ਜਲੰਧਰ, 13 ਦਸੰਬਰ (ਪੋਸਟ ਬਿਊਰੋ)- ਕਾਮੇਡੀ ਕਿੰਗ ਕਪਿਲ ਸ਼ਰਮਾ ਕੱਲ੍ਹ ਕਲੱਬ ਕਬਾਨਾ ਵਿੱਚ ਆਪਣੇ ਕਾਲਜ ਦੀ ਦੋਸਤ ਭਵਨੀਤ ਉਰਫ ਗਿੰਨੀ ਚਤਰਥ ਦੇ ਜੀਵਨ ਸਾਥੀ ਹੋ ਗਏ। ਦੋਵਾਂ ਦਾ ਵਿਆਹ ਏਥੇ ਸ਼ਾਹੀ ਅੰਦਾਜ਼ ਵਿੱਚ ਹੋਇਆ। ਇਸ ਵਿੱਚ ਬਾਲੀਵੁੱਡ ਦੀ ਕੋਈ ਇੱਕ ਵੀ ਵੱਡੀ ਹਸਤੀ ਨਹੀਂ ਪੁੱਜੀ, ਜਦ ਕਿ ਰਾਤ ਦੇ ਕਰੀਬ 10 ਵਜੇ ਤੱਕ ਸੋਹੇਲ ਖਾਨ ਦੇ ਪਹੁੰਚਣ ਦਾ ਇੰਤਜ਼ਾਰ ਹੋ ਰਿਹਾ ਸੀ।
ਵਿਆਹ ਦੇ ਲਿਬਾਸ ਵਿੱਚ ਸਜੇ ਨਵੇਂ ਜੋੜੇ ਨੇ ਕਲੱਬ ਕਬਾਨਾ ਦੇ ਬੀਬੀ ਜਾਨ ਰੈਸਟੋਰੈਂਟ ਵਿੱਚ ਤਿਆਰ ਕੀਤੇ ਖਾਸ ਮੰਚ 'ਤੇ ਮੀਡੀਆ ਦੇ ਸਾਹਮਣੇ ਫੋਟੋ ਸ਼ੂਟ ਕਰਵਾਇਆ। ਇਸ ਤੋਂ ਪਹਿਲਾਂ ਕਪਿਲ ਦੀ ਕਾਮੇਡੀ ਪ੍ਰੋਗਰਾਮ ਦੀ ਕਲਾਕਾਰ ਪ੍ਰੀਤੋ ਨੇ ਵੀ ਫੋਟੋ ਸ਼ੂਟ ਕਰਵਾਇਆ। ਰਿਮਝਿਮ ਬਾਰਿਸ਼ ਨੇ ਵਿਆਹ ਵਿੱਚ ਕੁਝ ਖਲਲ ਵੀ ਪਾਇਆ। ਕਪਿਲ ਸ਼ਰਮਾ ਅਤੇ ਗਿੰਨੀ ਪਰਵਾਰ ਅਤੇ ਸਕੇ ਸਬੰਧੀਆਂ ਨਾਲ ਸ਼ਾਮ ਕਰੀਬ ਅੱਠ ਵਜੇ ਕਲੱਬ ਕਬਾਨਾ ਵਿੱਚ ਪਹੁੰਚ ਗਏ। ਇਸ ਤੋਂ ਬਾਅਦ ਦੋਵੇਂ ਪਹਿਲਾਂ ਮੇਕਅਪ ਲਈ ਪੁੱਜੇ, ਫਿਰ ਉਨ੍ਹਾਂ ਨੇ ਵਿਆਹ ਵਿੱਚ ਪਹੁੰਚਣ ਵਾਲੇ ਮਹਿਮਾਨਾਂ ਨਾਲ ਮੁਲਾਕਾਤ ਕੀਤੀ।