ਨਵੀਂ ਦਿੱਲੀ, 17 ਜਨਵਰੀ (ਪੋਸਟ ਬਿਊਰੋ)- ਕੋਰੋਨਾ ਦੇ ਇਲਾਜ ਲਈ ਭਾਰਤ ਵਿੱਚ ਵਿਕਸਿਤ ਹੋਏ ਟੀਕੇ ‘ਕੋਵੈਕਸੀਨ' ਬਾਰੇ ਕਈ ਸਵਾਲ ਉਠ ਰਹੇਹਨ। ਭਾਰਤ ਬਾਇਓਟੈਕ ਵੱਲੋਂ ਵਿਕਸਿਤ ਕੀਤੀ ਗਈ ‘ਕੋਵੈਕਸੀਨ' ਦੇ ਅਜੇ ਤੀਜੇ ਗੇੜ ਦੇ ਟਰਾਇਲ ਪੂਰੇ ਨਾ ਹੋਣ ਕਾਰਨ ਲੋਕ ਇਸ ਟੀਕੇ ਨੂੰ ਲਵਾਉਣ ਉੱਤੇਸ਼ੱਕ ਪ੍ਰਗਟਾ ਰਹੇ ਹਨ ਤੇ ਦਿੱਲੀ ਦੇ ਆਰ ਐਮ ਐਲ (ਰਾਮ ਮਨੋਹਰ ਲੋਹੀਆ) ਹਸਪਤਾਲ ਦੇ ਰੈਜ਼ੀਡੈਂਟ ਡਾਕਟਰਾਂ ਨੇ ਕੋਵੈਕਸੀ ਲਵਾਉਣ ਤੋਂ ਨਾਂਹ ਕਰ ਕੇ ਕਿਹਾ ਹੈ ਕਿ ਉਹ ਕੋਵੀਸ਼ੀਲਡ (ਕੋਰੋਨਾ ਦੇ ਖਿਲਾਫ ਵਰਤਿਆ ਜਾਣ ਵਾਲਾ ਦੂਜਾ ਟੀਕਾ) ਲਵਾਉਣਗੇ।
ਕੋਵੈਕਸੀਨ ਟੀਕਾ ਲਵਾਉਣ ਵਾਲਿਆਂ ਤੋਂ ਇੱਕ ਸਹਿਮਤੀ ਪੱਤਰ ਉੱਤੇਦਸਖਤ ਕਰਵਾਏ ਜਾਂਦੇ ਹਨ, ਜਿਸ ਵਿੱਚ ਲਿਖਿਆ ਹੈ ਕਿ ਟੀਕੇ ਕਾਰਨ ਜੇ ਕੋਈ ਮਾੜਾ ਪ੍ਰਭਾਵ ਸਾਹਮਣੇ ਆਇਆ ਤਾਂ ਉਨ੍ਹਾਂ ਨੂੰ ਮੁਆਵਜ਼ਾ ਦਿੱਤਾ ਜਾਵੇਗਾ। ਇਸ ਫਾਰਮ ਵਿੱਚ ਕਿਹਾ ਗਿਆ ਹੈ ਕਿ ਇਹ ਟੀਕਾ ਐਮਰਜੈਂਸੀ ਹਾਲਾਤ 'ਚ ਸੀਮਿਤ ਵਰਤੋਂ ਲਈ ਲਾਇਆ ਜਾਵੇਗਾ। ਇਸ 'ਚ ਇਹ ਵੀ ਕਿਹਾ ਗਿਆ ਹੈ ਕਿ ਟੀਕੇ ਦੇ ਕਲੀਨੀਕਲ ਪ੍ਰਭਾਵੀ ਹੋਣ ਦਾ ਤੱਥ ਸਥਾਪਤ ਕੀਤਾ ਜਾਣਾ ਬਾਕੀ ਹੈ ਤੇ ਇਹ ਅਜੇ ਵੀ ਫੇਜ਼-3 ਟਰਾਇਲ ਵਿੱਚ ਹੈ। ਆਰ ਐਮ ਐਲ ਹਸਪਤਾਲ ਦੇ ਡਾਕਟਰਾਂ ਨੇ ਕੋਵੈਕਸੀਨ ਦੀ ਬਜਾਏ ‘ਕੋਵੀਸ਼ੀਲਡ' ਲਵਾਉਣ ਦੀ ਮੰਗ ਕੀਤੀ। ਆਰ ਐਮ ਐਲ ਦੀ ਰੈਜ਼ੀਡੈਂਟ ਡਾਕਟਰ ਐਸੋਸੀਏਸ਼ਨ ਨੇ ਹਸਪਤਾਲ ਦੇ ਮੈਡੀਕਲ ਸੁਪਰਡੈਂਟ ਨੂੰ ਚਿੱਠੀ ਲਿਖ ਕੇ ਕਿਹਾ ਹੈ ਕਿ ਰੈਜ਼ੀਡੈਂਟ ਡਾਕਟਰ ਕੋਵੈਕਸੀਨ ਬਾਰੇ ਸ਼ਸ਼ੋਪੰਜ ਵਿੱਚ ਹਨ, ਕਿਉਂਕਿ ਇਸ ਦਾ ਟਰਾਇਲ ਪੂਰਾ ਨਹੀਂ ਹੋਇਆ ਅਤੇ ਹੋ ਸਕਦਾ ਹੈ ਕਿ ਵੱਡੀ ਗਿਣਤੀ ਵਿੱਚ ਟੀਕਾਕਰਨ ਲਈ ਨਾ ਪਹੁੰਚਣ, ਜਿਸ ਕਾਰਨ ਟੀਕਾਕਰਨ ਮੁਹਿੰਮ ਨਾਕਾਮ ਹੋ ਜਾਵੇ, ਇਸ ਲਈ ਇਹ ਟੀਕਾ ਨਹੀਂ ਲਾਇਆ ਜਾਣਾ ਚਾਹੀਦਾ।