ਤੇਹਰਾਨ, 6 ਦਸੰਬਰ (ਪੋਸਟ ਬਿਊਰੋ)- ਈਰਾਨ `ਚ ਪੋਰਟ ਸ਼ਹਿਰ ਚਾਬਹਾਰ ਵਿੱਚ ਪੁਲਿਸ ਕਮਾਂਡ ਪੋਸਟ `ਤੇ ਹਮਲਾ ਹੋਇਆ ਹੈ, ਜਿਸ ਵਿੱਚ ਤਿੰਨ ਲੋਕਾਂ ਦੀ ਮੌਤ ਹੋ ਗਈ। ਸਥਾਨਕ ਮੀਡੀਆ ਮੁਤਾਬਕ ਪੁਲਿਸ ਕਮਾਂਡ ਪੋਸਟ `ਤੇ ਬੰਬ ਨਾਲ ਹਮਲਾ ਹੋਇਆ, ਜਿਸ `ਚ ਕਾਫ਼ੀ ਲੋਕ ਜ਼ਖ਼ਮੀ ਵੀ ਹੋਏ ਹਨ। ਮੀਡੀਆ ਇਸ ਨੂੰ ਅਤਿਵਾਦੀ ਹਮਲਾ ਕਹਿੰਦਾ ਹੈ। ਈਰਾਨ ਦੀ ਸਮਾਚਾਰ ਏਜੰਸੀ ਦੇ ਮੁਤਾਬਕ ਬੰਬ ਧਮਾਕਾ ਪੁਲਿਸ ਨੂੰ ਟਾਰਗੇਟ ਕਰਦੇ ਹੋਏ ਇਕ ਕਾਰ `ਚ ਕੀਤਾ ਗਿਆ।
ਜਾਣਕਾਰ ਸੂਤਰਾਂ ਮੁਤਾਬਕ ਇਹ ਧਮਾਕਾ ਈਰਾਨ ਦੇ ਚਾਬਹਾਰ ਦੇ ਦੱਖਣ ਬੰਦਰਗਾਹ ਵਿੱਚ ਹੋਇਆ ਅਤੇ ਇਹ ਅਤਿਵਾਦੀ ਹਮਲਾ ਸੀ। ਇਸ ਹਮਲੇ `ਚ ਤਿੰਨ ਲੋਕਾਂ ਦੀ ਮੌਤ ਹੋ ਗਈ ਅਤੇ ਲਗਭੱਗ 19 ਜਖ਼ਮੀ ਹੋਏ ਹਨ। ਹਾਲੇ ਤੱਕ ਧਮਾਕੇ ਦੀ ਜਿੰਮੇਵਾਰੀ ਕਿਸੇ ਅਤਿਵਾਦੀ ਸੰਗਠਨ ਨੇ ਨਹੀਂ ਲਈ।
ਵਰਨਣ ਯੋਗ ਹੈ ਕਿ ਚਾਬਹਾਰ ਪੋਰਟ ਨੂੰ ਭਾਰਤ, ਈਰਾਨ ਅਤੇ ਅਫਗਾਨਿਸਤਾਹਨ ਮਿਲ ਕੇ ਵਰਤੋਂ ਕਰਦੇ ਹਨ। ਮਈ 2016 ਵਿੱਚ ਭਾਰਤ, ਈਰਾਨ ਅਤੇ ਅਫਗਾਨਿਸਤਾਨ ਨੇ ਟਰਾਂਜ਼ਿਟ ਅਤੇ ਟਰਾਂਸਪੋਰਟ ਕਾਰਿਡੋਰ ਦੀ ਉਸਾਰੀ ਲਈ ਸਮੱਝੌਤੇ `ਤੇ ਦਸਤਖਤ ਕੀਤੇ ਸਨ। ਇਸ ਦੇ ਤਹਿਤ ਚਾਬਹਾਰ ਬੰਦਰਗਾਹ ਦੀ ਤਿੰਨੇ ਦੇਸ਼ ਵਰਤੋਂ ਕਰਨਗੇ। ਇਹ ਈਰਾਨ ਵਿਚ ਸਮੁੰਦਰੀ ਟ੍ਰਾਂਸਪੋਰਟ ਦੇ ਖੇਤਰੀ ਕੇਂਦਰ ਦੇ ਰੂਪ `ਚ ਹੋਵੇਗਾ। ਇਸ ਤੋਂ ਇਲਾਵਾ ਤਿੰਨਾਂ ਦੇਸ਼ਾਂ ਨੂੰ ਅਰਬਾਂ ਡਾਲਰ ਦੇ ਸਮਾਨ ਅਤੇ ਮੁਸਾਫਰਾਂ ਦੀ ਆਵਾਜਾਈ ਹੋ ਸਕੇਗੀ।
ਭਾਰਤ ਈਰਾਨ `ਚ ਚਾਬਹਾਰ ਪੋਰਟ ਦੇ ਰਾਹੀਂ ਇਸ ਪੂਰੇ ਇਲਾਕੇ `ਚ ਚੀਨ ਅਤੇ ਪਾਕਿਸਤਾਨ ਦੇ ਖਿਲਾਫ ਇਕ ਮਨੋ ਵਿਗਿਆਨਕ ਬੜ੍ਹਤ ਬਣਾ ਚੁੱਕਾ ਹੈ। ਪਾਕਿਸਤਾਨ ਨੂੰ ਬਾਈਪਾਸ ਕਰਦੇ ਹੋਏ ਚਾਬਹਾਰ ਪੋਰਟ ਪਹੁੰਚਣਾ ਭਾਰਤ ਲਈ ਰਣਨੀਤਕ ਅਤੇ ਰਾਜਨੀਤਕ ਜਿੱਤ ਹੈ। ਮਈ 2016 ਵਿਚ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਹਾਜ਼ਰੀ `ਚ ਇਹ ਦੁਵੱਲਾ ਸਮਝੌਤਾ ਹੋਇਆ ਸੀ, ਜਿਸ ਵਿੱਚ ਭਾਰਤ ਨੇ ਪਹਿਲੇ ਪੜਾਅ ਦੇ ਵਿਕਾਸ `ਚ ਕਰੀਬ 85.21 ਮਿਲਿਅਨ ਡਾਲਰ ਨਿਵੇਸ਼ ਕੀਤਾ ਹੈ। ਇਸ ਤੋਂ ਇਲਾਵਾ ਭਾਰਤ ਫੀਸ ਦੇ ਰੂਪ ਵਿਚ ਈਰਾਨ ਨੂੰ ਦਸ ਸਾਲ ਵਿਚ 22.94 ਮਿਲਿਅਨ ਡਾਲਰ ਦੇਵੇਗਾ। ਇੰਨਾ ਹੀ ਨਹੀਂ ਈਰਾਨ ਭਾਰਤ ਨੂੰ ਚਾਬਹਾਰ ਪੋਰਟ ਦਾ ਮੈਨੇਜਮੈਂਟ ਵੀ ਦੇਣ ਨੂੰ ਰਾਜ਼ੀ ਹੋ ਗਿਆ ਹੈ।