ਰਾਏਪੁਰ, 18 ਅਪ੍ਰੈਲ (ਪੋਸਟ ਬਿਊਰੋ)- ਕੋਰੋਨਾ ਵਾਇਰਸ ਨਾਲ ਹੁੰਦੀਆਂ ਮੌਤਾਂ ਦੀ ਵਧਦੀ ਗਿਣਤੀ ਕਾਰਨ ਰਾਏਪੁਰ ਨਗਰ ਨਿਗਮ ਨੂੰ ਅੰਤਿਮ ਸਸਕਾਰ ਦਾ ਸਰਕਾਰੀ ਠੇਕਾ ਜਾਰੀ ਕਰਨ ਲਈ ਮਜਬੂਰ ਹੋਣਾ ਪਿਆ ਹੈ।
ਛੱਤੀਸਗੜ੍ਹ ਰਾਜ ਦੀ ਰਾਜਧਾਨੀ ਵਿੱਚ ਰੋਜ਼ ਪੰਜਾਹ ਤੋਂ ਵੱਧ ਲੋਕਾਂ ਦੀ ਕੋਰੋਨਾ ਨਾਲ ਮੌਤ ਹੋ ਰਹੀ ਹੈ ਤੇ ਇਸ ਦੇ ਪ੍ਰੋਟੋਕਾਲ ਦੀ ਪਾਲਣ ਕਰਦੇ ਹੋਏ ਅੰਤਿਮ ਸਸਕਾਰ ਕਰਨਾ ਵੱਡੀ ਚੁਣੌਤੀ ਬਣ ਗਈ ਹੈ। ਮ੍ਰਿਤਕਾਂ ਦੇ ਰਿਸ਼ਤੇਦਾਰਾਂ ਤੋਂ ਆਪਣੇ ਪਿਆਰਿਆਂ ਨੂੰ ਅਗਨੀ ਦਾ ਹੱਕ ਵੀ ਖੁੱਸ ਗਿਆ ਹੈ। ਇਸ ਕੰਮ ਲਈ ਸੰਬੰਧਤ ਵਿਭਾਗ ਕਾਮਿਆਂ ਦੀ ਕਮੀ ਨਾਲ ਜੂਝ ਰਿਹਾ ਹੈ। ਇਸ ਕਾਰਨ ਕੋਰੋਨਾ ਮ੍ਰਿਤਕਾਂ ਦਾ ਅੰਤਿਮ ਸਸਕਾਰ ਸਮੇਂ ਸਿਰ ਨਹੀਂ ਹੋ ਰਿਹਾ ਹੈ ਅਤੇ ਪੀੜਤ ਰਿਸ਼ਤੇਦਾਰਾਂ ਦੀ ਨਾਰਾਜ਼ਗੀ ਵਧਦੀ ਵੇਖ ਕੇ ਇਨ੍ਹਾਂ ਮ੍ਰਿਤਕਾਂ ਦੇ ਸੰਸਕਾਰ ਲਈ ਠੇਕਾ ਜਾਰੀ ਕਰਨਾ ਪਿਆ ਹੈ।
ਰਾਏਪੁਰ ਨਗਰ ਨਿਗਮ ਦੇ ਸਾਰੇ 10 ਜ਼ੋਨਾਂ ਵਿੱਚੋਂ ਜ਼ੋਨ ਨੰਬਰ ਪੰਜ ਵਿੱਚ 2.11 ਲੱਖ ਰੁਪਏ ਵਿੱਚ ਪੰਜਾਹ ਲਾਸ਼ਾਂ ਦੇ ਅੰਤਿਮ ਸਸਕਾਰ ਕਰਨ ਦਾ ਠੇਕਾ ਦਿੱਤਾ ਗਿਆ ਹੈ। ਨਿਗਮ ਵੱਲੋਂ ਅੰਤਮ ਸਸਕਾਰ ਕਰਨ ਜਾਣ ਵਾਲੇ ਠੇਕੇਦਾਰ ਦੇ ਬੰਦਿਆਂ ਲਈ ਪੀ ਪੀ ਈ ਕਿੱਟਾਂ ਅਤੇ ਲੱਕੜਾਂ ਸਮੇਤ ਸਾਰੀ ਜ਼ਰੂਰੀ ਸਮੱਗਰੀ ਵੀ ਦਿੱਤੀ ਜਾ ਰਹੀ ਹੈ। ਏਸੇ ਤਰ੍ਹਾਂ ਜ਼ੋਨ ਨੰਬਰ ਦੋ ਦਾ ਠੇਕਾ ਦੇਣ ਲਈ ਅਰਜ਼ੀਆਂ ਦੀ ਮੰਗ ਕੀਤੀ ਗਈ ਹੈ। ਹੰਗਾਮੀ ਹਾਲਤ ਨੂੰ ਦੇਖਦੇ ਹੋਏ ਸਾਰੇ ਜ਼ੋਨਾਂ ਵਿੱਚ ਵੱਖੋ-ਵੱਖ ਠੇਕੇ ਦਿੱਤੇ ਜਾਣਗੇ। ਇਸ ਰਾਜ ਵਿੱਚ ਕੋਰੋਨਾ ਦੇ ਕਾਰਨ ਰੋਜ਼ 140 ਤੋਂ 150 ਲੋਕਾਂ ਦੀ ਮੌਤ ਹੋਣ ਦੇ ਕਾਰਨ ਹਾਲਤ ਚਿੰਤਾਜਨਕ ਹੈ। ਰਾਏਪੁਰ ਦੇ ਜ਼ੋਨ ਨੰਬਰ ਪੰਜ ਦੇ ਕਮਿਸ਼ਨਰ ਚੰਦਨ ਸ਼ਰਮਾ ਨੇ ਦੱਸਿਆ ਕਿ ਸਰਿਊਬਾਂਧਾ ਸ਼ਮਸ਼ਾਨ ਘਾਟ ਵਿੱਚ ਲਾਸ਼ਾਂ ਨੂੰ ਸਾੜਨ ਲਈ ਦੋ ਮਹੀਨੇ ਦਾ ਟੈਂਡਰ ਜਾਰੀ ਕੀਤਾ ਗਿਆ ਹੈ। ਇਸ ਇਕੱਲੇ ਸ਼ਮਸ਼ਾਨ ਘਾਟ ਵਿੱਚ ਰੋਜ਼ਾਨਾ ਅੱਠ ਤੋਂ ਦਸ ਲਾਸ਼ਾਂ ਦਾ ਅੰਤਿਮ ਸਸਕਾਰ ਕੀਤਾ ਜਾ ਰਿਹਾ ਹੈ।