ਕਰਨਾਲ, 19 ਅਪ੍ਰੈਲ (ਪੋਸਟ ਬਿਊਰੋ)- ਇਸ ਸ਼ਹਿਰ ਦੇ ਪਾਸ਼ ਇਲਾਕੇ ਵਿੱਚ ਕੱਲ੍ਹ ਦਿੱਲ ਕੰਬਾਊ ਮਾਮਲਾ ਸਾਹਮਣੇ ਆਇਆ। ਆਈ ਟੀ ਆਈ ਪੂੰਡਰੀ ਤੋਂ ਰਿਟਾਇਰਡ ਪ੍ਰਿੰਸੀਪਲ ਬਲਦੇਵ ਸਿੰਘ (68) ਦੀ ਆਰਕੇਪੁਰਮ ਦੀ ਗਲੀ ਨੰਬਰ ਪੰਜ ਦੇ ਘਰ ਵਿੱਚ ਗੁੰਮਨਾਮ ਮੌਤ ਹੋ ਗਈ। ਉਨ੍ਹਾਂ ਦੀ ਲਾਸ਼ ਉੱਤੇ ਕੀੜੇ ਚੱਲ ਰਹੇ ਸਨ। ਬਦਬੂ ਫੈਲਣ ਉੱਤੇ ਗੁਆਂਢੀਆਂ ਨੇ ਪੁਲਸ ਨੂੰ ਸੂਚਨਾ ਦਿੱਤੀ। ਭਰਿਆ-ਪੂਰਾ ਪਰਵਾਰ ਹੋਣ ਦੇ ਬਾਵਜੂਦ ਬਲਦੇਵ ਇਕੱਲੇ ਰਹਿੰਦੇ ਸਨ। ਇੱਕ ਬੇਟਾ ਗੁਆਂਢ ਵਿੱਚ ਰਹਿੰਦਾ ਹੈ, ਪਰ ਉਸ ਨੂੰ ਵੀ ਪੁਲਸ ਦੇ ਬੁਲਾਉਣ ਉੱਤੇ ਮੌਤ ਦਾ ਪਤਾ ਲੱਗਾ।
ਇਹ ਸਾਰਾ ਪਰਵਾਰ ਇਕੱਠਾ ਕਿਉਂ ਨਹੀਂ ਰਹਿੰਦਾ ਸੀ, ਇਸ ਬਾਰੇ ਪਰਵਾਰ ਦੇ ਲੋਕ ਕੁਝ ਦੱਸਣ ਨੂੰ ਤਿਆਰ ਨਹੀਂ ਹਨ। ਕੈਥਲ ਜ਼ਿਲ੍ਹੇ ਦੀ ਆਈ ਟੀ ਆਈ ਪੂੰਡਰੀ ਤੋਂ ਬਲਦੇਵ ਸਿੰਘ ਕਰੀਬ 10 ਸਾਲ ਪਹਿਲਾਂ ਰਿਟਾਇਰ ਹੋਏ ਸਨ। ਪਰਵਾਰ ਵਿੱਚ ਦੋ ਬੇਟੇ, ਨੂੰਹ ਅਤੇ ਪਤਨੀ ਹੈ। ਇੱਕ ਬੇਟਾ, ਉਸ ਦੀ ਪਤਨੀ ਪੰਜਾਬ ਦੇ ਪਠਾਨਕੋਟ ਵਿੱਚ ਰਹਿੰਦੇ ਹਨ। ਦੂਸਰਾ ਬੇਟਾ ਬੱਚਿਆਂ ਦੇ ਨਾਲ ਤਿੰਨ ਘਰ ਛੱਡ ਕੇ ਰਹਿੰਦਾ ਹੈ।