ਸ੍ਰੀਨਗਰ, 14 ਜਨਵਰੀ (ਪੋਸਟ ਬਿਊਰੋ)- ਭਾਰਤ ਦੀ ਸੀਮਾ ਸੁਰੱਖਿਆ ਫੋਰਸ (ਬੀ ਐਸ ਐਫ) ਨੇ ਪਾਕਿਸਤਾਨ ਵੱਲੋਂ ਅੱਤਵਾਦੀਆਂ ਦੀ ਘੁਸਪੈਠ ਦੀ ਇੱਕ ਹੋਰ ਸਾਜ਼ਿਸ਼ ਨਾਕਾਮ ਕਰ ਦਿੱਤੀ ਹੈ। ਜੰਮੂ-ਕਸ਼ਮੀਰ ਦੇ ਜ਼ਿਲ੍ਹਾ ਕਠੂਆ ਦੇ ਹੀਰਾ ਨਗਰ ਸੈਕਟਰ `ਚ ਅੰਤਰਰਾਸ਼ਟਰੀ ਸਰਹੱਦ `ਤੇ ਬਬੀਆ ਪਿੰਡ ਨੇੜੇ ਬੀ ਐਸ ਐਫ ਨੇ 150 ਮੀਟਰ ਲੰਬੀ ਸੁਰੰਗ ਦਾ ਪਤਾ ਲਗਾਇਆ ਗਿਆ ਹੈ। ਸੁਰੱਖਿਆ ਏਜੰਸੀਆਂ ਇਸ ਦੇ ਬਾਅਦ ਚੌਕਸ ਹੋ ਗਈਆਂ ਹਨ।
ਪੁਲਸ ਅਤੇ ਬੀ ਐਸ ਐਫ ਦੇ ਉਚ ਅਧਿਕਾਰੀਆਂ ਨੇ ਮੌਕੇ ਦਾ ਜਾਇਜ਼ਾ ਲਿਆ ਕਿ ਅੱਤਵਾਦੀਆਂ ਨੇ ਉਸ ਸੁਰੰਗ ਰਾਹੀਂ ਕੋਈ ਘੁਸਪੈਠ ਦੀ ਤਾਜ਼ਾ ਵਾਰਦਾਤ ਤਾਂ ਨਹੀਂ ਕੀਤੀ। ਬੀ ਐਸ ਐਫ ਦੇ ਇੰਸਪੈਕਟਰ ਜਨਰਲ ਜੇ ਐਸ ਜਮਵਾਲ ਨੇ ਪੱਤਰਕਾਰਾਂ ਨੂੰ ਦੱਸਿਆ ਕਿ ਬੀ ਐਸ ਐਫ ਦੀ ਗਸ਼ਤੀ ਪਾਰਟੀ ਨੇ ਕੱਲ੍ਹ ਸਵੇਰੇ ਬਬੀਆ ਪਿੰਡ ਨੇੜੇ 150 ਮੀਟਰ ਲੰਬੀ, 20-25 ਫੁੱਟ ਡੰੂਘੀ ਅਤੇ ਦੋ ਤੇ ਢਾਈ ਫੁੱਟ ਚੌੜੀ ਸੁਰੰਗ ਦਾ ਪਤਾ ਲਾਇਆ ਹੈ। ਉਨ੍ਹਾਂ ਦੱਸਿਆ ਕਿ ਸਰਹੱਦ ਤੋਂ ਕਰੀਬ 50 ਮੀਟਰ ਦੂਰ ਮਿਲੀ ਇਹ ਸੁਰੰਗ ਪੁਰਾਣੀ ਜਾਪਦੀ ਹੈ ਤੇ ਇਸ ਦਾ ਪਤਾ ਓਦੋਂ ਲੱਗਾ, ਜਦੋਂ ਜੇ ਸੀ ਬੀ ਮਸ਼ੀਨ ਨਾਲ ਮਿੱਟੀ ਪੁੱਟੀ ਜਾ ਰਹੀ ਸੀ ਅਤੇ ਸੁਰੰਗ ਦਾ ਖੁੱਲ੍ਹਾ ਮੂੰਹ ਨਜ਼ਰ ਆਇਆ, ਜਿਸ ਦੇ ਉਪਰ ਸਰੀਏ ਦਾ ਇੱਕ ਰਾਡ ਰੱਖਿਆ ਹੋਇਆ ਸੀ। ਇਸ ਦੇ ਨੇੜੇ ਕਰਾਚੀ ਵਿੱਚ ਬਣੇ ਸੀਮੈਂਟ ਅਤੇ ਰੇਤ ਦੀਆਂ ਤਿੰਨ ਬੋਰੀਆਂ ਮਿਲੀਆਂ ਹਨ।
