛਲੇ ਦੋ ਸਾਲਾਂ 'ਚ ਇਸ ਅੰਕੜੇ 'ਚ ਕਮੀ ਆਈ ਹੈ। ਨੌਇਡਾ ਅਧਾਰਿਤ ਵਕੀਲ ਰੰਜਨ ਤੋਮਰ ਵੱਲੋਂ ਦਾਇਰ ਇਸ ਆਰ ਟੀ ਆਈ ਵਿੱਚ ਸਾਲ 2008 ਤੋਂ ਸ਼ਿਕਾਰੀਆਂ ਹੱਥੋਂ ਮਾਰੇ ਗਏ ਸ਼ੇਰਾਂ ਦੀ ਗਿਣਤੀ ਦਾ ਸੂਬੇ ਮੁਤਾਬਕ ਅੰਕੜਾ ਮੰਗਿਆ ਗਿਆ ਸੀ। ਇਸ ਡੇਟਾ ਮੁਤਾਬਕ ਸਭ ਤੋਂ ਵੱਧ ਸ਼ੇਰ (71) ਮੱਧ ਪ੍ਰਦੇਸ਼ 'ਚ ਮਾਰੇ ਗਏ ਹਨ। ਮਹਾਰਾਸ਼ਟਰ ਤੇ ਕਰਨਾਟਕ ਵਿੱਚ 46-46 ਅਤੇ ਅਸਾਮ ਤੇ ਛੱਤੀਸਗੜ੍ਹ ਵਿੱਚ 42-42 ਅਤੇ ਉਤਰਾਖੰਡ ਵਿੱਚ ਪਿਛਲੇ ਦਸ ਸਾਲਾਂ 'ਚ 35 ਸ਼ੇਰਾਂ ਦੀ ਜਾਨ ਗਈ ਹੈ।