ਲੰਡਨ, 3 ਅਗਸਤ (ਪੋਸਟ ਬਿਊਰੋ)- ਇੱਕ ਪ੍ਰਾਚੀਨ ਤੇ ਬਹੁਤ ਕੀਮਤੀ ਸਿੱਕਾ ਪਿਛਲੇ ਸਾਲ ਬ੍ਰਿਟੇਨ ਵਿੱਚ ਇੱਕ ਖਜ਼ਾਨੇ ਦੀ ਭਾਲ ਦੇ ਦੌਰਾਨ ਮਿਲਿਆ ਸੀ। ਇਹ ਐਂਗਲੋ-ਸੈਕਸ਼ਨ ਸਿੱਕਾ ਵਿਲਟਸ਼ਾਇਰ ਅਤੇ ਹੈਂਪਸ਼ਾਇਰ ਸਰਹੱਦ ਉੱਤੇ ਵੈਸਟ ਡੀਨ ਵਿਖੇ ਮੈਟਲ ਡਿਟੈਕਟਰ ਨਾਲ ਲੱਭਿਆ ਸੀ। ਅਨੁਮਾਨ ਹੈ ਕਿ ਇਹ ਲੱਗਭਗ 200,000 ਪੌਂਡ ਯਾਨੀ ਕਰੀਬ ਦੋ ਕਰੋੜ ਰੁਪਏ ਵਿੱਚ ਵਿਕ ਸਕਦਾ ਹੈ। ਰਿਪੋਰਟਾਂ ਅਨੁਸਾਰ ਸਿੱਕੇ ਦਾ ਭਾਰ 4.82 ਗ੍ਰਾਮ ਹੈ।
ਇਸ ਸਿੱਕੇ ਦਾ ਵਿਆਸ ਇੱਕ ਇੰਚ ਤੋਂ ਘੱਟ ਹੈ। ਨਿਲਾਮੀ ਦੌਰਾਨ ਸਿੱਕੇ ਤੋਂ ਵੱਡੀ ਰਕਮ ਮਿਲਣ ਦੀ ਆਸ ਹੈ, ਜਿਦੀ ਨਿਲਾਮੀ 8 ਸਤੰਬਰ ਨੂੰ ਡਿਕਸ ਨੂਨਣ ਵੈਬ ਵੱਲੋਂ ਕਰਵਾਈ ਜਾਵੇਗੀ। ਜਿਸ ਵਿਅਕਤੀ ਨੇ ਸਿੱਕੇ ਦੀ ਖੋਜ ਕੀਤੀ ਸੀ, ਉਹ ਪਿਛਲੇ ਅੱਠ ਸਾਲਾਂ ਤੋਂ ਖਜ਼ਾਨੇ ਦੀ ਭਾਲ ਕਰ ਰਿਹਾ ਸੀ। ਉਹ ਕਈ ਸਾਲਾਂ ਤੋਂ ਵਿਲਟਸ਼ਾਇਰ ਅਤੇ ਹੈਂਪਸ਼ਾਇਰ ਦੀ ਸਰਹੱਦ ਉੱਤੇ ਸਿੱਕਿਆਂ ਦੀ ਭਾਲ ਵਿੱਚ ਘੁੰਮ ਰਿਹਾ ਸੀ। ਇੱਕ ਦਿਨ ਅਚਾਨਕ ਮੈਟਲ ਡਿਟੈਕਟਰ ਦੇ ਨਾਲ ਚਲਦੇ ਹੋਏ ਉਸ ਨੇ ਇੱਕ ਜਗ੍ਹਾ ਉੱਤੇ ਮੈਟਲ ਡਿਟੈਕਟਰ ਵਿੱਚ ਸੰਕੇਤਕ ਆਵਾਜ਼ ਸੁਣੀ ਅਤੇ ਖੁਦਾਈ ਦੌਰਾਨ ਇਹ ਸਿੱਕਾ ਮਿਲਿਆ। ਸਿੱਕੇ ਉੱਤੇ ਈਕਬਰਹਾਟ ਰੇਕਸ ਸੈਕਸ਼ਨ ਸ਼ਬਦ ਮੋਨੋਗ੍ਰਾਮ ਦੇ ਦੁਆਲੇ ਉਕਰਿਆ ਹੋਇਆ ਹੈ। ਸਿੱਕੇ ਦੀ ਜੂਨ 2021 ਵਿੱਚ ਜਾਂਚ ਕੀਤੀ ਗਈ ਸੀ, ਜਿਸ ਵਿੱਚ ਇਹ ‘ਸ਼ੁੱਧ ਸੋਨੇ' ਦਾ ਬਣਿਆ ਨਿਕਲਿਆ। ਜਾਂਚ ਤੋਂ ਪਤਾ ਲੱਗਾ ਕਿ ਚਾਂਦੀ ਅਤੇ ਤਾਂਬੇ ਦੀ ਮਾਤਰਾ ਵੀ ਇਸ ਵਿੱਚ ਮੌਜੂਦ ਹੈ।