ਬੌਇਸ, ਇਦਾਹੋ, 7 ਮਈ (ਪੋਸਟ ਬਿਊਰੋ) ; ਛੇਵੀਂ ਕਲਾਸ ਦੀ ਇੱਕ ਬੱਚੀ ਆਪਣੇ ਬੈਕਪੈਕ ਵਿੱਚ ਗੰਨ ਲੈ ਕੇ ਇਦਾਹੋ ਮਿਡਲ ਸਕੂਲ ਪਹੁੰਚੀ, ਉਸ ਨੇ ਗੋਲੀ ਮਾਰ ਕੇ ਆਪਣੇ ਨਾਲ ਦੇ ਦੋ ਵਿਦਿਆਰਥੀਆਂ ਤੇ ਕਸਟੋਡੀਅਨ ਨੂੰ ਜ਼ਖ਼ਮੀ ਕਰ ਦਿੱਤਾ। ਫਿਰ ਟੀਚਰ ਵੱਲੋਂ ਉਸ ਤੋਂ ਗੰਨ ਖੋਹ ਲਈ ਗਈ।
ਅਧਿਕਾਰੀਆਂ ਨੇ ਇੱਕ ਨਿਊਜ਼ ਕਾਨਫਰੰਸ ਵਿੱਚ ਦੱਸਿਆ ਕਿ ਤਿੰਨ੍ਹਾਂ ਨੂੰ ਗੋਲੀਆਂ ਹੱਥਾਂ ਪੈਰਾਂ ਵਿੱਚ ਹੀ ਲੱਗੀਆਂ ਹਨ ਤੇ ਤਿੰਨਾਂ ਦੇ ਬਚਣ ਦੀ ਉਮੀਦ ਹੈ। ਜੈਫਰਸਨ ਕਾਊਂਟੀ ਦੇ ਸ਼ੈਰਿਫ ਸਟੀਵ ਐਂਡਰਸਨ ਦਾ ਕਹਿਣਾ ਹੈ ਕਿ ਲੜਕੀ ਨੇ ਆਪਣੇ ਬੈਕਪੈਕ ਵਿੱਚ’ੱ ਗੰਨ ਕੱਢੀ ਤੇ ਰਿਗਬੀ ਸਿਟੀ ਵਿੱਚ ਸਥਿਤ ਰਿਗਬੀ ਮਿਡਲ ਸਕੂਲ ਦੇ ਅੰਦਰ ਤੇ ਬਾਹਰ ਕਈ ਗੋਲੀਆਂ ਚਲਾ ਦਿੱਤੀਆਂ।ਇਹ ਥਾਂ ਯੈਲੋਸਟੋਨ ਨੈਸ਼ਨਲ ਪਾਰਕ ਦੇ ਦੱਖਣ ਪੱਛਮ ਵਿੱਚ 145 ਕਿਲੋਮੀਟਰ ਦੀ ਦੂਰੀ ਉੱਤੇ ਸਥਿਤ ਹੈ।
ਇੱਕ ਟੀਚਰ ਨੇ ਉਸ ਲੜਕੀ ਨੂੰ ਉਦੋਂ ਤੱਕ ਫੜ੍ਹ ਕੇ ਰੱਖਿਆ ਜਦੋਂ ਤੱਕ ਪੁਲਿਸ ਉੱਥੇ ਨਹੀਂ ਪਹੁੰਚ ਗਈ ਤੇ ਉਨ੍ਹਾਂ ਲੜਕੀ ਨੂੰ ਆਪਣੀ ਹਿਰਾਸਤ ਵਿੱਚ ਨਹੀੱ ਲੈ ਲਿਆ। ਅਧਿਕਾਰੀਆਂ ਨੇ ਆਖਿਆ ਕਿ ਅਜੇ ਤੱਕ ਇਸ ਤਰ੍ਹਾਂ ਦੀ ਹਰਕਤ ਪਿਛਲੇ ਮਕਸਦ ਦਾ ਪਤਾ ਨਹੀੱ ਲੱਗ ਸਕਿਆ ਹੈ ਤੇ ਉਨ੍ਹਾਂ ਇਹ ਵੀ ਆਖਿਆ ਕਿ ਹਮਲੇ ਦੇ ਕਾਰਨ ਦਾ ਪਤਾ ਲਾਉਣ ਦੇ ਨਾਲ ਨਾਲ ਜਾਂਚਕਾਰ ਇਹ ਵੀ ਪਤਾ ਲਾਉਣ ਦੀ ਕੋਸਿ਼ਸ਼ ਕਰ ਰਹੇ ਹਨ ਕਿ ਲੜਕੀ ਨੂੰ ਇਹ ਗੰਨ ਕਿੱਥੋਂ ਮਿਲੀ।
ਐੱਡਰਸਨ ਨੇ ਆਖਿਆ ਕਿ ਲੜਕੀ ਨੇੜਲੀ ਸਿਟੀ ਇਦਾਹੋ ਫਾਲਜ਼਼ ਤੋਂ ਹੈ। ਉਨ੍ਹਾਂ ਵੱਲੋਂ ਲੜਕੀ ਦੇ ਨਾਂ ਦਾ ਖੁਲਾਸਾ ਨਹੀਂ ਕੀਤਾ ਗਿਆ। ਈਸਟਰਨ ਇਦਾਹੋ ਰੀਜਨਲ ਮੈਡੀਕਲ ਸੈਂਟਰ ਦੇ ਟਰੌਮਾ ਮੈਡੀਕਲ ਡਾਇਰੈਕਟਰ ਡਾ· ਮਾਈਕਲ ਲੈਮਨ ਨੇ ਆਖਿਆ ਕਿ ਜਿਨ੍ਹਾਂ ਵਿਦਿਆਰਥੀਆਂ ਨੂੰ ਗੋਲੀ ਲਗੀ ਹੈ ਉਨ੍ਹਾਂ ਨੂੰ ਅਜੇ ਹਸਪਤਾਲ ਹੀ ਰੱਖਿਆ ਗਿਆ ਹੈ। ਇਨ੍ਹਾਂ ਵਿੱਚੋਂ ਇੱਕ ਵਿਦਿਆਰਥੀ ਨੂੰ ਆਪਰੇਸ਼ਨ ਦੀ ਲੋੜ ਪੈ ਸਕਦੀ ਹੈ।