ਮੈਕਸੀਕੋ ਸਿਟੀ, 13 ਦਸੰਬਰ (ਪੋਸਟ ਬਿਊਰੋ)- ਬੀਤੇ ਦਿਨੀਂ ਬ੍ਰਾਜ਼ੀਲ ਅਤੇ ਮੈਕਸੀਕੋ ਦੀਆਂ ਦੋ ਵੱਖ-ਵੱਖ ਚਰਚਾਂ ਵਿੱਚ ਹੋਏ ਹਾਦਸਿਆਂ ਕਾਰਨ 13 ਜਣਿਆਂ ਦੀ ਮੌਤ ਹੋ ਗਈ। ਇਨ੍ਹਾਂ 'ਚ ਪਹਿਲਾ ਮਾਮਲਾ ਬ੍ਰਾਜ਼ੀਲ ਵਿੱਚ ਬੰਦੂਕਧਾਰੀ ਦੇ ਹਮਲੇ ਦਾ ਹੈ, ਜਿਥੇ ਕੈਂਪੀਨਾਮ ਸ਼ਹਿਰ ਦੇ ਇਕ ਕੈਥੇਡ੍ਰਲ ਵਿੱਚ ਗੋਲੀਬਾਰੀ ਦੇ ਦੌਰਾਨ ਘੱਟ ਤੋਂ ਘੱਟ ਪੰਜ ਸ਼ਰਧਾਲੂ ਅਤੇ ਖੁਦ ਹਮਲਾਵਰ ਮਾਰਿਆ ਗਿਆ। ਦੂਸਰਾ ਮਾਮਲਾ ਮੈਕਸੀਕੋ ਚਰਚ ਵਿੱਚ ਹੋਈ ਦੁਰਘਟਨਾ ਦਾ ਹੈ, ਜਿਥੇ ਚਰਚ ਵਿੱਚ ਜਲੂਸ ਕੱਢਦੇ ਸਮੇਂ ਪਟਾਕਿਆਂ ਵਿੱਚ ਧਮਾਕਾ ਹੋ ਗਿਆ ਅਤੇ ਸੱਤ ਜਣਿਆਂ ਦੀ ਮੌਤ ਹੋ ਗਈ।
ਬ੍ਰਾਜ਼ੀਲ ਦੀ ਚਰਚ ਵਿੱਚ ਇਕ ਬੰਦੂਕਧਾਰੀ ਹਮਲਾਵਰ ਚਰਚ ਵਿੱਚ ਪਹੁੰਚ ਕੇ ਅੰਨ੍ਹੇਵਾਹ ਗੋਲੀਬਾਰੀ ਕਰਨ ਲੱਗਾ। ਇਸ ਦੌਰਾਨ ਪੰਜ ਜਣਿਆਂ ਦੀ ਮੌਕੇ 'ਤੇ ਮੌਤ ਹੋ ਗਈ, ਜਦ ਕਿ ਤਿੰਨ ਜਣੇ ਜ਼ਖਮੀ ਹੋ ਗਏ। ਹਮਲਾਵਰ ਨੇ ਖੁਦ ਨੂੰ ਉਡਾ ਲਿਆ। ਪੁਲਸ ਦੇ ਮੁਤਾਬਕ ਬੰਦੂਕਧਾਰੀ ਨੇ ਕੈਥੇਡ੍ਰਲ ਦੇ ਅੰਦਰ ਇਕ ਰਿਵਾਲਵਰ ਤੇ .38 ਬੋਰ ਦੀ ਇਕ ਪਿਸਤੌਲ ਨਾਲ ਗੋਲੀਆਂ ਚਲਾਈਆਂ। ਗੋਲੀਬਾਰੀ ਦਾ ਮਕਸਦ ਅਤੇ ਬੰਦੂਕਧਾਰੀ ਦੀ ਪਛਾਣ ਦੇ ਬਾਰੇ ਵਿੱਚ ਫਿਲਹਾਲ ਪਤਾ ਨਹੀਂ ਲਗਾ ਹੈ। ਦੂਸਰੇ ਪਾਸੇ ਮੈਕਸੀਕੋ ਦੀ ਇਕ ਚਰਚ ਵਿੱਚ ਜਲੂਸ ਕੱਢਦੇ ਸਮੇਂ ਪਟਾਕਿਆਂ ਵਿੱਚ ਅਚਾਨਕ ਹੋਏ ਧਮਾਕੇ ਨਾਲ ਸੱਤ ਜਣਿਆਂ ਦੀ ਮੌਤ ਹੋ ਗਈ ਅਤੇ 50 ਦੇ ਕਰੀਬ ਲੋਕ ਜ਼ਖਮੀ ਹੋ ਗਏ। ਹਾਦਸੇ ਵਿੱਚ ਮਾਰੇ ਗਏ ਲੋਕਾਂ ਵਿੱਚ 11 ਅਤੇ 12 ਸਾਲ ਦੇ ਦੋ ਬੱਚੇ ਵੀ ਸ਼ਾਮਲ ਹਨ।