ਜਲੰਧਰ, 4 ਦਸੰਬਰ (ਪੋਸਟ ਬਿਊਰੋ)- ਥਾਣਾ ਕੈਂਟ ਦੀ ਪੁਲਸ ਨੇ ਕੱਲ੍ਹ 18 ਸਾਲਾ ਅਜਿਹੇ ਨੌਜਵਾਨ ਨੂੰ ਗ੍ਰਿਫਤਾਰ ਕੀਤਾ ਹੈ, ਜਿਹੜਾ ਦਸਵੀਂ ਕਲਾਸ ਦਾ ਜਾਅਲੀ ਸਰਟੀਫਿਕੇਟ ਵਿਖਾ ਕੇ ਆਰਮੀ ਵਿੱਚ ਭਰਤੀ ਹੋਣ ਲਈ ਜਲੰਧਰ ਕੈਂਟ ਸਥਿਤ ਭਰਤੀ ਹੈੱਡਕੁਆਰਟਰ ਵਿੱਚ ਆਇਆ ਹੋਇਆ ਸੀ।
ਇਸ ਸੰਬੰਧ ਵਿੱਚ ਥਾਣਾ ਕੈਂਟ ਦੇ ਇੰਚਾਰਜ ਇੰਸਪੈਕਟਰ ਸੁਖਦੇਵ ਸਿੰਘ ਔਲਖ ਨੇ ਦੱਸਿਆ ਕਿ ਨੌਜਵਾਨ ਦੀ ਪਛਾਣ ਪ੍ਰਦੀਪ ਸਿੰਘ ਪੁੱਤਰ ਵਜ਼ੀਰ ਸਿੰਘ ਪਿੰਡ ਕਾਪੜੋ, ਥਾਣਾ ਨਰਨੌਦ, ਜ਼ਿਲ੍ਹਾ ਹਿਸਾਰ, ਹਰਿਆਣਾ ਵਜੋਂ ਹੋਈ ਹੈ। ਉਸ ਨੇ ਭਰਤੀ ਦਫਤਰ ਵਿੱਚ ਆ ਕੇ ਜੋ ਸਰਟੀਫਿਕੇਟ ਵਿਖਾਇਆ, ਉਹ ਕਰਣਜੀਤ ਸਿੰਘ ਪੁੱਤਰ ਰੂਪ ਸਿੰਘ ਸੁੰਦਰਨਗਰ ਵਾਰਡ ਨੰਬਰ 17 ਹੁਸ਼ਿਆਰਪੁਰ ਦੇ ਨਾਂਅ ਦਾ ਸੀ ਅਤੇ ਉਸ ਉਤੇ ਲਿਖਿਆ ਸੀ ਕਿ ਉਸ ਨੇ ਗਿਆਨ ਸਾਗਰ ਪਬਲਿਕ ਸਕੂਲ ਸੰਗਰੂਰ ਤੋਂ ਦਸਵੀਂ ਕਲਾਸ ਪਾਸ ਕੀਤੀ ਹੈ। ਫੌਜੀ ਅਧਿਕਾਰੀਆਂ ਦੀ ਜਾਂਚ ਵਿੱਚ ਪ੍ਰਦੀਪ ਦੀ ਸੱਚਾਈ ਸਾਹਮਣੇ ਆ ਗਈ। ਐੱਸ ਐੱਚ ਓ ਸੁਖਦੇਵ ਸਿੰਘ ਔਲਖ ਨੇ ਦੱਸਿਆ ਕਿ ਪ੍ਰਦੀਪ ਦੇ ਖਿਲਾਫ ਥਾਣਾ ਕੈਂਟ ਵਿੱਚ ਕੇਸ ਦਰਜ ਕਰ ਲਿਆ ਗਿਆ ਹੈ। ਉਸ ਨੂੰ ਅਦਾਲਤ ਵਿੱਚ ਪੇਸ਼ ਕੀਤਾ ਜਾਵੇਗਾ।