ਇੱਕੋ ਤਰ੍ਹਾਂ ਦੀ ਇਮੇਜ ਵਿੱਚ ਬੱਝਣਾ ਠੀਕ ਨਹੀਂ, ਸ਼ਾਇਦ ਇਸ ਲਈ ਇਮਰਾਨ ਖਾਨ ਵੱਖ-ਵੱਖ ਤਰ੍ਹਾਂ ਦੀਆਂ ਕਹਾਣੀਆਂ ਵਾਲੀਆਂ ਫਿਲਮਾਂ ਕਰ ਰਿਹਾ ਹੈ। ਜ਼ਿਕਰ ਯੋਗ ਹੈ ਕਿ ਲਗਾਤਾਰ ਰੋਮਾਂਟਿਕ ਫਿਲਮਾਂ ਕਰਨ ਅਤੇ ਕਿਸਿੰਗ ਸੀਨ ਦੇਣ ਕਾਰਨ ਉਸ ਦੇ ਕਰੀਅਰ ਨੂੰ ਕਾਫੀ ਨੁਕਸਾਨ ਪਹੁੰਚਿਆ ਸੀ, ਕਿਉਂਕਿ ਉਸ ਨੂੰ ਨਿਰਮਾਤਾ-ਨਿਰਦੇਸ਼ਕਾਂ ਵੱਲੋਂ ਕਈ ਤਰ੍ਹਾਂ ਦੀਆਂ ਚੰਗੀਆਂ ਫਿਲਮਾਂ ਦੇ ਆਫਰ ਆਉਣੇ ਬੰਦ ਜਿਹੇ ਹੋ ਗਏ ਸਨ। ਕੁਝ ਸਮੇਂ ਤੋਂ ਉਸ ਨੇ ਆਪਣਾ ਰਾਹ ਬਦਲ ਲਿਆ ਹੈ ਤੇ ਅੱਜ ਕੱਲ੍ਹ ਬਹੁਤੀਆਂ ਫਿਲਮਾਂ ਕਰਨ ਦੀ ਥਾਂ ਉਹ ਘੱਟ, ਪਰ ਪਸੰਦ ਆਉਣ ਵਾਲੀਆਂ ਵੱਖ ਵੱਖ ਤਰ੍ਹਾਂ ਦੀਆਂ ਕਹਾਣੀਆਂ ਵਾਲੀਆਂ ਫਿਲਮਾਂ ਨੂੰ ਪਹਿਲ ਦੇ ਰਿਹਾ ਹੈ। ਉਸ ਦੀ ਅਗਲੀ ਫਿਲਮ ‘ਚੀਟ ਇੰਡੀਆ’ ਵੀ ਅਜਿਹੀ ਹੀ ਫਿਲਮ ਹੈ ਜਿਸ ਵਿੱਚ ਮੁੱਖ ਭੂਮਿਕਾ ਨਿਭਾਅ ਰਹੇ ਇਮਰਾਨ ਹਾਸ਼ਮੀ ਨੇ ਮੌਜੂਦਾ ਸਿਖਿਆ ਪ੍ਰਬੰਧਾਂ 'ਤੇ ਚੋਟ ਕੀਤੀ ਹੈ।
ਇਮਰਾਨ ਦਾ ਕਹਿਣਾ ਹੈ ਕਿ ਰਸਮੀ ਸਿਖਿਆ ਪ੍ਰਣਾਲੀ ਛੋਟੇ ਬੱਚਿਆਂ ਦੇ ਦਿਮਾਗੀ ਵਿਕਾਸ ਲਈ ਪੂਰਨ ਤੌਰ 'ਤੇ ਸਹੀ ਨਹੀਂ ਤੇ ਉਸ ਦਾ ਮੰਨਣਾ ਹੈ ਕਿ ਇਹੋ ਜਿਹੀ ਸਿਖਿਆ ਸਫਲਤਾ ਦਾ ਆਧਾਰ ਨਹੀਂ ਹੋ ਸਕਦੀ। ਰਸਮੀ ਸਿਖਿਆ ਦੀ ਕੁਆਲਿਟੀ ਬਾਰੇ ਪੁੱਛੇ ਜਾਣ 'ਤੇ ਉਸ ਨੇ ਕਿਹਾ, ‘‘ਮੈਂ ਕੁਝ ਅਜਿਹੇ ਬੇਵਕੂਫਾਂ ਨੂੰ ਜਾਣਦਾ ਹਾਂ ਜਿਨ੍ਹਾਂ ਕੋਲ ਵਧੀਆ ਰਸਮੀ ਸਿਖਿਆ ਹੈ। ਮੈਂ ਕੁਝ ਅਜਿਹੇ ਬੁੱਧੀਮਾਨ ਤੇ ਬਹੁਤ ਸਮਝਦਾਰ ਲੋਕਾਂ ਨੂੰ ਵੀ ਮਿਲਿਆ ਹਾਂ ਜਿਸ ਕੋਲ ਬਿਹਤਰੀਨ ਰਸਮੀ ਸਿਖਿਆ ਜਾਂ ਡਿਗਰੀ ਨਹੀਂ ਹੈ। ਰਸਮੀ ਸਿਖਿਆ ਜ਼ਿੰਦਗੀ 'ਚ ਤੁਹਾਨੂੰ ਸਫਲਤਾ ਦਿਵਾਉਣ ਦਾ ਮਾਪਦੰਡ ਨਹੀਂ ਹੈ।”