ਮੋਹਾਲੀ, 6 ਦਸੰਬਰ (ਪੋਸਟ ਬਿਊਰੋ)- 20 ਨਵੰਬਰ ਦੀ ਰਾਤ ਹਿਮਾਚਲ ਪ੍ਰਦੇਸ਼ ਦੇ ਨਾਹਨ ਅਤੇ ਪਾਉਂਟਾ ਸਾਹਬਿ ਰੋਡ 'ਤੇ ਕਾਰ ਵਿੱਚ ਜਿੰਦਾ ਸੜ ਕੇ ਮਰੇ ਵਿਅਕਤੀ ਦੀ ਮੌਤ ਦੀ ਗੁੱਥੀ ਨੂੰ ਨਾਹਨ ਪੁਲਸ ਨੇ ਸੁਲਝਾ ਲਿਆ ਹੈ। ਪੁਲਸ ਕਾਰ ਵਿੱਚ ਜਿੰਦਾ ਸੜ ਕੇ ਮਰੇ ਨੌਜਵਾਨ ਨੂੰ ਬਲਟਾਣਾ ਦਾ ਆਕਾਸ਼ ਸਮਝਦੀ ਸੀ, ਪ੍ਰੰਤੂ ਇਹ ਲਾਸ਼ ਆਕਾਸ਼ ਦੀ ਨਹੀਂ, ਬਲਕਿ ਰਾਜਸਥਾਨ ਦੇ ਮਿਸਤਰੀ ਰਾਜੂ ਦੀ ਸੀ।
ਮਿਲੀ ਜਾਣਕਾਰੀ ਅਨੁਸਾਰ ਆਕਾਸ਼ ਨੇ ਲਾਈਫ ਇੰਸ਼ੋਰੈਂਸ ਦਾ ਕਰੀਬ 20 ਲੱਖ ਰੁਪਏ ਕਲੇਮ ਲੈਣ ਲਈ ਆਪਣੇ ਭਤੀਜੇ ਬਲਟਾਣਾ ਵਾਸੀ ਰਵੀ ਕੁਮਾਰ ਨਾਲ ਮਿਲ ਕੇ ਸਾਜ਼ਿਸ਼ ਰਚੀ ਅਤੇ ਰਾਜੂ ਨੂੰ ਆਪਣੀ ਸਵਿਫਟ ਗੱਡੀ ਵਿੱਚ ਜਿੰਦਾ ਸਾੜ ਦਿੱਤਾ। ਹਾਦਸੇ ਦੇ ਬਾਅਦ ਆਕਾਸ਼ ਖੁਦ ਯੂ ਪੀ ਦੇ ਪਿੰਡ ਪਲਵਲ ਵਿੱਚ ਜਾ ਕੇ ਲੁਕ ਗਿਆ ਅਤੇ 20 ਲੱਖ ਦਾ ਕਲੇਮ ਪਾਸ ਹੋਣ ਦਾ ਇੰਤਜ਼ਾਰ ਕਰਨ ਲੱਗਾ। ਨਾਹਨ ਪੁਲਸ ਨੇ ਆਕਾਸ਼ ਨੂੰ ਯੂ ਪੀ ਤੋਂ ਗ੍ਰਿਫਤਾਰ ਕਰ ਲਿਆ ਹੈ। ਬਲਟਾਣਾ ਵਾਸੀ ਆਕਾਸ਼ ਨੇ ਲਾਈਫ ਇੰਸ਼ੋਰੈਂਸ਼ ਕਾਰਵਾਈ ਸੀ, ਜਿਸ 'ਤੇ ਮੌਤ ਦੇ ਬਾਅਦ ਪਰਵਾਰ ਨੂੰ 20 ਲੱਖ ਰੁਪਏ ਦਾ ਕਲੇਮ ਮਿਲਣਾ ਸੀ। ਆਕਾਸ਼ ਨੇ ਆਪਣੇ ਭਤੀਜੇ ਰਵੀ ਕੁਮਾਰ, ਜੋ ਸਕੂਲ ਬਸ ਦਾ ਡਰਾਈਵਰ ਹੈ, ਦੇ ਨਾਲ ਮਿਲ ਕੇ ਇੱਕ ਸਾਜ਼ਿਸ ਰਚੀ। ਉਸ ਨੇ ਰਾਜਸਥਾਨ ਵਾਸੀ ਰਾਜੂ ਤੋਂ ਜਾਨ ਵਧਾਈ ਅਤੇ ਉਸ ਨੂੰ ਘੁਮਾਉਣ ਦੇ ਬਹਾਨੇ ਪਾਉਂਟਾ ਸਾਹਬਿ ਲੈ ਗਏ। ਉਸ ਦੇ ਬਾਅਦ ਉਹ ਨਾਹਨ ਆਏ ਅਤੇ ਉਨ੍ਹਾਂ ਨੇ ਰਾਜੂ ਨੂੰ ਖੂਬ ਸ਼ਰਾਬ ਪਿਲਾਈ ਅਤੇ ਜਦ ਉਹ ਨਸ਼ੇ ਵਿੱਚ ਬੇਹੋਸ਼ ਹੋ ਗਿਆ ਤਾਂ ਉਸ ਦਾ ਗਲਾ ਘੁੱਟ ਕੇ ਉਸ ਦਾ ਕਤਲ ਕਰ ਦਿੱਤਾ।