ਵਾਸ਼ਿੰਗਟਨ, 8 ਜਨਵਰੀ (ਪੋਸਟ ਬਿਊਰੋ)- ਦੁਨੀਆ ਵਿਚ ਉੱਚ ਹੁਨਰ ਪੇਸ਼ੇਵਰ ਲੋਕਾਂ ਵਿਚ ਅਮਰੀਕੀ ਗ੍ਰੀਨ ਕਾਰਡ ਲੈਣ ਦੀ ਇੱਛਾ ਹੁੰਦੀ ਹੈ। ਯੂ ਐਸ ਡਿਪਾਰਟਮੈਂਟ ਆਫ ਸਟੇਟ ਵਲੋਂ ਪਿੱਛੇ ਜਿਹੇ ਜਾਰੀ ਰਿਪੋਰਟ ਮੁਤਾਬਕ ਅਮਰੀਕਾ ਦਾ ਰੁਜ਼ਗਾਰ ਅਧਾਰਿਤ ਗ੍ਰੀਨ ਕਾਰਡ ਦੀ ਸਭ ਤੋਂ ਵੱਧ ਉਡੀਕ ਕਰਨ ਵਾਲਿਆਂ ਵਿਚ ਭਾਰਤੀ ਦੂਜੇ ਥਾਂ ਹਨ। ਚੀਨ ਵਾਲੇ ਇਸ ਸੂਚੀ ਵਿਚ ਪਹਿਲੇ ਨੰਬਰ `ਤੇ ਹਨ। ਰਿਪੋਰਟ ਮੁਤਾਬਕ ਉਡੀਕ ਰਹੇ ਜ਼ਿਆਦਾਤਰ ਲੋਕ ਗ੍ਰੀਨ ਕਾਰਡ ਹਾਸਲ ਕਰਨ ਦੇ ਪਾਤਰ ਹਨ। ਅਮਰੀਕਾ ਦੀ ਨਾਗਰਿਕਤਾ ਹਾਸਲ ਕਰਨ ਲਈ ਗ੍ਰੀਨ ਕਾਰਡ ਪਹਿਲਾ ਕਦਮ ਹੈ। ਗ੍ਰੀਨ ਕਾਰਡ ਹਾਸਲ ਕਰਨ ਤੋਂ ਬਾਅਦ ਇਥੇ ਜਾਇਜ਼ ਤਰੀਕੇ ਨਾਲ ਸਥਾਈ ਵਾਸੀ ਦੇ ਤੌਰ `ਤੇ ਰਿਹਾ ਜਾ ਸਕਦਾ ਹੈ ਅਤੇ ਕੰਮ ਕੀਤਾ ਜਾ ਸਕਦਾ ਹੈ। ਵੀਜ਼ੇ ਵਾਂਗ ਗ੍ਰੀਨ ਕਾਰਡ ਦੀ ਆਖਰੀ ਮਿਤੀ ਨਹੀਂ ਹੁੰਦੀ।
ਮਿਲੀ ਜਾਣਕਾਰੀ ਅਨੁਸਾਰ ਅਮਰੀਕਾ ਵਿਚ ਮੌਜੂਦਾ ਕਾਨੂੰਨ ਹੇਠ ਇਕ ਸਾਲ ਵਿਚ ਕਿਸੇ ਦੇਸ਼ ਦੇ ਕੁੱਲ 7 ਫੀਸਦੀ ਲੋਕਾਂ ਨੂੰ ਹੀ ਗ੍ਰੀਨ ਕਾਰਡ ਦਿੱਤਾ ਜਾ ਸਕਦਾ ਹੈ। ਇਸ ਕੋਟੇ ਦੀ ਵਜ੍ਹਾ ਨਾਲ ਭਾਰਤ ਤੇ ਚੀਨ ਵਿਚ ਬਿਨੈਕਾਰਾਂ ਦੀ ਉਡੀਕ ਦੀ ਮਿਆਦ ਵਧਦੀ ਜਾਂਦੀ ਹੈ। ਹੋਰ ਜਾਂ ਘੱਟ ਹੁਨਰਮੰਦ ਕਾਮੇ ਜਿਵੇਂ ਕੁਝ ਸ਼੍ਰੇਣੀਆਂ ਵਿਚ ਮੌਜੂਦਾ ਸਮੇਂ ਵਿਚ ਸਿਰਫ 10 ਹਜ਼ਾਰ ਵੀਜ਼ਾ ਪ੍ਰਤੀ ਸਾਲ ਦੇਣ ਦੀ ਇਜਾਜ਼ਤ ਹੈ। ਇਹੀ ਕਾਰਨ ਹੈ ਕਿ ਅਮਰੀਕਾ ਵਿਚ ਪੱਕੇ ਵਸੇਬੇ ਦੀ ਮੰਗ ਕਰਨ ਵਾਲੇ ਚੀਨੀ ਕਾਮਿਆਂ ਲਈ 11 ਸਾਲ ਅਤੇ 7 ਮਹੀਨੇ ਦੀ ਉਡੀਕ ਦੀ ਮਿਆਦ ਚੱਲ ਰਹੀ ਹੈ। ਇਕੋ ਦੇਸ਼ ਤੋਂ ਇਕੋ ਸ਼੍ਰੇਣੀ ਵਿਚ ਵੱਡੀ ਗਿਣਤੀ ਵਿਚ ਅਰਜ਼ੀਆਂ ਆਉਣ ਉੱਤੇ ਵੀ ਕੁਲ ਸਾਲਾਨਾ ਗ੍ਰੀਨ ਕਾਰਡ ਵਿਚ ਬੈਕਲਾਗ ਦੇਖਣ ਨੂੰ ਮਿਲ ਸਕਦਾ ਹੈ। ਅਮਰੀਕੀ ਨਾਗਰਿਕਤਾ ਅਤੇ ਇਮੀਗ੍ਰੇਸ਼ਨ ਸੇਵਾਵਾਂ ਵਲੋਂ ਜਾਰੀ ਅਧਿਕਾਰਤ ਅੰਕੜੇ ਮੁਤਾਬਕ ਦੁਨੀਆ ਵਿਚ ਗ੍ਰੀਨ ਕਾਰਡ ਦੀ ਉਡੀਕ ਕਰਦੇ ਲੋਕਾਂ ਵਿਚ ਸਭ ਤੋਂ ਵੱਧ ਤਕਰੀਬਨ ਚੌਥਾ ਹਿੱਸਾ ਭਾਰਤੀ ਹਨ। ਮਈ 2018 ਤੱਕ ਗ੍ਰੀਨ ਕਾਰਡ ਦੀ ਉਡੀਕ ਕਰਦੇ 3,95,025 ਵਿਦੇਸ਼ੀਆਂ ਵਿਚੋਂ 3,06,601 ਭਾਰਤੀ ਹਨ। ਚੀਨ ਵਿਚ 67,031 ਨਾਗਰਿਕ ਗ੍ਰੀਨ ਕਾਰਡ ਮਿਲਣ ਦੀ ਉਮੀਦ ਹੈ। ਹੋਰ ਦੇਸ਼ਾਂ ਵਿਚੋਂ ਗਿਣਤੀ 10 ਹਜ਼ਾਰ ਤੋਂ ਜ਼ਿਆਦਾ ਨਹੀਂ ਹਨ।