ਪ੍ਰਯਾਗਰਾਜ, 6 ਜਨਵਰੀ (ਪੋਸਟ ਬਿਊਰੋ)- ਅਰਧ ਕੁੰਭ ਮੇਲਾ ਖੇਤਰ ਤੋਂ ਕਰੀਬ 200 ਮੀਟਰ ਦੂਰ ਸੰਗਮ ਤਟ 'ਤੇ ਖੜ੍ਹੇ ਪੱਤਰਕਾਰ ਥੋੜ੍ਹਾ ਅੱਗੇ ਵਧੇ ਤਾਂ ਹੈਰਾਨੀ ਵਾਲਾ ਨਜ਼ਾਰਾ ਸੀ। ਇਥੇ ਪਾਂਡਿਆਂ ਦੀ ਲਾਈਨ ਵਿੱਚ ਬੈਠੇ ਰਾਮਕ੍ਰਿਸ਼ਨ ਤਿਵਾੜੀ ਇੱਕ ਸ਼ਰਧਾਲੂ ਤੋਂ ਸਵਾਈਪ ਮਸ਼ੀਨ ਨਾਲ ਦੱਖਣਾ ਲੈ ਰਹੇ ਸਨ।
32 ਸਾਲਾ ਰਾਮਕ੍ਰਿਸ਼ਨ ਤਿਵਾੜੀ ਨੇ ਦੱਸਿਆ ਕਿ ਕਰੀਬ ਚਾਲੀ ਫੀਸਦੀ ਸ਼ਰਧਾਲੂ ਸਵਾਈਪ ਮਸ਼ੀਨ ਨਾਲ ਪੇਮੈਂਟ ਕਰਦੇ ਹਨ। ਉਨ੍ਹਾਂ ਦੱਸਿਆ ਕਿ ਅਸੀਂ ਸੋਚਿਆ ਕਿ ਇਥੇ ਦੇਸ਼-ਵਿਦੇਸ਼ ਤੋਂ ਲੋਕ ਆਉਂਦੇ ਹਨ, ਇਸ ਲਈ ਜਦ ਸਭ ਕੁਝ ਹਾਈਟੈੱਕ ਹੋ ਰਿਹਾ ਹੈ ਤਾਂ ਅਸੀਂ ਹਾਈਟੈੱਕ ਕਿਉਂ ਨਾ ਹੋਈਏ?
ਪੱਤਰਕਾਰ ਥੋੜ੍ਹਾ ਅੱਗੇ ਵਧੇ ਤਾਂ ਚਾਰ ਛਤਰ ਵਾਲੇ ਪ੍ਰਭਾਤ ਮਿਸ਼੍ਰ ਤੇ ਟੀਕਾ ਸਪੈਸ਼ਲਿਸਟ ਗੋਪਾਲ ਗੁਰੂ ਮਿਲੇ। ਉਹ ਵੀ ਦੋਵੇਂ ਜਣੇ ਪੇ ਟੀ ਐਮ ਦੇ ਰਾਹੀਂ ਦੱਖਣਾ ਲੈ ਰਹੇ ਹਨ। ਇਥੇ ਕਈ ਅਜਿਹੇ ਪਾਂਡੇ ਸਨ, ਜੋ ਦੱਖਣਾ ਦੇ ਲਈ ਇਸੇ ਤਰ੍ਹਾਂ ਵੱਖ-ਵੱਖ ਡਿਜੀਟਲ ਢੰਗ ਵਰਤ ਰਹੇ ਹਨ। ਪੰਜਾਬ ਨੈਸ਼ਨਲ ਬੈਂਕ ਇਸ ਮੇਲੇ ਲਈ ਈ-ਰੁਪਿਆ ਵੀ ਲਾਂਚ ਕਰ ਰਿਹਾ ਹੈ। ਇਸ ਮੇਲੇ ਦੇ ਸੂਚਨਾ ਵਿਭਾਗ ਦੇ ਡਿਪਟੀ ਡਾਇਰੈਕਟਰ ਸੰਜੇ ਰਾਏ ਨੇ ਦੱਸਿਆ ਕਿ ਮੇਲਾ ਅਥਾਰਟੀ ਦੇ ਨਾਲ ਪੀ ਐੱਨ ਬੀ ਦਾ ਐਗਰੀਮੈਂਟ ਹੋਇਆ ਹੈ। ਇਹ ਮੇਲੇ ਲਈ ਵਿਸ਼ੇਸ਼ ਤੌਰ ਉੱਤੇ ਈ-ਰੁਪਿਆ ਲਾਂਚ ਕਰਨਗੇ। ਜਿਸ ਨੂੰ ਨਕਦੀ ਗੁਆਚਣ ਦਾ ਡਰ ਹੈ ਉਹ ਮੇਲਾ ਖੇਤਰ ਵਿੱਚ ਲੱਗੇ ਸਟਾਲ ਉੱਤੇ ਕੈਸ਼ ਜਮ੍ਹਾ ਕਰ ਕੇ ਈ-ਰੁਪਿਆ ਕਾਰਡ ਲੈ ਸਕਦਾ ਹੈ। ਕਾਰਡ ਵਿੱਚ ਬਚਿਆ ਪੈਸਾ ਪੀ ਐੱਨ ਬੀ ਦੇ ਸਟਾਲ ਤੋਂ ਵਾਪਸ ਲੈਣ ਦੀ ਸਹੂਲਤ ਰਹੇਗੀ।
ਪੀ ਐੱਨ ਬੀ ਦੇ ਐੱਮ ਡੀ ਸੁਨੀਲ ਮਹਿਤਾ ਨੇ ਦੱਸਿਆ ਕਿ ਮੇਲਾ ਖੇਤਰ ਵਿੱਚ 1000 ਡਾਕਟਰਾਂ ਨੂੰ ਵੀ ਸਵਾਈਪ ਮਸ਼ੀਨ ਦਿੱਤੀ ਗਈ ਹੈ ਅਤੇ ਹੋਰਨਾਂ ਬੈਂਕਾਂ ਦੇ ਏ ਟੀ ਐੱਮ ਬੂਥ ਅਤੇ ਮੋਬਾਈਲ ਏ ਟੀ ਐਮ ਬੂਥ ਇਸ ਮੇਲਾ ਕੰਪਲੈਕਸ ਵਿੱਚ ਚੱਲਦੇ ਰਹਿਣਗੇ। ਅਧਿਕਾਰੀਆਂ ਦੇ ਮੁਤਾਬਕ 10 ਜਨਵਰੀ ਮਗਰੋਂ ਪਾਂਡਿਆਂ ਤੇ ਦੁਕਾਨਦਾਰਾਂ ਨੂੰ ਡਿਜੀਟਲ ਪੇਮੈਂਟ ਦੀਆਂ ਹੋਰ ਵੀ ਸਹੂਲਤਾਂ ਦਿੱਤੀਆਂ ਜਾਣਗੀਆਂ। ਪੇ ਟੀ ਐੱਮ ਨੇ ਵੀ ਕੁੰਭ ਵਿੱਚ ਦੁਕਾਨਾਂ 'ਤੇ ਆਪਣੀ ਸਹੂਲਤ ਦੇਣੀ ਸ਼ੁਰੂ ਕਰ ਦਿੱਤੀ ਹੈ। ਪਹਿਲੀ ਵਾਰ ਕੁੰਭ ਵਿੱਚ ਏਅਰ ਐਂਬੂਲੈਂਸ ਦਾ ਪ੍ਰਬੰਧ ਕੀਤਾ ਗਿਆ ਅਤੇ ਕੁੰਭ ਦੇ ਐਂਟਰੀ ਪੁਆਇੰਟਾਂ ਉਤੇ 20 ਸਿਗਨੇਚਰ ਗੇਟ ਬਣਾਏ ਗਏ ਹਨ। ਇਥੋਂ ਸ਼ਰਧਾਲੂ ਮੇਲੇ ਵਿੱਚ ਦਾਖਲ ਹੋਣਗੇ।