ਵਾਸਿ਼ੰਗਟਨ, 17 ਜਨਵਰੀ (ਪੋਸਟ ਬਿਊਰੋ) : ਅਮਰੀਕਾ ਦੀ ਨਵੀਂ ਚੁਣੀ ਗਈ ਵਾਈਸ ਪ੍ਰੈਜ਼ੀਡੈਂਟ ਕਮਲਾ ਹੈਰਿਸ ਸੋਮਵਾਰ ਨੂੰ ਸੈਨੇਟ ਦੇ ਆਪਣੇ ਅਹੁਦੇ ਤੋਂ ਅਸਤੀਫਾ ਦੇਵੇਗੀ। ਨਵੇਂ ਚੁਣੇ ਗਏ ਰਾਸ਼ਟਰਪਤੀ ਜੋਅ ਬਾਇਡਨ ਤੇ ਹੈਰਿਸ ਵੱਲੋਂ ਆਪਣੇ ਅਹੁਦੇ ਦੀ ਸੰਹੁ ਚੁੱਕੇ ਜਾਣ ਤੋਂ ਦੋ ਦਿਨ ਪਹਿਲਾਂ ਅਜਿਹਾ ਕੀਤਾ ਜਾਵੇਗਾ।
ਕੈਲੇਫੋਰਨੀਆ ਡੈਮੋਕ੍ਰੈਟ ਦੇ ਸਹਾਇਕਾਂ ਵੱਲੋਂ ਇਸ ਦੀ ਪੁਸ਼ਟੀ ਕੀਤੀ ਗਈ ਤੇ ਉਨ੍ਹਾਂ ਆਖਿਆ ਕਿ ਗਵਨਰ ਗੈਵਿਨ ਨਿਊਸਮ ਇਸ ਫੈਸਲੇ ਤੋਂ ਜਾਣੂ ਹਨ ਤੇ ਉਨ੍ਹਾਂ ਵੱਲੋਂ ਹੈਰਿਸ ਦੇ ਕਾਰਜਕਾਲ ਦੇ ਰਹਿੰਦੇ ਦੋ ਸਾਲ ਪੂਰੇ ਕਰਨ ਲਈ ਕੈਲੇਫੋਰਨੀਆ ਦੇ ਸੈਕਟਰੀ ਆਫ ਸਟੇਟ ਡੈਮੋਕ੍ਰੈਟ ਐਲੈਕਸ ਪੈਡੀਲਾ ਨੂੰ ਨਿਯੁਕਤ ਕੀਤਾ ਜਾਵੇਗਾ। ਪੈਡਿਲਾ ਕੈਲੇਫੋਰਨੀਆ ਤੋਂ ਪਹਿਲੇ ਲੈਟਿਨ ਸੈਨੇਟਰ ਹੋਣਗੇ, ਜਿਹੜੇ ਇਹ ਅਹੁਦਾ ਸਾਂਭਣਗੇ। ਨਿਊਸਮ ਨੇ ਆਪਣੀ ਪਸੰਦ ਦਸੰਬਰ ਵਿੱਚ ਉਦੋਂ ਜ਼ਾਹਿਰ ਕੀਤੀ ਸੀ ਜਦੋਂ ਦੇਸ਼ ਦੇ ਸੱਭ ਤੋਂ ਵੱਧ ਆਬਾਦੀ ਵਾਲੇ ਸਟੇਟ ਤੋਂ ਸੈਨੇਟ ਦੀ ਇਸ ਵਿਲੱਖਣ ਵਕੈਂਸੀ ਲਈ ਲਾਬਿੰਗ ਪੂਰੇ ਜ਼ੋਰਾਂ ਉੱਤੇ ਸੀ।
ਹੈਰਿਸ ਵੱਲੋਂ ਕੋਈ ਸੈਨੇਟ ਫੇਅਰਵੈੱਲ ਸਪੀਚ ਨਹੀਂ ਦਿੱਤੀ ਜਾਵੇਗੀ। ਮੰਗਲਵਾਰ ਤੱਕ ਸੈਨੇਟ ਦਾ ਸੈਸ਼ਨ ਨਹੀਂ ਸੱਦਿਆ ਜਾ ਰਿਹਾ। ਪੈਡੀਲਾ ਦੇ ਸੈਨੇਟ ਪਹੁੰਚਣ ਤੇ ਵਾਈਸ ਪ੍ਰੈਜ਼ੀਡੈਂਟ ਵਜੋਂ ਹੈਰਿਸ ਦੇ ਸੰਹੁ ਚੁੱਕੇ ਜਾਣ ਤੋਂ ਬਾਅਦ ਉਨ੍ਹਾਂ ਦੇ ਸੈਨੇਟ ਦਾ ਪ੍ਰੀਜ਼ਾਈਡਿੰਗ ਆਫੀਸਰ ਬਣਨ ਤੋਂ ਬਾਅਦ ਡੈਮੋਕ੍ਰੈਟਸ ਦਾ ਸੈਨੇਟ ਵਿੱਚ ਦਬਦਬਾ ਹੋ ਜਾਵੇਗਾ। ਪਰ ਪਾਰਟੀ ਨੂੰ ਅਜੇ ਵੀ 5 ਜਨਵਰੀ ਨੂੰ ਹੋਈਆਂ ਚੋਣਾਂ ਵਿੱਚ ਚੁਣੇ ਗਏ ਸੈਨੇਟਰ ਜੌਨ ਓਸੌਫ ਤੇ ਜਾਰਜੀਆ ਤੋਂ ਰਫੇਲ ਵਾਰਨੌਕ ਦੇ ਸੰਹੁ ਚੁੱਕੇ ਜਾਣ ਦੀ ਉਡੀਕ ਵੀ ਹੈ।