ਜਲੰਧਰ, 5 ਦਸੰਬਰ (ਪੋਸਟ ਬਿਊਰੋ)- ਨਿਊ ਰਸੀਲਾ ਨਗਰ ਵਿੱਚ 20 ਜੂਨ ਨੂੰ ਹੋਏ ਰਾਜਨ ਸਿੰਘ ਸੁਸਾਈਡ ਕੇਸ ਵਿੱਚ ਫਰਾਰ ਟਰੈਵਲ ਏਜੰਟ ਮਨਜੀਤ ਸਿੰਘ ਨੂੰ ਪੁਲਸ ਨੇ ਬੀਤੇ ਦਿਨ ਬਸਤੀ ਸ਼ੇਖ ਦੀ ਘਾਹ ਮੰਡੀ ਦੇ ਰਹਿਣ ਵਾਲੇ ਮਨਜੀਤ ਸਿੰਘ ਨੂੰ ਕੋਰਟ ਵਿੱਚ ਪੇਸ਼ ਕਰ ਕੇ ਪੁਲਸ ਨੇ ਦੋ ਦਿਨ ਰਿਮਾਂਡ 'ਤੇ ਲਿਆ ਹੈ। ਥਾਣਾ ਪੰਜ ਵਿੱਚ ਦੋਸ਼ੀ ਦੇ ਖਿਲਾਫ ਆਤਮ ਹੱਤਿਆ ਲਈ ਮਜ਼ਬੂਰ ਕਰਨ ਦਾ ਕੇਸ ਦਰਜ ਹੈ।
ਮਿਲੀ ਜਾਣਕਾਰੀ ਅਨੁਸਾਰ 42 ਸਾਲਾ ਮਨਜੀਤ ਸਿੰਘ ਪ੍ਰਾਪਰਟੀ ਡੀਲਰ ਦੇ ਨਾਲ-ਨਾਲ ਟਰੈਵਲ ਏਜੰਟ ਦਾ ਗੈਰ ਕਾਨੂੰਨੀ ਤਰੀਕੇ ਨਾਲ ਕੰਮ ਕਰਦਾ ਸੀ। ਉਸ ਕੋਲ ਕੋਈ ਲਾਇਸੈਂਸ ਨਹੀਂ ਹੈ। ਐੱਸ ਐੱਚ ਓ ਨਿਰਮਲ ਸਿੰਘ ਨੇ ਕਿਹਾ ਕਿ ਪੁਲਸ ਦੋਸ਼ੀ ਤੋਂ ਪੁੱਛਗਿੱਛ ਕਰ ਰਹੀ ਹੈ। ਦੋਸ਼ੀ ਨੇ ਐਂਟੀਸਿਪ੍ਰੇਟੀ ਬੇਲ ਦੇ ਲਈ ਸੈਸ਼ਨ ਕੋਰਟ ਤੋਂ ਲੈ ਕੇ ਸੁਪਰੀਮ ਕੋਰਟ ਤੱਕ ਐਪਲੀਕੇਸ਼ਨ ਦਾਇਰ ਕੀਤੀ ਸੀ, ਪਰ ਉਸ ਨੂੰ ਕਿਸੇ ਵੀ ਕੋਰਟ ਤੋਂ ਰਾਹਤ ਨਹੀਂ ਮਿਲੀ ਸੀ।
ਵਰਨਣ ਯੋਗ ਹੈ ਕਿ ਰਾਜਨ ਦੀ ਲਾਸ਼ 20 ਜੂਨ ਨੂੰ ਕਮਰੇ ਵਿੱਚ ਫਾਂਸੀ ਨਾਲ ਲਟਕੀ ਹੋਈ ਮਿਲੀ ਸੀ। ਉਸ ਦੀ ਮਾਂ ਦਰਸ਼ਨ ਕੌਰ ਅਤੇ ਭਰਜਾਈ ਨੇ ਰੌਲਾ ਪਾਇਆ ਤਾਂ ਮੁਹੱਲੇ ਵਾਲੇ ਆਏ ਅਤੇ ਉਸ ਨੂੰ ਉਤਾਰ ਕੇ ਪ੍ਰਾਈਵੇਟ ਹਸਪਤਾਲ ਲੈ ਗਏ, ਜਿੱਥੇ ਉਸ ਦੀ ਮੌਤ ਹੋ ਗਈ ਸੀ। ਮਲਕੀਤ ਨੇ ਪੁਲਸ ਨੂੰ ਦੱਸਿਆ ਸੀ ਕਿ ਉਸ ਦੇ ਵੱਡੇ ਭਰਾ ਰਾਜਨ ਸਿੰਘ ਤੋਂ ਮਨਜੀਤ ਸਿੰਘ ਨੇ ਅਮਰੀਕਾ ਭੇਜਣ ਦੇ ਨਾਂਅ 'ਤੇ 13.40 ਲੱਖ ਰੁਪਏ ਲਏ ਸਨ ਅਤੇ ਅਮਰੀਕਾ ਦੀ ਬਜਾਏ ਮਾਸਕੋ ਭੇਜ ਦਿੱਤਾ ਸੀ। ਉਥੇ ਕਰੀਬ ਤਿੰਨ ਮਹੀਨੇ ਫਸੇ ਰਹਿਣ ਪਿੱਛੋਂ ਘਰ ਆਇਆ ਸੀ। ਉਹ ਮਨਜੀਤ ਤੋਂ ਆਪਣੇ ਪੈਸੇ ਮੰਗਦਾ ਸੀ। ਮਨਜੀਤ ਪੈਸੇ ਦੇਣ ਦੀ ਥਾਂ ਉਸ ਨੂੰ ਤੰਗ ਕਰਦਾ ਸੀ। ਦੁਖੀ ਹੋ ਕੇ ਉਸ ਨੇ ਸੁਸਾਈਡ ਕਰ ਲਿਆ। ਥਾਣਾ ਪੰਜ ਦੀ ਪੁਲਸ ਨੇ ਖੁਦਕੁਸ਼ੀ ਲਈ ਮਜਬੂਰ ਕਰਨ ਦਾ ਕੇਸ ਦਰਜ ਕਰ ਕੇ ਉਸ ਦੀ ਤਲਾਸ਼ ਵਿੱਚ ਛਾਪੇਮਾਰੀ ਕੀਤੀ ਸੀ।