ਬੀਤੇ ਇੱਕ ਮਹੀਨੇ ਤੋਂ ਟਾਈਗਰ ਸ਼ਰਾਫ, ਤਾਰਾ ਸੁਤਾਰੀਆ ਅਤੇ ਨਵਾਜੂਦੀਨ ਸਿਦਿੱਕੀ ਸਟਾਰਰ ‘ਹੀਰੋਪੰਤੀ 2’ ਦੀ ਸ਼ੂਟਿੰਗ ਲੰਡਨ ਵਿੱਚ ਕੀਤੀ ਜਾ ਰਹੀ ਹੈ। ਅਗਲੇ ਸੱਤ ਦਿਨਾਂ ਵਿੱਚ ਇਹ ਸ਼ਡਿਊਲ ਪੂਰਾ ਹੋ ਜਾਏਗਾ। ਇਸ ਦੇ ਬਾਅਦ ਟਾਈਗਰ ਲੰਡਨ ਵਿੱਚ ਹੀ ਵਿਕਾਸ ਬਹਿਲ ਦੀ ‘ਗਣਪਤ’ ਦੀ ਸ਼ੂਟਿੰਗ ਸ਼ੁਰੂ ਕਰਨਗੇ। ਜਿੱਥੇ ‘ਗਣਪਤ’ ਦੀ ਕਹਾਣੀ ਅੱਜ ਤੋਂ 69 ਸਾਲ ਅੱਗੇ ਦੀ ਦੁਨੀਆ ਵਿੱਚ ਸੈੱਟ ਹੈ, ਉਥੇ ‘ਹੀਰੋਪੰਤੀ 2’ ਵਿੱਚ ਟਾਈਗਰ ਸਪਾਈ ਦੇ ਰੋਲ ਵਿੱਚ ਹੈ। ਇਸ ਕਹਾਣੀ ਵਿੱਚ ਟਾਈਗਰ ਦਾ ਕਿਰਦਾਰ ਵਿਲੇਨ ਬਣੇ ਨਵਾਜ਼ ਦੇ ਖਤਰਨਾਕ ਮਨਸੂਬਿਆਂ ਨੂੰ ਨਾਕਾਮ ਕਰਨ ਲਈ ਭਾਰਤ, ਲੰਡਨ ਅਤੇ ਰੂਸ ਸਮੇਤ ਕਈ ਦੇਸ਼ਾਂ ਦਾ ਸਫਰ ਕਰਦਾ ਹੈ।
‘ਬਾਗੀ 3’ ਦੀ ਤਰ੍ਹਾਂ ‘ਹੀਰੋਪੰਤੀ 2’ ਵਿੱਚ ਵੀ ਐਕਸ਼ਨ ਕੋਰੀਓਗਰਾਫੀ ਅਹਿਮਦ ਖਾਨ ਹੀ ਕਰਨਗੇ। ਇਸ ਦੇ ਇਲਾਵਾ ਟੀਮ ਨੇ ਲੰਡਨ ਦੇ ਕੁਝ ਕੋ-ਆਰਡੀਨੇਟਰਾਂ ਨੂੰ ਹਾਇਰ ਕੀਤਾ ਹੈ। ਜਿੱਥੇ ‘ਬਾਗੀ 3’ ਵਿੱਚ ਟਾਈਗਰ ਨੇ ਚਾਰ ਸੌ ਬੰਬ ਧਮਾਕਿਆਂ ਵਿੱਚ ਐਕਸ਼ਨ ਸੀਕਵੈਂਸ ਫਿਲਮਾਇਆ ਸੀ, ਉਥੇ ‘ਹੀਰੋਪੰਤੀ 2’ ਵਿੱਚ ਉਹ ਦੋ ਤੇਜ਼ ਰਫਤਾਰ ਬੁਲੇਟ ਟਰੇਨਾਂ ਦੀ ਛੱਤ ਉੱਤੇ ਛਲਾਂਗ ਲਾਉਂਦੇ ਤੇ ਐਕਸ਼ਨ ਕਰਦੇ ਨਜ਼ਰ ਆਉਣਗੇ। ਟਾਈਗਰ ਨੇ ਇਹ ਸੀਨ ਬਿਨਾਂ ਬਾਡੀ ਡਬਲ ਤੇ ਬਿਨਾਂ ਵਾਇਰ ਦੇ ਸ਼ੂਟ ਕੀਤਾ ਹੈ। ਇਸ ਇੱਕੋ-ਇੱਕ ਸੀਕਵੈਂਸ ਨੂੰ ਸ਼ੂਟ ਕਰਨ ਵਿੱਚ 15 ਦਿਨ ਸਮਾਂ ਲੱਗਾ ਸੀ।