ਰੋਮ, 8 ਜਨਵਰੀ (ਪੋਸਟ ਬਿਊਰੋ)- ਮਾਲਟਾ ਦੇ ਤੱਟ ਉੱਤੇ ਫਸੇ ਹੋਏ 49 ਸ਼ਰਣਾਰਥੀਆਂ ਵਿੱਚੋਂ ਕੁਝ ਸ਼ਰਣਾਰਥੀ ਭੋਜਨ ਕਰਨ ਤੋਂ ਨਾਂਹ ਕਰ ਰਹੇ ਹਨ। ਉਨ੍ਹਾਂ ਦੇ ਬਚਾਅ ਲਈ ਕਿਸ਼ਤੀਆਂ ਚਲਾ ਰਹੇ ਗਰੁੱਪਾਂ ਵਿੱਚੋਂ ‘ਸੀ-ਵਾਚ ਇੰਟਰਨੈਸ਼ਨਲਜ਼` ਨੇ ਕੱਲ੍ਹ ਇਸ ਦੀ ਜਾਣਕਾਰੀ ਦਿੱਤੀ ਅਤੇ ਟਵੀਟ ਕੀਤਾ, ‘ ਸਾਨੂੰ ਇਹ ਖਬਰਾਂ ਮਿਲ ਰਹੀਆਂ ਹਨ ਕਿ ਕੁਝ ਲੋਕ ਭੋਜਨ ਤੋਂ ਇਨਕਾਰ ਕਰ ਰਹੇ ਹਨ। ਸਾਨੂੰ ਡਰ ਹੈ ਕਿ ਉਨ੍ਹਾਂ ਦੀ ਮਾਨਸਿਕ ਅਤੇ ਸਰੀਰਕ ਸਿਹਤ ਵਿਗੜ ਸਕਦੀ ਹੈ।`
ਉੱਤਰੀ ਅਫਰੀਕਾ ਤੋਂ ਯੂਰਪ ਜਾਣ ਲਈ ਖਤਰਨਾਕ ਭੂ-ਮੱਧ ਸਾਗਰ ਪਾਰ ਕਰਨ ਦੀ ਕੋਸ਼ਿਸ਼ ਦੌਰਾਨ ਬਚਾਏ ਗਏ ਇਹ ਸ਼ਰਣਾਰਥੀ 22 ਦਸੰਬਰ ਤੋਂ ਸੀ-ਵਾਚ ਅਤੇ ਸੀ-ਆਈ ਦੀਆਂ ਕਿਸ਼ਤੀਆਂ `ਚ ਸਵਾਰ ਹਨ, ਕਿਉਂਕਿ ਕਿਸੇ ਦੇਸ਼ ਨੇ ਉਨ੍ਹਾਂ ਨੂੰ ਦਾਖਲ ਹੋਣ ਦੀ ਇਜਾਜ਼ਤ ਨਹੀਂ ਦਿੱਤੀ। ਇਨ੍ਹਾਂ ਵਿੱਚ ਬੱਚੇ ਵੀ ਹਨ। ਸੀ ਵਾਚ ਦੀ ਮਹਿਲਾ ਬੁਲਾਰਾ ਨੇ ਦੱਸਿਆ ਕਿ ਇਕ ਛੋਟੇ ਕਮਰੇ ਵਿੱਚ ਭਰੇ ਹੋਏ ਸ਼ਰਣਾਰਥੀਆਂ ਵਿੱਚੋਂ ਕਈ ਇਕ-ਦੂਜੇ ਉੱਤੇ ਉਲਟੀਆਂ ਕਰ ਰਹੇ ਸਨ। ਫਰਾਂਸ, ਜਰਮਨੀ, ਲਗਜ਼ਮਬਰਗ, ਮਾਲਟਾ, ਨੀਦਰਲੈਂਡ ਅਤੇ ਪੁਤਰਗਾਲ ਕੁਝ ਸ਼ਰਣਾਰਥੀਆਂ ਨੂੰ ਲੈਣ ਲਈ ਮੰਨ ਰਹੇ ਹਨ।