ਨਵੀਂ ਦਿੱਲੀ, 12 ਅਪਰੈਲ, (ਪੋਸਟ ਬਿਊਰੋ)- ਸੁਪਰੀਮ ਕੋਰਟ ਵਿੱਚ ਵਕੀਲ ਐਮਐਲ ਸ਼ਰਮਾ ਨੇ ਅੱਜ ਸੋਮਵਾਰ ਇਕ ਨਵੀਂ ਪਟੀਸ਼ਨ ਦਾਇਰ ਕਰ ਕੇ ਫਰਾਂਸ ਤੋਂ ਖਰੀਦੇ ਜੰਗੀ ਜਹਾਜ਼ ਰਾਫੇਲ ਦੇ ਸੌਦੇ ਉੱਤੇ ਲਗਦੇ ਨਵੇਂ ਦੋਸ਼ਾਂ ਦੀ ਆਜ਼ਾਦਾਨਾ ਜਾਂਚ ਦੀ ਮੰਗ ਕੀਤੀ ਹੈ। ਚੀਫ ਜਸਟਿਸ ਨੇ ਕਿਹਾ ਕਿ ਕੋਰਟ ਇਸ ਉੱਤੇਤੁਰੰਤ ਸੁਣਵਾਈ ਕਰੇਗੀ, ਪਰ ਉਨ੍ਹਾਂ ਨੇ ਇਸ ਪਟੀਸ਼ਨ ਦੀ ਸੁਣਵਾਈ ਕਰਨ ਲਈ ਮਿਥੀ ਗਈ ਕਿਸੇ ਤਰੀਕ ਦੀ ਜਾਣਕਾਰੀ ਨਹੀਂ ਦਿੱਤੀ।
ਪਤਾ ਲੱਗਾ ਹੈ ਕਿਕੋਰਟ ਵਿੱਚ ਇਹ ਪਟੀਸ਼ਨ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਵਿਰੁੱਧ ਰਾਫੇਲ ਸਮਝੌਤੇ ਬਾਰੇ ਕੇਸ ਚਲਾਉਣ ਦੀ ਮੰਗ ਲਈ ਦਾਇਰ ਕੀਤੀ ਗਈਹੈ। ਫਰਾਂਸ ਦੇ ਇੱਕ ਮੀਡੀਆ ਪੋਰਟਲ ਨੇ ਦਾਅਵਾ ਕੀਤਾ ਹੈ ਕਿ ਰਾਫੇਲ ਡੀਲ ਲਈ ਇੱਕ ਮਿਡਲਮੈਨ ਨੂੰ ਇਕ ਮਿਲੀਅਨ ਯੂਰੋ ਦਿੱਤਾ ਗਿਆ ਸੀ। ਇਸ ਬਾਰੇ ਫਰੈਂਚ ਭ੍ਰਿਸ਼ਟਾਚਾਰ ਰੋਕੂ ਏਜੰਸੀ ਦੀ ਜਾਂਚ ਰਿਪੋਰਟ ਦੇ ਹਵਾਲੇ ਨਾਲ ਛਪੀ ਖਬਰ ਮੁਤਾਬਕ ਡਸਾਲਟ ਐਵੀਏਸ਼ਨ ਨੇ ਕੁਝ ਬੋਗਸ ਨਜ਼ਰ ਆਉਂਦੇ ਭੁਗਤਾਨ ਕੀਤੇ ਹਨ। ਇਸ ਕੰਪਨੀ ਦੇ 2017 ਖਾਤਿਆਂ ਦੇ ਆਡਿਟ ਵਿੱਚ 5 ਲੱਖ 8 ਹਜ਼ਾਰ 925 ਯੂਰੋ ਕਲਾਈਂਟ ਗਿਫਟ ਦੇ ਨਾਂ ਉੱਤੇ ਖਰਚ ਦੱਸਿਆ ਗਿਆ ਹੈ, ਜਿਹੜਾ ਭਾਰਤੀ ਕਰੰਸੀ ਦੇ ਹਿਸਾਬ ਕਈ ਕਰੋੜ ਰੁਪਏ ਬਣੇਗਾ। ਇਸ ਦੌਰਾਨ ਮਾਡਲ ਬਣਾਉਣ ਵਾਲੀ ਕੰਪਨੀ ਦਾ ਮਾਰਚ 2017 ਦਾ ਇਕ ਬਿੱਲ ਦਿਖਾਇਆ ਗਿਆ ਤੇ ਇਸ ਮਾਡਲ ਦੇ ਲਈ ਭੁਗਤਾਨ ਕੀਤਾ ਦੱਸਿਆ ਹੈ, ਪਰ ਇਹ ਮਾਡਲ ਕਿੱਥੇ ਤੇ ਕਿਵੇਂ ਵਰਤਿਆ ਗਿਆ, ਇਸ ਦਾ ਸਬੂਤ ਨਹੀਂ ਦਿੱਤਾ ਗਿਆ। ਜਹਾਜ਼ ਬਣਾਉਣ ਵਾਲੀ ਕੰਪਨੀ ਡਸਾਲਟ ਐਵੀਏਸ਼ਨ ਨੇ ਦੋਸ਼ਾਂ ਦਾ ਖੰਡਨ ਕੀਤਾ ਹੈ। ਭਾਰਤੀ ਸੁਪਰੀਮ ਕੋਰਟ ਨੇ ਦੋ ਸਾਲ ਪਹਿਲਾਂ ਕੋਰਟ ਦੀ ਨਿਗਰਾਨੀ ਵਿੱਚ ਰਾਫੇਲ ਡੀਲ ਦੀ ਜਾਂਚ ਦੀ ਮੰਗ ਨਾਲ ਜੁੜੀਆਂ ਸਾਰੀਆਂ ਪਟੀਸ਼ਨਾਂ ਰੱਦ ਕਰ ਦਿੱਤੀਆਂ ਸੀ।