ਬੀ ਐਸ ਐਫ ਨੇ ਨਗਰੋਟਾ ਹਮਲੇ ਦੇ ਬਾਅਦ ਸਰਹੱਦੀ ਪਿੰਡਾਂ `ਚ ਆਪ੍ਰੇਸ਼ਨ ਸੁਦਰਸ਼ਨ ਚਲਾਇਆ ਹੋਇਆ ਹੈ। ਕੰਟਰੋਲ ਰੇਖਾ `ਤੇ ਫ਼ੌਜ ਵੱਲੋਂ ਵਰਤੀ ਜਾ ਰਹੀ ਚੌਕਸੀ ਦੇ ਕਾਰਨ ਪਾਕਿਸਤਾਨ ਅੱਤਵਾਦੀਆਂ ਨੂੰ ਅੰਤਰਰਾਸ਼ਟਰੀ ਸਰਹੱਦ ਤੋਂ ਘੁਸਪੈਠ ਕਰਵਾਉਣ ਦੀ ਸਾਜ਼ਿਸ਼ 'ਚ ਲੱਗਾ ਹੋਇਆ ਹੈ। ਵਰਨਣ ਯੋਗ ਕਿ ਪੁਲਵਾਮਾ ਫਿਦਾਈਨ ਹਮਲੇ `ਚ ਸੀ ਆਰ ਪੀ ਐਫ ਦੇ 40 ਜਵਾਨ ਮਾਰੇ ਗਏ ਸਨ। ਜੰਮੂ ਦੇ ਬੰਨ ਟੋਲ ਪਲਾਜ਼ਾ ਨੇੜੇ 2 ਵੱਡੀਆਂ ਵਾਰਦਾਤਾਂ ਦੇ ਇਲਾਵਾ ਕਈ ਹੋਰ ਹਮਲਿਆਂ `ਚ ਸ਼ਾਮਲ ਰਹੇ ਜੈਸ਼-ਏ-ਮੁਹੰਮਦ ਦੇ ਅੱਤਵਾਦੀ ਅੰਤਰਰਾਸ਼ਟੀ ਸਰਹੱਦ ਰਾਹੀਂ ਘੁਸਪੈਠ ਕਰਕੇ ਆਏ ਸਨ, ਜਿਸ ਦੀ ਪੁਸ਼ਟੀ ਐਨ ਆਈ ਏ ਨੇ ਆਪਣੀ ਚਾਰਜਸ਼ੀਟ `ਚ ਕੀਤੀ ਹੈ। ਜੰਮੂ ਖੇਤਰ ਦੀ ਲੱਗਭਗ 3300 ਕਿਲੋਮੀਟਰ ਲੰਮੀ ਅੰਤਰਰਾਸ਼ਟਰੀ ਸਰਹੱਦ ਉਤੇ ਬੀ ਐਸ ਐਫ ਵੱਲੋਂ ਅਜਿਹੀਆਂ ਹੋਰ ਸੁਰੰਗਾਂ ਦਾ ਪਤਾ ਲਾਉਣ ਲਈ ਤਲਾਸ਼ੀ ਮੁਹਿੰਮ ਜਾਰੀ ਹੈ। ਬੀਤੇ ਸਾਲ ਸਾਂਬਾ ਸੈਕਟਰ `ਚ 29 ਅਗਸਤ ਅਤੇ 23 ਨਵੰਬਰ 2020 ਨੂੰ ਵੀ ਇਸ ਤਰ੍ਹਾਂ ਦੀਆਂ 2 ਸੁਰੰਗਾਂ ਦਾ ਬੀ ਐਸ ਐਫ ਨੇ ਪਤਾ ਲਗਾਇਆ ਸੀ, ਜਿਨ੍ਹਾਂ ਰਾਹੀਂ ਦਾਖ਼ਲ ਹੋਏ ਜੈਸ਼ ਦੇ ਤਿੰਨ ਅੱਤਵਾਦੀ ਟਰੱਕ `ਚ ਸਵਰ ਹੋ ਕੇ ਕਸ਼ਮੀਰ ਜਾਣ ਲੱਗਿਆਂ ਮੁਕਾਬਲੇ `ਚ ਮਾਰੇ ਗਏ ਸਨ।