ਨਵੀਂ ਦਿੱਲੀ, 14 ਦਸੰਬਰ (ਪੋਸਟ ਬਿਊਰੋ)- ਵਿਸ਼ੇਸ਼ ਅਦਾਲਤ ਨੇ ਆਗਰਾ ਦੇ ਭਾਰਤੀ ਜਨਤਾ ਪਾਰਟੀ ਦੇ ਪਾਰਲੀਮੈਂਟ ਮੈਂਬਰ ਰਮਾ ਸ਼ੰਕਰ ਕਠੇਰੀਆ ਦਾ ਗ੍ਰਿਫਤਾਰੀ ਵਾਰੰਟ ਜਾਰੀ ਕੀਤਾ ਹੈ। ਭਾਜਪਾ ਆਗੂ ਵਿਰੁੱਧ ਇਹ ਕਾਰਵਾਈ ਇਸ ਲਈ ਕੀਤੀ ਗਈ ਕਿ ਉਹ ਰੇਲ ਗੱਡੀ ਵਿੱਚ ਬਗੈਰ ਟਿਕਟ ਦੇ ਸਫਰ ਕਰ ਰਹੇ ਸਨ।
ਮਿਲੀ ਜਾਣਕਾਰੀ ਮੁਤਾਬਕ ਸਪੈਸ਼ਲ ਜੱਜ ਪਵਨ ਕੁਮਾਰ ਤਿ੍ਰਪਾਠੀ ਨੇ ਉਦੋਂ ਗ੍ਰਿਫਤਾਰੀ ਹੁਕਮ ਪਾਸ ਕੀਤਾ, ਜਦੋਂ ਕਠੇਰੀਆ ਰੇਲਵੇ ਅਦਾਲਤ ਦੇ ਪਹਿਲਾਂ ਦਿੱਤੇ ਹੁਕਮ ਤੋਂ ਬਾਅਦ ਪੇਸ਼ ਨਾ ਹੋਏ। ਕਠੇਰੀਆ ਤੇ ਉਨ੍ਹਾਂ ਦੇ ਸਾਥੀਆਂ ਨੂੰ ਰੇਲਵੇ ਅਧਿਕਾਰੀਆਂ ਨੇ 13 ਮਾਰਚ 2013 ਨੂੰ ਆਗਰਾ ਦੇ ਰਾਜਾ ਕੀ ਮੰਡੀ ਸਟੇਸ਼ਨ ਉਤੇ ਬਗੈਰ ਟਿਕਟ ਯਾਤਰਾ ਕਰਨ ਕਰ ਕੇ ਫੜਿਆ ਸੀ। ਉਸ ਸਮੇਂ ਕਠੇਰੀਆ ਆਪਣੇ ਰਸੂਖ ਦੇ ਜ਼ੋਰ ਉੱਤੇ ਖੁਦ ਨੂੰ ਅਤੇ ਆਪਣੇ ਕਰੀਬੀਆਂ ਨੂੰ ਛੁਡਾ ਕੇ ਲੈ ਗਏ ਸਨ। ਇਹੀ ਨਹੀਂ ਉਨ੍ਹਾਂ ਨੇ ਰੇਲ ਗੱਡੀ ਰੋਕਣ ਦੀ ਵੀ ਕੋਸ਼ਿਸ਼ ਕੀਤੀ ਸੀ। ਇਸ ਬਾਰੇ ਪੁਲਸ ਨੇ ਕਠੇਰੀਆ ਵਿਰੁੱਧ ਕੇਸ ਦਰਜ ਕੀਤਾ ਅਤੇ ਚਾਰਜਸ਼ੀਟ ਵੀ ਦਾਖਲ ਕਰ ਦਿੱਤੀ ਸੀ। ਇਸ ਸਾਲ ਪਾਰਲੀਮੈਂਟ ਮੈਂਬਰਾਂ ਅਤੇ ਵਿਧਾਇਕਾਂ ਨਾਲ ਜੁੜੇ ਕੇਸਾਂ ਦੀ ਸੁਣਵਾਈ ਬਾਰੇ ਬਣਾਈ ਗਈ ਵਿਸ਼ੇਸ਼ ਅਦਾਲਤ ਪਿੱਛੋਂ ਇਹ ਕੇਸ ਇਥੇ ਤਬਦੀਲ ਕੀਤਾ ਗਿਆ।