ਚੰਡੀਗੜ੍ਹ, 3 ਜਨਵਰੀ (ਪੋਸਟ ਬਿਊਰੋ)- ਬੱਚਿਆਂ ਦੀ ਕਸਟਡੀ ਦੇ ਕੇਸ ਵਿੱਚ ਹਾਈ ਕੋਰਟ ਨੇ ਇੱਕ ਅਰਜ਼ੀ ਸੁਣਨ ਪਿੱਛੋਂ ਕਿਹਾ ਕਿ ਬੱਚਿਆਂ ਦੀ ਦੇਖਭਾਲ ਮਾਂ ਤੋਂ ਵੱਧ ਹੋਰ ਕੋਈ ਰਿਸ਼ਤੇਦਾਰ ਨਹੀਂ ਕਰ ਸਕਦਾ। ਹਾਈ ਕੋਰਟ ਨੇ ਕਿਹਾ, ਭਾਵੇਂ ਕੋਈ ਹੋਰ ਰਿਸ਼ਤੇਦਾਰ ਬੱਚਿਆਂ ਨਾਲ ਬੇਹੱਦ ਲਗਾਓ ਰੱਖਦਾ ਹੋਵੇ, ਪ੍ਰੰਤੂ ਮਾਂ ਤੋਂ ਵੱਧ ਬੱਚਿਆਂ ਦੀਆਂ ਜ਼ਰੂਰਤਾਂ ਅਤੇ ਉਨ੍ਹਾਂ ਦੀ ਦੇਖਭਾਲ ਕੋਈ ਨਹੀਂ ਕਰ ਸਕਦਾ। ਇਸ ਲਈ ਹਾਈ ਕੋਰਟ ਨੇ ਇਸ ਕੇਸ ਵਿੱਚ ਬੱਚਿਆਂ ਦੀ ਕਸਟਡੀ ਮਾਂ ਨੂੰ ਸੌਂਪਦੇ ਹੋਏ ਅਰਜ਼ੀ ਦਾ ਨਿਬੇੜਾ ਕਰ ਦਿੱਤਾ ਹੈ।
ਸੁਣਵਾਈ ਅਧੀਨ ਕੇਸ ਵਿੱਚ ਬੱਚਿਆਂ ਦੀ ਮਾਂ ਦੇ ਹਿਰਾਸਤ ਵਿੱਚ ਹੋਣ ਕਾਰਨ ਉਸ ਦੇ ਦੋ ਬੱਚਿਆਂ ਦੀ ਕਸਟਡੀ ਬੱਚਿਆਂ ਦੇ ਪਿਤਾ ਨੂੰ ਸੌਂਪੀ ਗਈ ਸੀ, ਪਰ ਬਾਅਦ ਵਿੱਚ ਬੱਚਿਆਂ ਦਾ ਪਿਤਾ ਵੀ ਵਿਦੇਸ਼ ਚਲਾ ਗਿਆ ਤੇ ਜਾਂਦੇ ਸਮੇਂ ਉਸ ਨੇ ਬੱਚਿਆਂ ਦੀ ਜ਼ਿੰਮੇਵਾਰੀ ਆਪਣੀ ਭੈਣ ਅਤੇ ਜੀਜੇ ਨੂੰ ਦੇ ਦਿੱਤੀ। ਮਾਂ ਨੂੰ ਕੇਸ ਤੋਂ ਜ਼ਮਾਨਤ ਮਿਲੀ ਤਾਂ ਉਸ ਨੇ ਬੱਚਿਆਂ ਦੀ ਕਸਟਡੀ ਦੀ ਮੰਗ ਕੀਤੀ। ਉਸ ਦਾ ਕਹਿਣਾ ਸੀ ਕਿ ਉਹੀ ਆਪਣੇ ਬੱਚਿਆਂ ਦੀ ਸਹੀ ਦੇਖਭਾਲ ਕਰ ਸਕਦੀ ਹੈ, ਇਸ ਲਈ ਵਿੱਚ ਬੱਚੇ ਉਸ ਦੇ ਹਵਾਲੇ ਕੀਤੇ ਜਾਣੇ ਚਾਹੀਦੇ ਹਨ। ਬੱਚਿਆਂ ਦੀ ਭੂਆ ਤੇ ਉਸ ਦੇ ਪਤੀ ਨੇ ਕਿਹਾ ਕਿ ਬੱਚਿਆਂ ਦੀ ਦੇਖਭਾਲ ਉਹ ਸਹੀ ਕਰ ਰਹੇ ਹਨ ਅਤੇ ਬੱਚਿਆਂ ਦਾ ਪਿਤਾ ਵਿਦੇਸ਼ ਤੋਂ ਪੂਰਾ ਖਰਚਾ ਦੇ ਰਿਹਾ ਹੈ, ਜਦ ਕਿ ਬੱਚਿਆਂ ਦੀ ਮਾਂ ਦੇ ਕੋਲ ਆਮਦਨ ਦੇ ਵੀ ਲੋੜੀਂਦੇ ਸਾਧਨ ਨਹੀਂ। ਹਾਈ ਕੋਰਟ ਨੇ ਸਾਰੀਆਂ ਦਲੀਲਾਂ ਨੂੰ ਰੱਦ ਕਰ ਕੇ ਕਪੂਰਥਲਾ ਦੇ ਐੱਸ ਐੱਸ ਪੀ ਨੂੰ ਬੱਚੇ ਮਾਂ ਨੂੰ ਸੌਂਪਣ ਦੇ ਹੁਕਮ ਦੇ ਦਿੱਤੇ ਅਤੇ ਕਿਹਾ ਕਿ ਜਦ ਤੱਕ ਬੱਚਿਆਂ ਦਾ ਪਿਤਾ ਵਾਪਸ ਨਹੀਂ ਆ ਜਾਂਦਾ, ਤਦ ਤੱਕ ਬੱਚੇ ਮਾਂ ਦੇ ਕੋਲ ਰਹਿਣਗੇ।
ਵਰਨਣ ਯੋਗ ਹੈ ਕਿ ਬੱਚਿਆਂ ਦੇ ਮਾਤਾ-ਪਿਤਾ ਦਾ ਵਿਆਹ 2007 ਵਿੱਚ ਹੋਇਆ ਸੀ ਤੇ ਇਸ ਦੇ ਬਾਅਦ ਪਤੀ ਇਟਲੀ ਚਲਾ ਗਿਆ ਸੀ। ਉਸ ਦੇ ਬਾਅਦ ਨਾ ਉਹ ਪਤਨੀ ਦਾ ਤੇ ਨਾ ਬੱਚਿਆਂ ਦਾ ਗੁਜ਼ਾਰਾ ਭੱਤਾ ਦਿੰਦਾ ਸੀ। ਇਸੇ ਦੌਰਾਨ ਪਤਨੀ ਦੋਵਾਂ ਬੱਚਿਆਂ ਨਾਲ ਆਪਣੇ ਭਰਾ ਕੋਲ ਮਲੇਸ਼ੀਆ ਚਲੀ ਗਈ। ਉਸ ਦੇ ਜਾਣ ਦੇ ਬਾਅਦ ਪਤੀ ਨੇ ਭਾਰਤ ਆ ਕੇ ਆਪਣੀ ਪਤਨੀ ਉੱਤੇ ਘਰ ਦਾ ਸੋਨਾ ਚੋਰੀ ਕਰਨ ਦਾ ਦੋਸ਼ ਲਗਾ ਕੇ ਕੇਸ ਦਰਜ ਕਰਵਾ ਦਿੱਤਾ। ਜਦ ਪਤਨੀ ਵਾਪਸ ਆਈ ਤਾਂ ਪੁਲਸ ਨੇ ਉਸ ਨੂੰ ਗ੍ਰਿਫਤਾਰ ਕਰ ਲਿਆ ਅਤੇ ਦੋਵਾਂ ਬੱਚਿਆਂ ਦੀ ਕਸਟਡੀ ਮਾਂ ਦੀ ਗੈਰ ਹਾਜ਼ਰੀ ਵਿੱਚ ਪਿਤਾ ਨੂੰ ਦੇ ਦਿੱਤੀ। ਇਸ ਪਿੱਛੋਂ ਪਿਤਾ ਬੱਚਿਆਂ ਨੂੰ ਆਪਣੀ ਭੈਣ ਤੇ ਜੀਜੇ ਕੋਲ ਛੱਡ ਕੇ ਵਿਦੇਸ਼ ਮੁੜ ਗਿਆ। ਇਸੇ ਦੌਰਾਨ ਪਤਨੀ ਨੂੰ ਜ਼ਮਾਨਤ ਮਿਲ ਗਈ ਅਤੇ ਉਸ ਨੇ ਟਰਾਇਲ ਕੋਰਟ ਵਿੱਚ ਅਰਜ਼ੀ ਦੇ ਕੇ ਬੱਚਿਆਂ ਦੀ ਮੰਗ ਕੀਤੀ, ਪ੍ਰੰਤੂ ਕੋਰਟ ਨੇ ਉਸ ਦੀ ਮੰਗ ਰੱਦ ਕਰ ਦਿੱਤੀ। ਇਸੇ ਫੈਸਲੇ ਨੂੰ ਬੱਚਿਆਂ ਦੀ ਮਾਂ ਨੇ ਹਾਈ ਕੋਰਟ ਵਿੱਚ ਚੁਣੌਤੀ ਦਿੱਤੀ ਸੀ।