ਲਗਜ਼ਮਬਰਗ ਸਿਟੀ, 7 ਦਸੰਬਰ (ਪੋਸਟ ਬਿਊਰੋ)- ਯੂਰਪ ਦਾ ਸੱਤਵਾਂ ਸਭ ਤੋਂ ਛੋਟਾ ਦੇਸ਼ ਲਗਜ਼ਮਬਰਗ ਅਗਲੇ ਸਾਲ ਗਰਮੀਆਂ ਤੱਕ ਪਬਲਿਕ ਟਰਾਂਸਪੋਰਟ ਮੁਫਤ ਕਰ ਦੇਵੇਗਾ। ਏਦਾਂ ਕਰਨ ਵਾਲਾ ਉਹ ਦੁਨੀਆ ਦਾ ਪਹਿਲਾ ਦੇਸ਼ ਹੋਵੇਗਾ। ਇਸ ਦੇ ਤਹਿਤ ਲਗਜ਼ਮਬਰਗ ਵਿੱਚ ਬਸ, ਟਰੇਨ ਅਤੇ ਟਰਾਮ ਵਿੱਚ ਯਾਤਰਾ ਕਰਨ ਵਾਲੇ ਲੋਕਾਂ ਨੂੰ ਕਿਸੇ ਵੀ ਪ੍ਰਕਾਰ ਦਾ ਕਿਰਾਇਆ ਨਹੀਂ ਦੇਣਾ ਪਿਆ ਕਰੇਗਾ।
ਵਰਨਣ ਯੋਗ ਹੈ ਕਿ ਇਸ ਦੇਸ਼ ਦੀ ਆਬਾਦੀ ਕਰੀਬ ਛੇ ਲੱਖ ਹੈ। ਘੱਟ ਆਬਾਦੀ ਹੋਣ ਦੇ ਬਾਵਜੂਦ ਇਥੇ ਟਰੈਫਿਕ ਦੀ ਸਮੱਸਿਆ ਬਣੀ ਰਹਿੰਦੀ ਹੈ। ਇਸ ਕਾਰਨ ਸਰਕਾਰ ਨੇ ਦੇਸ਼ ਦਾ ਵਾਤਾਵਰਣ ਬਚਾਉਣ ਅਤੇ ਟਰੈਫਿਕ ਦੀ ਸਮੱਸਿਆ ਤੋਂ ਛੁਟਕਾਰਾ ਪਾਉਣ ਲਈ ਇਹ ਯੋਜਨਾ ਬਣਾਈ ਹੈ। ਕੱਲ੍ਹ ਜੇਵੀਅਰ ਬੈਟਲ ਨੇ ਲਗਜ਼ਮਬਰਗ ਦੇ ਪ੍ਰਧਾਨ ਮੰਤਰੀ ਵਜੋਂ ਸਹੁੰ ਚੁੱਕੀ ਹੈ। ਬੈਟਲ ਨੇ ਚੋਣ ਰੈਲੀ ਵਿੱਚ ਕਿਹਾ ਸੀ ਕਿ ਉਹ ਪਬਲਿਕ ਟਰਾਂਸਪੋਰਟ ਨੂੰ ਮੁਫਤ ਕਰ ਦੇਣਗੇ। ਸਰਕਾਰ ਪਹਿਲਾਂ ਹੀ 20 ਸਾਲ ਤੱਕ ਦੇ ਵਿਦਿਆਰਥੀਆਂ ਲਈ ਮੁਫਤ ਟਰਾਂਸਪੋਰਟ ਦਾ ਐਲਾਨ ਕਰ ਚੁੱਕੀ ਹੈ। ਸੈਕੰਡਰੀ ਸਕੂਲ ਦੇ ਬੱਚਿਆਂ ਨੂੰ ਘਰ ਤੋਂ ਸਕੂਲ ਆਉਣ-ਜਾਣ ਲਈ ਫ੍ਰੀ ਸਰਵਿਸ ਸ਼ੁਰੂ ਕੀਤੀ ਗਈ ਹੈ। ਕਿਸੇ ਵੀ ਵਿਅਕਤੀ ਨੂੰ ਦੋ ਘੰਟੇ ਤੋਂ ਵੱਧ ਦੀ ਯਾਤਰਾ ਕਰਨ ਲਈ 1.78 ਪੌਂਡ ਹੀ ਭਰਨੇ ਹੋਣਗੇ। ਯਾਨੀ 2590 ਵਰਗ ਕਿਲੋਮੀਟਰ ਖੇਤਰਫਲ ਵਾਲੇ ਦੇਸ਼ ਨੂੰ ਘੁੰਮਣ ਲਈ ਕਿਸੇ ਵਿਅਕਤੀ ਨੂੰ 160 ਰੁਪਏ ਹੀ ਦੇਣੇ ਹੋਣਗੇ। ਲਗਜ਼ਮਬਰਗ ਵਿੱਚ 2020 ਨਾਲ ਹਰ ਤਰ੍ਹਾਂ ਦੀ ਟਿਕਟ ਬੰਦ ਕਰ ਦਿੱਤੀ ਜਾਏਗੀ। ਫ੍ਰੀ ਟਰਾਂਸਪੋਰਟ ਦੀ ਨੀਤੀ ਕਿਵੇਂ ਬਣੇਗੀ, ਇਹ ਸਰਕਾਰ ਨੇ ਹਾਲੇ ਤੈਅ ਨਹੀਂ ਕੀਤਾ ਹੈ।