ਫਗਵਾੜਾ, 13 ਦਸੰਬਰ (ਪੋਸਟ ਬਿਊਰੋ)- ਗੈਂਗਸਟਰ ਸੁੁੱਖਾ ਕਾਹਲਵਾਂ ਕਤਲ ਕੇਸ ਵਿੱਚ ਹਮਲਾਵਰਾਂ ਵੱਲੋਂ ਵਰਤੀ ਗਈ ਕਾਰ ਫਗਵਾੜਾ ਥਾਣੇ ਤੋਂ ਗਾਇਬ ਹੋ ਗਈ ਹੈ। ਕੇਸ ਪ੍ਰਾਪਰਟੀ ਵੱਜੋਂ ਜ਼ਬਤ ਕੀਤੀ ਗਈ ਇਸ ਕਾਰ ਦੀ ਦੁਰਵਰਤੋਂ ਕਰਨ ਉੱਤੇ ਇਸ ਥਾਣੇ ਦੇ ਸਾਬਕਾ ਐੱਸ ਐੱਚ ਓ ਇੰਸਪੈਕਟਰ ਇੰਦਰਜੀਤ ਸਿੰਘ 'ਤੇ ਕੇਸ ਦਰਜ ਕੀਤਾ ਗਿਆ ਹੈ। ਕਪੂਰਥਲਾ ਪੁਲਸ ਇੰਦਰਜੀਤ ਸਿੰਘ ਨੂੰ ਪ੍ਰੋਡਕਸ਼ਨ ਵਾਰੰਟ 'ਤੇ ਲੈਣ ਦੀ ਤਿਆਰੀ ਵਿੱਚ ਹੈ। ਪੁੱਛਗਿੱਛ ਵਿੱਚ ਉਸ ਤੋਂ ਗੈਂਗਸਟਰਾਂ ਤੋਂ ਜ਼ਬਤ ਕਾਰ ਦੇ ਬਾਰੇ ਪੁੱਛਗਿੱਛ ਕੀਤੀ ਜਾਏਗੀ। ਇਸ ਵਕਤ ਉਹ ਨਸ਼ਾ ਤਸਕਰੀ ਅਤੇ ਨਾਜਾਇਜ਼ ਹਥਿਆਰ ਰੱਖਣ ਦੇ ਮਾਮਲੇ ਵਿੱਚ ਜੇਲ੍ਹ ਵਿੱਚ ਬੰਦ ਹੈ। ਉਸ ਨੂੰ ਐਸ ਟੀ ਐਫ ਨੇ 2017 ਵਿੱਚ ਗ੍ਰਿਫਤਾਰ ਕੀਤਾ ਸੀ।
ਵਰਨਣ ਯੋਗ ਹੈ ਕਿ ਸੁੱਖਾ ਕਾਹਲਵਾਂ ਨੇ ਗੈਂਗਸਟਰ ਗੌਂਡਰ ਦੇ ਭਰਾ ਦਾ ਕਤਲ ਕੀਤਾ ਸੀ। ਇਸ ਦਾ ਬਦਲਾ ਲੈਣ ਲਈ 21 ਜਨਵਰੀ 2015 ਨੂੰ ਜਲੰਧਰ-ਫਗਵਾੜਾ ਜੀ ਟੀ ਰੋਡ ਉਤੇ ਗੈਂਗਸਟਰ ਸੁੱਖਾ ਕਾਹਲਵਾਂ ਉਤੇ ਗੌਂਡਰ ਦੇ ਸਾਥੀ ਗੈਂਗਸਟਰਾਂ ਨੇ ਗੋਲੀਆਂ ਚਲਾ ਕੇ ਉਸ ਦੀ ਹੱਤਿਆ ਕਰ ਦਿੱਤੀ ਸੀ। ਉਸ ਦਿਨ ਸੁੱਖਾ ਕਾਹਲਵਾਂ ਦੀ ਜਲੰਧਰ ਕੋਰਟ ਵਿੱਚ ਪੇਸ਼ੀ ਸੀ। ਪੇਸ਼ੀ ਦੇ ਬਾਅਦ ਪੁਲਸ ਦੀ ਜੀਪ ਵਿੱਚ ਉਸ ਨੂੰ ਵਾਪਸ ਨਾਭਾ ਜੇਲ੍ਹ ਲਿਜਾਇਆ ਜਾ ਰਿਹਾ ਸੀ। ਉਸ ਦੇ ਸਰੀਰ ਵਿੱਚੋਂ ਡਾਕਟਰਾਂ ਨੇ ਤਿੰਨ ਗੋਲੀਆਂ ਅਤੇ 35 ਛਰੇ ਕੱਢੇ ਸਨ। ਪੁਲਸ ਨੇ ਬਾਅਦ ਵਿੱਚ ਗੈਂਗਸਟਰਾਂ ਨੂੰ ਫੜ ਲਿਆ ਤੇ ਉਨ੍ਹਾਂ ਨੇ ਜੋ ਕਾਰ ਇਸਤੇਮਾਲ ਕੀਤੀ ਸੀ, ਉਸ ਨੂੰ ਫਗਵਾੜਾ ਥਾਣੇ ਵਿੱਚ ਰੱਖਿਆ ਗਿਆ ਸੀ।
ਇੰਸਪੈਕਟਰ ਇੰਦਰਜੀਤ ਨੂੰ ਸਪੈਸ਼ਲ ਟਾਸਕ ਫੋਰਸ ਨੇ ਨਾਜਾਇਜ਼ ਹਥਿਆਰ ਰੱਖਣ ਅਤੇ ਨਸ਼ਾ ਤਸਕਰੀ ਦੇ ਦੋਸ਼ ਵਿੱਚ 12 ਜੂਨ 2017 ਨੂੰ ਗ੍ਰਿਫਤਾਰ ਕੀਤਾ ਸੀ। ਉਸ ਦੇ ਜਲੰਧਰ ਅਤੇ ਫਗਵਾੜਾ ਵਾਲੇ ਘਰ ਵਿੱਚੋਂ ਨੌਂ ਐੱਮ ਐੱਮ ਦੀ ਪਿਸਟਲ, 38 ਬੋਰ ਰਿਵਾਲਵਰ ਏ ਕੇ 47 ਅਤੇ 16.50 ਲੱਖ ਰੁਪਏ ਬਰਾਮਦ ਹੋਏ ਸਨ। ਇੰਦਰਜੀਤ ਤੋਂ ਪੁੱਛਗਿੱਛ ਦੇ ਬਾਅਦ ਉਸ ਦੀ ਨਿਸ਼ਾਨਦੇਹੀ 'ਤੇ ਉਸ ਦੇ ਫਗਵਾੜਾ ਦੇ ਦੂਸਰੇ ਸਰਕਾਰੀ ਕੁਆਰਟਰ 'ਚੋਂ ਤਿੰਨ ਕਿਲੋ ਸਮੈਕ ਅਤੇ ਚਾਰ ਕਿਲੋ ਹੈਰੋਇਨ ਵੀ ਬਰਾਮਦ ਕੀਤੀ ਗਈ ਸੀ।