ਨਵੀਂ ਦਿੱਲੀ, 6 ਦਸੰਬਰ (ਪੋਸਟ ਬਿਊਰੋ)- ਪੰਜਾਬੀ ਦੇ ਪ੍ਰਸਿੱਧ ਕਵੀ ਡਾ. ਮੋਹਨਜੀਤ ਨੂੰ ਸਾਹਿਤ ਅਕਾਦਮੀ ਐਵਾਰਡ ਦੇਣ ਦਾ ਐਲਾਨ ਕੀਤਾ ਗਿਆ ਹੈ। ਵੱਖ-ਵੱਖ ਭਾਸ਼ਾਵਾਂ ਵਿੱਚ ਸਾਹਿਤ ਦੇ ਖੇਤਰ 'ਚ ਵੱਡਾ ਨਾਮਣਾ ਖੱਟਣ ਵਾਲੇ ਕਵੀਆਂ, ਲੇਖਕਾਂ, ਨਾਵਲਕਾਰਾਂ, ਕਹਾਣੀਕਾਰਾਂ ਅਤੇ ਆਲੋਚਕਾਂ ਨੂੰ ਮਿਲਣ ਵਾਲੇ ਸਾਲਾਨਾ ਸਾਹਿਤ ਅਕਾਦਮੀ ਪੁਰਸਕਾਰਾਂ ਦਾ ਕੱਲ੍ਹ ਐਲਾਨ ਕਰ ਦਿੱਤਾ ਗਿਆ, ਜਿਸ ਵਿੱਚ ਡਾ: ਮੋਹਨਜੀਤ ਸ਼ਾਮਲ ਹਨ।
ਸਾਲ 2018 ਦੇ ਸਾਹਿਤ ਅਕਾਦਮੀ ਇਨਾਮ ਲਈ ਕੁੱਲ ਸੱਤ ਕਵਿਤਾ ਦੀਆਂ ਕਿਤਾਬਾਂ, ਛੇ ਕਹਾਣੀਕਾਰਾਂ, ਛੇ ਨਾਵਲਕਾਰਾਂ, ਤਿੰਨ ਸਾਹਿਤਕ ਆਲੋਚਨਾ ਦੀ ਕਿਤਾਬਾਂ ਤੇ ਦੋ ਨਿਬੰਧਾਂ ਦੀਆਂ ਕਿਤਾਬਾਂ ਨੂੰ ਚੁਣਿਆ ਗਿਆ ਹੈ। ਇਸ ਵਿਚ ਕਵਿਤਾਵਾਂ ਲਈ ਪੰਜਾਬੀ ਕਵੀ ਡਾ. ਮੋਹਨਜੀਤ, ਸਨਾਂਤਾ ਤਾਂਤੀ ਨੂੰ (ਅਸਾਮੀ), ਪਰੇਸ਼ ਨਰਿੰਦਰ ਕਾਮਤ (ਕੋਂਕਣੀ), ਐਸ ਰਾਮੇਸ਼ਨ ਨਾਇਰ (ਮਲਿਆਲਮ), ਡਾ. ਰਾਜੇਸ਼ ਕੁਮਾਰ ਵਿਆਸ (ਰਾਜਸਥਾਨੀ), ਡਾ. ਰਮਾ ਕਾਂਤ ਸ਼ੁਕਲਾ (ਸੰਸਕ੍ਰਿਤ) ਅਤੇ ਖਿਮਾਨ ਯੂ ਮੁਲਾਨੀ ਨੂੰ (ਸਿੰਧੀ) ਲਈ ਚੁਣਿਆ ਗਿਆ ਹੈ। ਇੰਦਰਜੀਤ ਕੇਸਰ (ਡੋਗਰੀ), ਅਨੀਸ ਸਲੀਮ (ਅੰਗਰੇਜ਼ੀ), ਚਿਤਰਾ ਮੁਦਗਲ (ਹਿੰਦੀ), ਸ਼ਿਆਮ ਬੇਸਾਰਾ (ਸੰਥਾਲੀ), ਐਸ ਰਾਮਾਕ੍ਰਿਸ਼ਨ (ਤਾਮਿਲ) ਅਤੇ ਰਹਮਾਨ ਅੱਬਾਸ (ਉਰਦੂ) ਨਾਵਲ ਲਈ ਚੁਣਿਆ ਹੈ। ਛੋਟੀ ਕਹਾਣੀ ਲਈ ਕਹਾਣੀਕਾਰ ਸੰਜੀਬ ਚਟੋਪਾਧਿਆਏ (ਬੰਗਾਲੀ), ਰਿਤੂਰਾਜ ਬਾਸੂਮਾਤਰੇ (ਬੋਡੋ), ਮੁਸ਼ਤਾਕ ਅਹਿਮਦ ਮੁਸ਼ਤਾਕ (ਕਸ਼ਮੀਰੀ), ਪ੍ਰੋ. ਬੀਨਾ ਠਾਕੁਰ (ਮੈਥਿਲੀ), ਬੁਧੀਚੰਦਰਾ ਹੀਸਨਾਂਬਾ (ਮਰਾਠੀ) ਤੇ ਲੋਕ ਨਾਥ ਉਪਾਧਿਆਏ ਚੰਪਾਗੇਨ (ਨੇਪਾਲੀ) ਨੂੰ ਚੁਣਿਆ ਹੈ। ਸਾਹਿਤਕ ਆਲੋਚਨਾ ਦੇ ਖੇਤਰ ਵਿੱਚ ਕੇ ਜੀ ਨਾਗਾਰਾਜੱਪਾ ਨੂੰ (ਕੰਨੜ), ਮਾ ਸੂ ਪਾਟਿਲ (ਮਰਾਠੀ) ਤੇ ਪ੍ਰੋ. ਦਸਰਥੀ ਦਾਸ (ਉੜੀਆ) ਲਈ ਚੁਣਿਆ ਗਿਆ ਹੈ, ਜਦ ਕਿ ਪ੍ਰੋ. ਸ਼ਰੀਪਾ ਵਿਜੀਵਾਲਾ ਨੂੰ (ਗੁਜਰਾਤੀ) ਤੇ ਡਾ. ਕੋਲਕਾਲੂਰੀ ਇਨੋਚ ਨੂੰ (ਤੇਲਗੂ) ਨਿਬੰਧਾਂ ਦੀ ਕਿਤਾਬ ਲਈ ਚੁਣਿਆ ਗਿਆ ਹੈ।
ਸਾਹਿਤ ਅਕਾਦਮੀ ਦੇ ਪ੍ਰਧਾਨ ਡਾ. ਚੰਦਰਸ਼ੇਖਰ ਕਾਮਬਰ ਦੀ ਅਗਵਾਈ 'ਚ ਕਾਰਜਕਾਰੀ ਬੋਰਡ ਜਿਊਰੀ ਮੈਂਬਰਾਂ ਦੀ ਪ੍ਰਵਾਨਗੀ ਨਾਲ ਇਨ੍ਹਾਂ ਪੁਰਸਕਾਰਾਂ ਦੇ ਨਾਂਵਾਂ ਦੀ ਸਿਫਾਰਸ਼ 24 ਭਾਰਤੀ ਭਾਸ਼ਾਵਾਂ ਦੇ ਪ੍ਰਤੀਨਿਧੀਆਂ ਵੱਲੋਂ ਕੀਤੀ ਗਈ ਹੈ। ਸਾਹਿਤ ਅਕਾਦਮੀ ਪੁਰਸਕਾਰ ਵਿਜੇਤਾ ਨੂੰ 29 ਜਨਵਰੀ 2019 ਨੂੰ ਹੋਣ ਵਾਲੇ ਸਮਾਗਮ 'ਚ ਇਕ ਲੱਖ ਰੁਪਏ ਦੇ ਚੈੱਕ ਦੇ ਨਾਲ ਤਾਂਬੇ ਦੀ ਤਸਤਰੀ ਤੇ ਇਕ ਸ਼ਾਲ ਆਦਿ ਭੇਟ ਕੀਤਾ ਜਾਵੇਗਾ।