ਲਖਨਊ, 23 ਸਤੰਬਰ, (ਪੋਸਟ ਬਿਊਰੋ)- ਅਯੁੱਧਿਆ ਦੇ ਇੱਕ ਪ੍ਰਾਚੀਨ ਮੰਦਰ ਤੋਂ ਮੂਰਤੀਆਂ ਚੋਰੀ ਹੋਣ ਦੀ ਘਟਨਾ ਵਾਪਰਨ ਦਾ ਪਤਾ ਲੱਗਾ ਹੈ।ਇਸ ਬਾਰੇ ਹੈਦਰਗੰਜ ਥਾਣਾ ਖੇਤਰਦੇ ਖਪਰਾਦੀਹ ਰਾਜ ਦੇ ਰਾਮ-ਜਾਨਕੀ ਮੰਦਰ ਦੀ ਚੋਰੀ ਦਾ ਕੇਸ ਦਰਜ ਕੀਤਾ ਗਿਆ ਹੈ। ਚੋਰਾਂ ਨੇ ਰਾਮ-ਜਾਨਕੀ ਮੰਦਰ ਤੋਂ ਅਸ਼ਟ-ਧਾਤੂ ਦੀਆਂ 9 ਵੱਡੀਆਂ ਅਤੇ ਛੋਟੀਆਂ ਮੂਰਤੀਆਂ ਚੋਰੀ ਕੀਤੀਆਂ ਹਨ।ਇਹ ਸਾਰੀਆਂ ਮੂਰਤੀਆਂ ਬਹੁਤ ਪੁਰਾਣੀਆਂ ਹਨ ਅਤੇ ਇਨ੍ਹਾਂ ਦੀ ਕੀਮਤ ਕਰੋੜਾਂ ਰੁਪਏ ਦੱਸੀ ਜਾਂਦੀ ਹੈ।
ਸਾਰੇ ਸੰਸਾਰ ਦੀਆਂ ਨਜ਼ਰਾਂ ਦੇ ਕੇਂਦਰ ਇਸ ਸ਼ਹਿਰ ਦੇ ਇੱਕ ਪ੍ਰਾਚੀਨ ਮੰਦਰ ਵਿੱਚ ਇਸ ਘਟਨਾ ਦੀ ਜਾਣਕਾਰੀ ਮਿਲਦੇ ਸਾਰ ਪੁਲਿਸ ਨੇ ਫੌਰੈਂਸਿਕ ਟੀਮ ਅਤੇ ਡੌਗ ਸਕੁਆਡ ਦੀ ਮਦਦ ਨਾਲ ਜਾਂਚ ਕੀਤੀ ਅਤੇ ਕਰਾਈਮ ਬ੍ਰਾਂਚ ਦੀ ਟੀਮ ਨੇ ਵੀ ਮੌਕੇ ਉੱਤੇਆ ਕੇ ਜਾਂਚ ਕੀਤੀ ਹੈ। ਚੋਰਾਂ ਨੇ ਰਾਮ-ਜਾਨਕੀ ਮੰਦਰ ਤੋਂ ਕੁੱਲ ਨੌ ਪੁਰਾਤਨ ਕੀਮਤੀ ਮੂਰਤੀਆਂ ਚੋਰੀ ਕੀਤੀਆਂ ਹਨ, ਪਰ ਇਸ ਦੌਰਾਨ ਘਬਰਾਹਟ ਵਿੱਚ ਉਹ ਮੰਦਰ ਦੇ ਵਿਹੜੇ ਵਿੱਚਢਾਈ ਇੰਚ ਦੀ ਛੋਟੀ ਮੂਰਤੀ ਛੱਡ ਗਏ, ਜਿਸਦੀ ਜਾਂਚ ਤੋਂ ਪੁਲਸ ਅਗਲੇ ਕਦਮ ਪੁੱਟ ਰਹੀ ਹੈ। ਮੰਦਰ ਦੇ ਪੁਜਾਰੀ ਸੌਭਨਾਥ ਤਿਵਾਰੀ ਨੇ ਦੱਸਿਆ ਕਿ ਚੋਰੀ ਹੋਈਆਂ ਮੂਰਤੀਆਂਵਿੱਚ ਭਗਵਾਨ ਰਾਮ, ਮਾਤਾ ਸੀਤਾ, ਹਨੂੰਮਾਨ, ਕ੍ਰਿਸ਼ਨ ਤੇ ਹੋਰ ਦੇਵਤਿਆਂ ਦੀਆਂ ਮੂਰਤੀਆਂ ਸ਼ਾਮਲ ਹਨ।ਰਾਮ-ਜਾਨਕੀ ਮੰਦਰ ਵਿੱਚ ਚੋਰੀ ਦੀ ਇਹ ਤੀਸਰੀ ਘਟਨਾ ਹੈ। ਇਸ ਤੋਂ ਪਹਿਲਾਂ ਵੀ ਦੋ ਵਾਰ ਅਸ਼ਟ-ਧਾਤੂ ਦੀਆਂ ਕੀਮਤੀ ਮੂਰਤੀਆਂ ਚੋਰੀ ਹੋਈਆਂ ਸਨ ਤੇ ਕਰੀਬ 15 ਸਾਲ ਪਹਿਲਾਂ ਵੀ ਇਸ ਮੰਦਰ ਦੇ ਵਿਹੜੇ ਵਿੱਚੋਂ ਰਾਮ, ਜਾਨਕੀ, ਲਕਸ਼ਮਣ ਅਤੇ ਹਨੂੰਮਾਨ ਜੀ ਦੀਆਂ ਇੱਕ ਫੁੱਟ ਉੱਚੀਆਂ ਅਸ਼ਟ-ਧਾਤੂ ਦੀਆਂ ਮੂਰਤੀਆਂ ਚੋਰੀ ਹੋਈਆਂ ਸਨ, ਜਿਹੜੀਆਂ ਅੱਜ ਤੱਕ ਲੱਭ ਨਹੀਂ ਸਨ ਸਕੀਆਂ।