ਲੰਡਨ, 14 ਜਨਵਰੀ, (ਪੋਸਟ ਬਿਊਰੋ)- ਬ੍ਰਿਟੇਨ ਦੇ ਪਾਰਲੀਮੈਂਟ ਮੈਂਬਰ ਗੈਰੇਥ ਜਾਨਸਨ ਨੇ ਮੰਗਲਵਾਰ ਨੂੰ ਬ੍ਰੈਗਜ਼ਿਟ ਬਾਰੇ ਪਾਰਲੀਮੈਂਟ ਵਿੱਚ ਵੋਟਾਂ ਪੈਣ ਤੋਂ ਪਹਿਲਾਂ ਸੋਮਵਾਰ ਸ਼ਾਮ ਅਸਤੀਫਾ ਦੇ ਦਿੱਤਾ ਹੈ।
ਇਸ ਸੰਬੰਧ ਵਿੱਚ ਜਾਨਸਨ ਨੇ ਪ੍ਰਧਾਨ ਮੰਤਰੀ ਥੈਰੇਸਾ ਮੇਅ ਨੂੰ ਲਿੱਖੀ ਚਿੱਠੀ ਵਿੱਚ ਕਿਹਾ ਕਿ ਉਹ ਆਪਣੀ ਸਮਝ ਨਾਲ ਸਰਕਾਰ ਦੀ ਸਥਿਤੀ ਦਾ ਸਮਰਥਨ ਨਹੀਂ ਕਰ ਸਕਦੇ, ਜਦ ਕਿ ਸਪੱਸ਼ਟ ਹੈ ਕਿ ਸਮਝੌਤਾ ਸਾਡੇ ਦੇਸ਼ ਦੇ ਹਿੱਤਾਂ ਲਈ ਹਾਨੀਕਾਰਕ ਹੋਵੇਗਾ। ਜਾਨਸਨ ਦਾ ਕੰਮ ਹੋਰ ਪਾਰਲੀਮੈਂਟ ਮੈਂਬਰਾਂ ਨੂੰ ਸਮਝੌਤੇ ਦੇ ਪੱਖ ਵਿੱਚ ਵੋਟ ਪਾਉਣ ਲਈ ਮਨਾਉਣ ਦਾ ਸੀ। ਉਨ੍ਹਾਂ ਕਿਹਾ ਕਿ ਉਹ ਇਸ ਦਾ ਸਮਰਥਨ ਨਹੀਂ ਕਰ ਸਕਣਗੇ, ਕਿਉਂਕਿ ਇਹ ਸਾਨੂੰ ਯੂਰਪੀ ਯੂਨੀਅਨ ਨਾਲ ਹੋਰ ਕਈ ਸਾਲਾਂ ਲਈ ਬੰਨ੍ਹ ਕੇ ਰਖੇਗਾ। ਉਨ੍ਹਾਂ ਕਿਹਾ ਕਿ ਇਹ ਸਮਝੌਤਾ ਲੱਖਾਂ ਲੋਕਾਂ ਲਈ ਅਪਮਾਨ ਜਨਕ ਹੋਵੇਗਾ।
ਜਾਨਸਨ ਨੇ ਇਹ ਅਸਤੀਫਾ ਓਦੋਂ ਦਿੱਤਾ, ਜਦੋਂ ਪ੍ਰਧਾਨ ਮੰਤਰੀ ਥੈਰੇਸਾ ਬ੍ਰੈਗਜ਼ਿਟ ਸਮਝੌਤਾ ਮਨਜ਼ੂਰ ਕਰਨ ਲਈ ਆਖਰੀ ਸਮੇਂ ਵਿੱਚ ਸਮਰਥਨ ਇਕੱਠਾ ਕਰਨ ਲੱਗੀ ਹੋਈ ਸੀ। ਮੇਅ ਨੇ ਸਟੋਕ ਆਨ ਟ੍ਰੈਂਟ ਦੇ ਇਕ ਕਾਰਖਾਨੇ ਵਿੱਚ ਬੋਲਦੇ ਹੋਏ ਚਿਤਾਵਨੀ ਦਿੱਤੀ ਕਿ ਜੇ ਪਾਰਲੀਮੈਂਟ ਮੈਂਬਰਾਂ ਨੇ ਉਨ੍ਹਾਂ ਦੇ ਸਮਝੌਤੇ ਨੂੰ ਵੋਟ ਨਾ ਦਿੱਤਾ ਤਾਂ ਸੰਭਾਵਨਾ ਬਹੁਤੀ ਇਹ ਹੈ ਕਿ ਪਾਰਲੀਮੈਂਟ ਵਿੱਚ ਬ੍ਰੈਗਜ਼ਿਟ ਸਮਝੌਤਾ ਨਾ ਹੋਣ ਦਾ ਖਤਰਾ ਖੜਾ ਰਹੇਗਾ, ਜਿਸ ਦਾ ਭਾਵ ਹੈ ਕਿ 2016 ਦੇ ਯੂਰਪੀ ਯੂਨੀਅਨ ਦੇ ਮੁੱਦੇ ਉੱਤੇ ਰਿਫਰੈਂਡਮ ਦੇ ਨਤੀਜੇ ਦਾ ਸਿੱਟਾ ਨਹੀਂ ਨਿਕਲ ਸਕਦਾ।