ਚੰਡੀਗੜ੍ਹ, 6 ਜਨਵਰੀ (ਪੋਸਟ ਬਿਊਰੋ)- ਪੰਜਾਬ ਦੇ ਦੋ ਬੈਂਕਾਂ ਮਾਲਵਾ ਗ੍ਰਾਮੀਣ ਬੈਂਕ (ਐੱਮ ਜੀ ਬੀ) ਅਤੇ ਸਤਲੁਜ ਗ੍ਰਾਮੀਣ ਬੈਂਕ (ਐੱਸ ਜੀ ਬੀ) ਨੂੰ ਪੰਜਾਬ ਗ੍ਰਾਮੀਣ ਬੈਂਕ (ਪੀ ਜੀ ਬੀ) ਵਿੱਚ ਮਿਲਾ ਦਿੱਤਾ ਗਿਆ ਹੈ। ਕੇਂਦਰ ਸਰਕਾਰ ਦੀ ਪੇਂਡੂ ਕਰਜ਼ਾ ਨੀਤੀ ਅਤੇ ਗ੍ਰਾਮੀਣ ਬੈਂਕਾਂ ਨੂੰ ਮਜ਼ਬੂਤ ਬਣਾਉਣ ਦੇ ਏਜੰਡੇ ਵਜੋਂ ਇਹ ਕਦਮ ਚੁੱਕਿਆ ਗਿਆ ਹੈ। ਰਲੇਵੇਂ ਦੇ ਬਾਅਦ ਬੈਂਕਾਂ ਨੂੰ ਤਕਨੀਕੀ ਪੱਖੋਂ ਤਕੜੇ ਕਰਨ ਲਈ ਪੀ ਐੱਨ ਬੀ ਵੱਲੋਂ ਸਪਾਂਸਰ ਕੀਤਾ ਗਿਆ ਹੈ।
ਇਸ ਸੰਬੰਧ ਵਿੱਚ ਹੋਏ ਫੈਸਲੇ ਵਿੱਚ ਕਿਹਾ ਗਿਆ ਹੈ ਕਿ ਇਹ ਤਿੰਨੇ ਬੈਂਕ ਪਹਿਲਾਂ ਵਾਂਗ ਕੰਮ ਕਰਦੇ ਰਹਿਣਗੇ ਅਤੇ ਪੰਜਾਬ ਵਿੱਚ ਇਨ੍ਹਾਂ ਦੇ ਕੰਮਾਂ ਅਤੇ ਰੋਜ਼ਾਨਾ ਗਤੀਵਿਧੀਆਂ ਵਿੱਚ ਕੋਈ ਫਰਕ ਨਹੀਂ ਪਵੇਗਾ। ਨਕਦੀ ਜਮ੍ਹਾ, ਨਿਕਾਸੀ ਵਰਗੇ ਸਾਰੇ ਬੈਂਕਿੰਗ ਕਾਰਜ, ਖਾਤਾ ਖੋਲ੍ਹਣਾ ਅਤੇ ਕਰਜ਼ਾ ਦੇਣ ਬਾਰੇ ਗਤੀਵਿਧੀਆਂ ਇਨ੍ਹਾਂ ਬੈਂਕਾਂ ਦੀਆਂ ਬ੍ਰਾਂਚਾਂ ਵਿੱਚ ਬਿਨਾਂ ਰੁਕਾਵਟ ਤੋਂ ਚੱਲਦੀਆਂ ਰਹਿਣਗੀਆਂ। ਇਨ੍ਹਾਂ ਬੈਂਕਾਂ ਐੱਮ ਜੀ ਬੀ ਅਤੇ ਐੱਸ ਜੀ ਬੀ ਦਾ ਰਲੇਵਾਂ ਹੋਣ ਨਾਲ ਪੀ ਜੀ ਬੀ ਦੀ ਪੂੰਜੀ ਵਿੱਚ ਵਾਧਾ ਹੋਇਆ ਹੈ, ਜਿਹੜੀ 2250 ਕਰੋੜ ਤੋਂ ਵਧ ਕੇ ਸਰਕਾਰ ਦੀ ਉਚ ਹਿੱਸੇਦਾਰੀ ਨਾਲ 2536 ਕਰੋੜ ਹੋ ਗਈ ਹੈ ਅਤੇ ਇਸ ਰਿਜ਼ਰਵ ਰਾਸ਼ੀ 692.56 ਕਰੋੜ ਤੋਂ ਵਧ ਕੇ 912.95 ਕਰੋੜ ਰੁਪਏ ਹੋ ਗਈ ਤੇ ਕੁੱਲ ਜਾਇਦਾਦ ਵਿੱਚ ਹਿੱਸੇਦਾਰੀ ਹੋਣ ਨਾਲ ਇਹ 715.06 ਕਰੋੜ ਰੁਪਏ ਤੋਂ ਵਧ ਕੇ 938.32 ਕਰੋੜ ਰੁਪਏ ਹੋ ਗਈ ਹੈ। ਪੇਂਡੂ ਬੈਂਕਾਂ ਦੇ ਇਸ ਰਲੇਵੇਂ ਨਾਲ ਇਨ੍ਹਾਂ ਦੇ ਵੱਖੋ-ਵੱਖ ਅਪਰੇਸ਼ਨ ਦੀ ਲਾਗਤ ਵਿੱਚ ਕਮੀ ਆਏਗੀ ਅਤੇ ਲਾਭ ਵਿੱਚ ਵਾਧਾ ਹੋਵੇਗਾ। ਇਸ ਦੇ ਇਲਾਵਾ ਸਾਂਝੀ ਗ੍ਰਾਹਕ ਸੇਵਾ ਦੀ ਵਿਵਸਥਾ ਬਣਨ ਨਾਲ ਪੇਂਡੂ ਬੈਂਕਾਂ ਨੂੰ ਵੱਖ-ਵੱਖ ਡਿਜੀਟਲ ਉਤਪਾਦਾਂ ਅਤੇ ਮੁਕਾਬਲੇ ਵਾਲੇ ਬੈਂਕਿੰਗ ਉਤਪਾਦਾਂ ਨੂੰ ਪੇਸ਼ ਕਰਨ ਵਿੱਚ ਵੀ ਮਦਦ ਮਿਲੇਗੀ। ਇਸ ਯੋਜਨਾ ਦੇ ਬਾਰੇ ਪੰਜਾਬ ਨੈਸ਼ਨਲ ਬੈਂਕ (ਪੀ ਐੱਨ ਬੀ) ਦੇ ਇੱਕ ਉਚ ਅਧਿਕਾਰੀ ਨੇ ਦੱਸਿਆ ਕਿ ਇਸ ਦਾ ਸਿੱਧਾ ਲਾਭ ਇਹ ਹੋਵੇਗਾ ਕਿ ਹਾਲੇ ਤੱਕ ਵੱਖ-ਵੱਖ ਬਿਜ਼ਨਸ ਕਰਦੇ ਤਿੰਨਾਂ ਬੈਂਕਾਂ ਦੀ ਬੈਲੇਂਸ ਸ਼ੀਟ ਮਜ਼ਬੂਤ ਹੋਵੇਗੀ। ਪੀ ਐੱਨ ਬੀ ਦੀ ਸਪਾਂਸਰਸ਼ਿਪ ਦੇ ਬਾਰੇ ਉਨ੍ਹਾਂ ਦੱਸਿਆ ਕਿ ਇਕੱਠੇ ਹੋਏ ਪੇਂਡੂ ਬੈਂਕਾਂ ਦੇ ਕੰਮ ਵਿੱਚ ਪੀ ਐੱਨ ਬੀ ਦਾ ਕੋਈ ਦਖਲ ਨਹੀਂ ਹੋਵੇਗਾ, ਸਗੋਂ ਪੀ ਐੱਨ ਬੀ ਇਨ੍ਹਾਂ ਬੈਂਕਾਂ ਨੂੰ ਸੁਚਾਰੂ ਕੰਮ-ਕਾਜ ਲਈ ਆਧੁਨਿਕ ਤਕਨੀਕ ਅਤੇ ਮੈਨਪਾਵਰ ਪੇਸ਼ ਕਰੇਗੀ।