ਸ੍ਰੀਨਗਰ, 9 ਦਸੰਬਰ (ਪੋਸਟ ਬਿਊਰੋ)- ਉੱਤਰ ਪ੍ਰਦੇਸ਼ ਦੇ ਬੁਲੰਦਸ਼ਹਿਰ ਵਿਖੇ ਇਸ ਹਫਤੇ ਵਾਪਰੀ ਹਿੰਸਾ ਵਿੱਚ ਪੁਲਸ ਇੰਸਪੈਕਟਰ ਸੁਬੋਧ ਕੁਮਾਰ ਸਿੰਘ ਨੂੰ ਗੋਲੀ ਮਾਰ ਕੇ ਕਤਲ ਕਰਨ ਵਿੱਚ ਸ਼ਾਮਲ ਫੌਜੀ ਜਵਾਨ ਨੂੰ ਕਸ਼ਮੀਰ ਤੋਂ ਗ੍ਰਿਫਤਾਰ ਕਰ ਲਿਆ ਗਿਆ ਅਤੇ ਬਾਕੀ ਕਾਰਵਾਈ ਯੂ ਪੀ ਪੁਲਸ ਕਰ ਰਹੀ ਹੈ।
ਜਾਣਕਾਰ ਸੂਤਰਾਂ ਅਨੁਸਾਰ ਜਤਿੰਦਰ ਮਲਿਕ (ਜੀਤੂ ਫੌਜੀ) ਨੂੰ ਉੱਤਰੀ ਕਸ਼ਮੀਰ ਦੇ ਸੋਪੋਰ ਕਸਬੇ ਵਿਚਲੇ 22 ਆਰ ਆਰ ਦੇ ਕੈਂਪ ਵਿੱਚੋਂ ਉੱਤਰ ਪ੍ਰਦੇਸ਼ ਦੀ ਪੁਲਸ ਨੇ ਗ੍ਰਿਫਤਾਰ ਕੀਤਾ ਹੈ। ਜੀਤੂ ਕਸ਼ਮੀਰ ਵਿੱਚ ਤੈਨਾਤ ਹੈ ਅਤੇ 15 ਦਿਨ ਦੀ ਛੁੱਟੀ ਉੱਤੇ ਆਪਣੇ ਘਰ ਬੁਲੰਦ ਸ਼ਹਿਰ ਗਿਆ ਸੀ, ਜਿੱਥੇ ਹਿੰਸਾ ਫੈਲਣ ਵੇਲੇ ਇੰਸਪੈਕਟਰ ਸੁਬੋਧ ਕੁਮਾਰ ਅਤੇ ਇੱਕ ਨੌਜਵਾਨ ਉੱਤੇ ਭੀੜ ਨੇ ਓਦੋਂ ਹਮਲਾ ਕਰ ਦਿੱਤਾ, ਜਦ ਇੰਸਪੈਕਟਰ ਗਊ ਹੱਤਿਆ ਦੀ ਘਟਨਾ ਦੀ ਜਾਂਚ ਲਈ ਇਲਾਕੇ 'ਚ ਗਿਆ ਸੀ ਅਤੇ ਫਿਰ ਇੰਸਪੈਕਟਰ ਨੂੰ 32 ਬੋਰ ਦੀ ਪਿਸਤੌਲ ਨਾਲ ਗੋਲੀ ਮਾਰ ਦਿੱਤੀ ਗਈ ਸੀ। ਪੁਲਸ ਦਾ ਮੰਨਣਾ ਹੈ ਕਿ ਗੋਲੀ ਜੇਤੂ ਨੇ ਚਲਾਈ ਸੀ। ਜੀਤੂ ਫੌਜੀ ਵਰਗੇ ਬੰਦੇ ਨੂੰ ਹਿੰਸਾ ਮੌਕੇ ਇੱਕ ਥਾਂ ਵੀਡੀਓ ਵਿੱਚ ਇੰਸਪੈਕਟਰ ਕੋਲ ਖੜ੍ਹਾ ਦੇਖਿਆ ਗਿਆ ਸੀ। ਸੂਤਰਾਂ ਅਨੁਸਾਰ ਜੀਤੂ ਇਸ ਘਟਨਾ ਤੋਂ ਬਾਅਦ ਉਸ ਰਾਤ ਵਾਰ ਕਸ਼ਮੀਰ ਮੁੜ ਗਿਆ ਸੀ। ਫੌਜ ਦੇ ਮੁਖੀ ਜਨਰਲ ਬਿਪਨ ਰਾਵਤ ਨੇ ਕਿਹਾ ਹੈ ਕਿ ਜੇ ਜਤਿੰਦਰ ਮਲਿਕ ਦੇ ਖਿਲਾਫ ਕੋਈ ਸਬੂਤ ਪਾਇਆ ਜਾਂਦਾ ਹੈ ਤੇ ਪੁਲਸ ਇਸ ਨੂੰ ਸ਼ੱਕੀ ਮੰਨਦੀ ਹੈ ਤਾਂ ਅਸੀਂ ਉਸ ਨੂੰ ਪੁਲਸ ਦੇ ਸਾਹਮਣੇ ਪੇਸ਼ ਕਰਾਂਗੇ। ਅਸੀਂ ਇਸ ਮਾਮਲੇ ਵਿੱਚ ਯੂ ਪੀ ਪੁਲਸ ਦੀ ਹਰ ਤਰ੍ਹਾਂ ਦੀ ਕਾਨੂੰਨੀ ਮਦਦ ਕਰਾਂਗੇ।