ਅਭਿਨੇਤਰੀ ਤਾਪਸੀ ਪੰਨੂ ਇਸ ਸਾਲ ਕਈ ਫਿਲਮਾਂ ਵਿੱਚ ਨਜ਼ਰ ਆਉਣ ਵਾਲੀ ਹੈ। ਉਹ ਇਨ੍ਹੀਂ ਦਿਨੀਂ ਭਾਰਤੀ ਮਹਿਲਾ ਕ੍ਰਿਕਟਰ ਮਿਤਾਲੀ ਰਾਜ ਦੀ ਬਾਇਓਪਿਕ ‘ਸ਼ਾਬਾਸ਼ ਮਿੱਠੂ’ ਦੀ ਤਿਆਰੀ ਕਰਦੀ ਪਈ ਹੈ। ਫਿਲਮ ਵਿੱਚ ਮਿਤਾਲੀ ਦੀ ਭੂਮਿਕਾ ਵਿੱਚ ਖੁਦ ਨੂੰ ਢਾਲਣ ਲਈ ਤਾਪਸੀ ਕ੍ਰਿਕਟ ਦੀ ਟਰੇਨਿੰਗ ਲੈ ਰਹੀ ਹੈ। ਖਬਰ ਆ ਰਹੀ ਹੈ ਕਿ ਤਾਪਸੀ ਇੱਕ ਹੋਰ ਸਪੋਰਟਸ ਬਾਇਓਪਿਕ ਫਿਲਮ ਵਿੱਚ ਨਜ਼ਰ ਆਏਗੀ। ਦੱਸਿਆ ਜਾ ਰਿਹਾ ਹੈ ਕਿ ਤਾਪਸੀ, ਟੈਨਿਸ ਸਟਾਰ ਸਾਨਿਆ ਮਿਰਜ਼ਾ ਦੀ ਬਾਇਓਪਿਕ ਵਿੱਚ ਵੀ ਨਜ਼ਰ ਆ ਸਕਦੀ ਹੈ। ਖਬਰਾਂ ਮੁਤਾਬਕ ਤਾਪਸੀ ਇੱਕ ਹੋਰ ਸਪੋਰਟਸ ਬਾਇਓਪਿਕ ਫਿਲਮ ਸਾਈਨ ਕਰਨ ਵਾਲੀ ਹੈ। ਇਸ ਵਾਰ ਉਹ ਸਾਨਿਆ ਦੀ ਜ਼ਿੰਦਗੀ ਨੂੰ ਪਰਦੇ ਉੱਤੇ ਨਿਭਾਉਂਦੀ ਦਿਸੇਗੀ।
ਦੱਸਿਆ ਗਿਆ ਹੈ ਕਿ ਤਾਪਸੀ ਨੂੰ ਸਾਨਿਆ ਦੀ ਬਾਇਓਪਿਕ ਫਿਲਮ ਲਈ ਅਪਰੋਚ ਕੀਤਾ ਗਿਆ ਹੈ। ਇਸ ਉੱਤੇ ਜਲਦੀ ਫੈਸਲਾ ਲਿਆ ਜਾਏਗਾ। ਰੌਨੀ ਸਕਰੂਵਾਲਾ ਨੇ ਸਾਨਿਆ ਦੀ ਬਾਇਓਪਿਕ ਫਿਲਮ ਦੇ ਰਾਈਟਸ ਖਰੀਦ ਲਏ ਹਨ। ਮੇਕਰਸ ਚਾਹੁੰਦੇ ਹਨ ਕਿ ਕੋਈ ਯੁਵਾ ਅਭਿਨੇਤਰੀ ਸਾਨਿਆ ਦਾ ਕਿਰਦਾਰ ਨਿਭਾਏ। ਪਿੱਛੇ ਜਿਹੇ ਰਿਲੀਜ਼ ਕੀਤੀ ‘ਸਾਇਨਾ’ ਵਿਚ ਪਰਿਣੀਤੀ ਚੋਪੜਾ ਬੈਡਮਿੰਟਨ ਖਿਡਾਰੀ ਸਾਇਨਾ ਨੇਹਵਾਲ ਦੀ ਭੂਮਿਕਾ ਵਿੱਚ ਦਿੱਸ ਚੁੱਕੀ ਹੈ। ਇਸ ਲਈ ਮੇਕਰਸ ਨਹੀਂ ਚਾਹੁੰਦੇ ਕਿ ਪਰਿਣੀਤੀ ਫਿਰ ਸਾਨਿਆ ਦਾ ਕਿਰਦਾਰ ਨਿਭਾਏ। ਇਸੇ ਕਾਰਨ ਮੇਕਰਸ ਇਸ ਭੂਮਿਕਾ ਲਈ ਤਾਪਸੀ ਨੂੰ ਪ੍ਰਫੈਕਟ ਮੰਨਦੇ ਹਨ। ਖਬਰਾਂ ਮੁਤਾਬਕ ਤਾਪਸੀ ਨੂੰ ਇਸ ਦੀ ਸਕ੍ਰਿਪਟ ਪਸੰਦ ਆਈ ਹੈ। ਤਾਪਸੀ ਦੇ ਵਰਕ ਫਰੰਟ ਦੀ ਗੱਲ ਕਰੀਏ ਤਾਂ ਉਹ ‘ਲੂਪ ਲਪੇਟਾ’ ਵਿੱਚ ਨਜ਼ਰ ਆਉਣ ਵਾਲੀ ਹੈ। ਜਲਦੀ ਹੀ ਉਸ ਨੂੰ ‘ਰਸ਼ਮੀ ਰਾਕੇਟ’ ਵਿੱਚ ਦੇਖਿਆ ਜਾਣ ਵਾਲਾ ਹੈ। ਇਸ ਦੇ ਇਲਾਵਾ ਉਸ ਦੇ ਕੋਲ ‘ਹਸੀਨ ਦਿਲਰੁਬਾ' ਅਤੇ ‘ਸ਼ਾਬਾਸ਼ ਮਿੱਠੂ’ ਵਰਗੀਆਂ ਫਿਲਮਾਂ ਵੀ ਹਨ। ਤਾਪਸੀ ਨੂੰ ਅਨੁਰਾਗ ਕਸ਼ਯਪ ਦੀ ‘ਦੋਬਾਰਾ' ਵਿੱਚ ਵੀ ਦੇਖਿਆ ਜਾ ਸਕਦਾ ਹੈ।