ਜਗਰਾਓਂ, 14 ਦਸੰਬਰ (ਪੋਸਟ ਬਿਊਰੋ)- ਥਾਣਾ ਜੋਧਾਂ ਦੇ ਪਿੰਡ ਰਤਨਾ ਦੇ ਇਤਿਹਾਸਕ ਗੁਰਦੁਆਰਾ ਸਾਹਿਬ ਦੇ ਸੰਤ ਤੋਂ ਮੋਟੀ ਰਕਮ ਹਥਿਆਉਣ ਲਈ ਚੁੱਕ ਕੇ ਲਿਜਾਣ ਵਾਲਿਆਂ ਨੂੰ ਜਦੋਂ ਸੰਤ ਨੇ ਰਕਮ ਦੇਣ ਤੋਂ ਨਾਂਹ ਕਰ ਦਿੱਤੀ ਤਾਂ ਉਨ੍ਹਾਂ ਨੇ ਕਾਰਵਾਈ ਦੇ ਡਰ ਕਾਰਨ ਹੀ ਸੰਤ ਦਾ ਕਤਲ ਕਰ ਦਿੱਤਾ।
ਵਰਨਣ ਯੋਗ ਹੈ ਕਿ ਚਾਰ ਦਸੰਬਰ ਨੂੰ ਗੁਰਦੁਆਰਾ ਸਾਹਿਬ ਦੇ ਸੰਤ ਅਜੈਬ ਸਿੰਘ ਨੂੰ ਇੰਡੀਕਾ ਸਵਾਰ ਆਪਣੇ ਨਾਲ ਇਸ ਸੰਤ ਦੀ ਇਨੋਵਾ ਸਮੇਤ ਲੈ ਗਏ ਸਨ। ਦੋ ਦਿਨ ਬੀਤਣ 'ਤੇ ਵੀ ਉਨ੍ਹਾਂ ਦੇ ਵਾਪਸ ਨਾ ਪਰਤਣ 'ਤੇ ਛੇ ਦਸੰਬਰ ਨੂੰ ਪੁਲਸ ਨੂੰ ਸ਼ਿਕਾਇਤ ਕੀਤੀ ਗਈ ਤਾਂ ਪੁਲਸ ਨੇ ਤੇਜ਼ੀ ਨਾਲ ਜਾਂਚ ਕੀਤੀ ਅਤੇ ਸੰਤ ਨੂੰ ਅਗਵਾ ਕਰਨ ਵਾਲੇ ਤਿੰਨ ਜਣੇ, ਸੰਤ ਦਾ ਪੁਰਾਣਾ ਚੇਲਾ ਦਇਆ ਸਿੰਘ ਵਾਸੀ ਜੰਮੂ ਕਸ਼ਮੀਰ, ਬਰਨਾਲਾ ਦੇ ਪਿੰਡ ਸੰਘੇੜਾ ਵਿਚਲੀ ਗਊਸ਼ਾਲਾ ਦਾ ਮੁੱਖ ਸੇਵਾਦਾਰ ਬਾਬਾ ਭੋਲਾ ਸਿੰਘ ਅਤੇ ਉਸ ਦਾ ਭਰਾ ਬਲਵੀਰ ਸਿੰਘ ਉਰਫ ਦੇਵ ਸਿੰਘ ਪੁਲਸ ਦੇ ਅੜਿੱਕੇ ਆ ਗਏ। ਉਨ੍ਹਾਂ ਨੇ ਪੁੱਛਗਿੱਛ ਦੌਰਾਨ ਦੱਸਿਆ ਕਿ ਉਨ੍ਹਾਂ ਨੇ ਸੰਤ ਦਾ ਕਤਲ ਕਰਕੇ ਸੰਘੇੜਾ ਗਊਸ਼ਾਲਾ 'ਚ ਦੱਬ ਦਿੱਤਾ ਹੈ। ਇਸ ਕਤਲ 'ਚ ਫੜੇ ਚਾਰਾਂ ਵਿਅਕਤੀਆਂ ਨੇ ਜਗਰਾਓਂ ਪੁਲਸ ਨੂੰ ਦੱਸਿਆ ਕਿ ਉਹ ਸੰਤ ਨੂੰ ਜਾਣਦੇ ਸਨ ਅਤੇ ਉਨ੍ਹਾਂ ਨੂੰ ਪਤਾ ਸੀ ਕਿ ਸੰਤ ਕੋਲ ਪੈਸਾ ਹੈ। ਇਹ ਪੈਸਾ ਹਥਿਆਉਣ ਲਈ ਉਨ੍ਹਾਂ ਨੇ ਸੰਤ ਅਜੈਬ ਸਿੰਘ ਨਾਲ ਸੰਪਰਕ ਕਰਕੇ ਉਨ੍ਹਾਂ ਨੂੰ ਕਿਹਾ ਕਿ ਇਕ ਸ਼ਰਧਾਲੂ ਨੇ ਗੁਰਦੁਆਰਾ ਸਾਹਿਬ ਲਈ ਪੰਜ ਲੱਖ ਰੁਪਏ ਦੀ ਸੇਵਾ ਕਰਨੀ ਹੈ, ਜਿਸ ਉੱਤੇ ਚਾਰ ਦਸੰਬਰ ਨੂੰ ਸੰਤ ਉਨ੍ਹਾਂ ਨਾਲ ਚੱਲ ਪਏ। ਉਨ੍ਹਾਂ ਨੇ ਯੋਜਨਾ ਅਨੁਸਾਰ ਸੰਤ ਅਜੈਬ ਸਿੰਘ ਨੂੰ ਜਾਨੋਂ ਮਾਰਨ ਦੀਆਂ ਧਮਕੀਆਂ ਦੇ ਕੇ ਪੈਸਿਆਂ ਦੀ ਮੰਗ ਕੀਤੀ, ਜਿਸ ਉੱਤੇ ਸੰਤ ਅਜੈਬ ਸਿੰਘ ਨੇ ਪੈਸੇ ਦੇਣ ਤੋਂ ਇਨਕਾਰ ਕਰ ਦਿੱਤਾ। ਕਾਫੀ ਜੱਦੋ ਜਹਿਦ ਤੋਂ ਬਾਅਦ ਜਦੋਂ ਸੰਤ ਰਾਜ਼ੀ ਨਾ ਹੋਏ ਤਾਂ ਉਨ੍ਹਾਂ ਨੇ ਸੋਚਿਆ ਕਿ ਜੇ ਸੰਤ ਨੂੰ ਇੰਝ ਹੀ ਛੱਡ ਦਿੱਤਾ ਤਾਂ ਉਹ ਉਨ੍ਹਾਂ 'ਤੇ ਕਾਰਵਾਈ ਕਰਵਾ ਦੇਣਗੇ। ਇਸੇ ਡਰੋਂ ਉਨ੍ਹਾਂ ਨੇ ਸੰਤ ਅਜੈਬ ਸਿੰਘ ਦਾ ਕਤਲ ਕਰ ਦਿੱਤਾ।