ਬੀਜਿੰਗ, 9 ਦਸੰਬਰ (ਪੋਸਟ ਬਿਊਰੋ)- ਚੀਨ ਵਿਚ ਦੋ ਮਹੀਨੇ ਪਹਿਲਾਂ ਸਰਕਾਰ ਦੇ ਖ਼ਿਲਾਫ਼ ਪ੍ਰਦਰਸ਼ਨ ਵਿਚ ਸ਼ਾਮਲ ਹੋ ਚੁੱਕੇ 10 ਸਾਬਕਾ ਫ਼ੌਜੀਆਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ। ਇਹ ਪ੍ਰਦਰਸ਼ਨ ਸਾਬਕਾ ਫ਼ੌਜੀਆਂ ਨੇ ਪੈਨਸ਼ਨ ਅਤੇ ਸੇਵਾ ਮੁਕਤੀ ਨਾਲ ਜੁੜੇ ਹੋਰ ਲਾਭ ਨਾ ਮਿਲਣ ਤੋਂ ਪੈਦਾ ਹੋਏ ਵਿਵਾਦ ਕਾਰਨ ਕੀਤਾ ਸੀ।
ਸਰਕਾਰੀ ਚੈਨਲ ਦੀ ਰਿਪੋਰਟ ਦੇ ਮੁਤਾਬਕ ਸ਼ੈਂਡੋਂਗ ਸੂਬੇ ਵਿਚ ਚਾਰ ਤੋਂ ਸੱਤ ਅਕਤੂਬਰ ਤਕ ਪ੍ਰਦਰਸ਼ਨ ਹੋਇਆ ਸੀ। ਇਸ ਵਿਚ ਚੀਨ ਦੇ ਅਲੱਗ-ਅਲੱਗ ਹਿੱਸਿਆਂ ਦੇ ਲਗਪਗ 300 ਸਾਬਕਾ ਫ਼ੌਜੀ ਸ਼ਾਮਲ ਹੋਏ ਸਨ। ਸਰਕਾਰ ਨੇ ਇਸ ਪ੍ਰਦਰਸ਼ਨ ਨੂੰ ਗ਼ੈਰ-ਕਾਨੂੰਨੀ ਕਰਾਰ ਦਿੱਤਾ ਸੀ। ਜਨ ਸੁਰੱਖਿਆ ਮੰਤਰਾਲੇ ਦੇ ਹਵਾਲੇ ਨਾਲ ਦੱਸਿਆ ਗਿਆ ਕਿ ਪ੍ਰਦਰਸ਼ਨ ਮੌਕੇ ਇਨ੍ਹਾਂ ਲੋਕਾਂ ਅਤੇ ਪੁਲਿਸ ਵਿਚ ਝੜਪ ਹੋਈ ਸੀ। ਇਸ ਨਾਲ ਕਈ ਵਾਹਨਾਂ ਨੂੰ ਵੀ ਨੁਕਸਾਨ ਪੁੱਜਾ ਸੀ। ਚੀਨ ਵਿਚ ਪੈਨਸ਼ਨ ਅਤੇ ਹੋਰ ਭੱਤਿਆਂ ਬਾਰੇ ਸਾਬਕਾ ਫ਼ੌਜੀ ਲੰਬੇ ਸਮੇਂ ਤੋਂ ਨਿਰਾਸ਼ਾ ਵਿਚ ਹਨ। ਪਿਛਲੇ ਸਾਲ ਸੈਂਕੜੇ ਸਾਬਕਾ ਫ਼ੌਜੀਆਂ ਨੇ ਬੀਜਿੰਗ ਵਿਚ ਦੋ ਦਿਨ ਪ੍ਰਦਰਸ਼ਨ ਕੀਤਾ ਸੀ। ਪ੍ਰਦਰਸ਼ਨਾਂ ਤੇ ਸਾਬਕਾ ਫ਼ੌਜੀਆਂ ਦੀ ਮੰਗ ਨੂੰ ਵੇਖ ਕੇ ਚੀਨ ਸਰਕਾਰ ਨੇ ਯੋਗ ਕਦਮ ਚੁੱਕਣ ਦਾ ਵਾਅਦਾ ਕੀਤਾ ਹੈ। ਇਸ ਸਾਲ ਚੀਨ ਵਿਚ ਇਸ ਬਾਰੇ ਵਿਚਾਰ ਲਈ ਮੰਤਰਾਲਾ ਵੀ ਬਣਾ ਦਿੱਤਾ ਗਿਆ ਹੈ। ਚੀਨ ਦੇ ਰਾਸ਼ਟਰਪਤੀ ਸ਼ੀ ਜਿਨਪਿੰਗ ਨੇ 2015 ਵਿਚ ਕਿਹਾ ਸੀ ਕਿ 2017 ਦੇ ਅੰਤ ਤਕ ਫ਼ੌਜ ਵਿਚ 3 ਲੱਖ ਫ਼ੌਜੀਆਂ ਦੀ ਕਟੌਤੀ ਹੋ ਜਾਵੇਗੀ। ਸਰਕਾਰ ਦਾ ਕਹਿਣਾ ਹੈ ਕਿ ਕਟੌਤੀ ਦਾ ਟੀਚਾ ਲਗਪਗ ਪੂਰਾ ਕਰ ਲਿਆ ਹੈ।