ਸਿਡਨੀ, 10 ਦਸੰਬਰ (ਪੋਸਟ ਬਿਊਰੋ)- ਆਸਟਰੇਲੀਆ ਵਿੱਚ ਭਾਰਤੀ ਕਾਰੋਬਾਰੀ ਗੌਤਮ ਅਡਾਨੀ ਦੀ ਕਵੀਂਸਲੈਂਡ ਵਿੱਚ ਇੱਕ ਨਵੀਂ ਥਰਮਲ ਕੋਲਾ ਮਾਈਨ ਪ੍ਰੋਜੈਕਟ ਦਾ ਵਿਰੋਧ ਕਰਦੇ ਹੋਏ ਹਜ਼ਾਰਾਂ ਲੋਕਾਂ ਨੇ ਰਾਜ ਤੇ ਫੈਡਰਲ ਸਰਕਾਰਾਂ ਦੇ ਨਾਲ ਵਿਰੋਧੀ ਧਿਰ ਕੋਲੋਂ ਇਸ ਨੂੰ ਅੱਗੇ ਵਧਣ ਤੋਂ ਰੋਕਣ ਦੀ ਮੰਗ ਕੀਤੀ ਹੈ। ਸਿਡਨੀ, ਮੈਲਬਰਨ, ਬ੍ਰਿਸਬੇਨ ਅਤੇ ਕੈਅਰਨਸ ਵਿੱਚ ਹਜ਼ਾਰਾਂ ਲੋਕਾਂ ਨੇ ਮਾਈਨ ਪ੍ਰੋਜੈਕਟ ਬਾਰੇ ਕੱਲ੍ਹ ਜ਼ੋਰਦਾਰ ਵਿਰੋਧ ਪ੍ਰਦਰਸ਼ਨ ਕੀਤਾ।
ਇੱਕ ਹਫਤਾ ਪਹਿਲਾਂ ਜਲਵਾਯੂ ਤਬਦੀਲੀ ਨੂੰ ਲੈ ਕੇ ਸਰਕਾਰੀ ਲਾਪਰਵਾਹੀ ਦੇ ਵਿਰੋਧ ਵਿੱਚ 15000 ਸਕੂਲੀ ਵਿਦਿਆਰਥੀ ਸੜਕਾਂ 'ਤੇ ਉਤਰ ਆਏ ਸਨ। ਕੋਲੇ ਦੇ ਇਸ ਪ੍ਰੋਜੈਕਟ ਨੂੰ ਸਾਲਾਨਾ ਛੇ ਕਰੋੜ ਟਨ ਤੋਂ ਘਟਾ ਕੇ ਇੱਕ ਤੋਂ ਲੈ ਕੇ ਡੇਢ ਕਰੋੜ ਟਨ ਕਰਨ ਪਿੱਛੋਂ ਇਸ ਉੱਤੇ ਹੋ ਰਹੀ ਲਾਗਤ ਦੋ ਅਰਬ ਰੁਪਏ ਅੰਕੀ ਗਈ ਹੈ। 17 ਸਾਲਾ ਥਾਮਸ ਕੁਲੇਨ ਨੇ ਬ੍ਰਿਸਬੇਨ ਵਿੱਚ ਸੈਂਕੜੇ ਵਿਖਾਵਾਕਾਰੀਆਂ ਨੂੰ ਸੰਬੋਧਨ ਕਰਦੇ ਹੋਏ ਕਿਹਾ, ਅਸੀਂ ਵਾਪਸ ਬੈਠ ਕੇ ਉਨ੍ਹਾਂ ਲੋਕਾਂ ਦੀਆਂ ਗੱਲਾਂ ਨਹੀਂ ਸੁਣਾਂਗੇ, ਜੋ ਬੁੱਢੇ ਹਨ ਤੇ ਸੰਪਰਕ ਤੋਂ ਬਾਹਰ ਹਨ। ਇਸ ਲੜਕੇ ਨੇ ਜਲਵਾਯੂ ਪਰਿਵਰਤਨ 'ਤੇ ਬੀਤੇ ਹਫਤੇ ਵੀ ਕਾਰਵਾਈ ਕਰਨ ਦੀ ਮੰਗ ਲਈ ਪ੍ਰਦਰਸ਼ਨ ਦੀ ਅਗਵਾਈ ਕੀਤੀ ਸੀ। ਪ੍ਰਧਾਨ ਮੰਤਰੀ ਸਕਾਟ ਮਾਰੀਸਨ ਨੇ ਦੇਸ਼ ਵਿਆਪੀ ਪ੍ਰਦਰਸ਼ਨ ਵਿੱਚ ਹਿੱਸਾ ਲੈਣ ਲਈ ਹਜ਼ਾਰਾਂ ਵਿਦਿਆਰਥੀਆਂ ਦੇ ਸਕੂਲ ਛੱਡਣ ਬਾਰੇ ਆਲੋਚਨਾ ਕੀਤੀ ਸੀ। ਇਨ੍ਹਾਂ ਵਿਦਿਆਰਥੀਆਂ ਵਿੱਚ ਥਾਮਸ ਦਾ ਨਾਂਅ ਵੀ ਸ਼ਾਮਲ ਸੀ। ਇਸ ਮੁੱਦੇ 'ਤੇ ਮਾਰੀਸਨ ਦਾ ਸਾਹਮਣਾ ਕਰਨ ਅਤੇ ਪਾਰਲੀਮੈਂਟ ਵਿੱਚ ਧਰਨੇ 'ਤੇ ਬੈਠਣ ਦੇ ਲਈ ਥਾਮਸ ਨੇ ਇਸ ਹਫਤੇ ਕੈਨਬਰਾ ਦੀ ਯਾਤਰਾ ਕੀਤੀ ਸੀ।